المحور الدماغى
, الأربعاء، 23 يونيو 2010
وووويـــــــ مستمرين معاكم
ابوعلى شكل حياتك معاكوا من اعلى قمة المحور الدماغى
حيث ننقاش حقيقة المصدع المصرى
وقولنا فى الحلقة اللى فاتت انى الصداع فرديتين
فردة عضوى يعنى جسدى يعنى ليه اسباب مرضية
زاى الضغظ زاى الم الاسنان الم الجيوب الانفية
اوالانيميا نتيجة عدم اكل اللحمة التى تحاول الحكومة حاليا زرعها
الا انى محاولات زرع اللحمة التى لم تثمر حتى الان
احنا معاكوا لسه بنقاش الفردة التانية
وهى الفردة المعنوية اللى بتساعد الفردة الجسدية على اتمام وظيفتها فى اكمل وجه فى عمل عملية التصديع
ومن اعلى المحور الدماغى حاليا احنا شايفين حالة زحام مرورى حاد
فى اعضاء ومكونات كائن نازل من بيته
هانعمل لحضرتكوا تغطية كاملة لهذا الكائن
لغاية لما يوصل الشغل ويرجع
استعنا بالله وصلوا كده على المصطفى صلى الله عليه وسلم
المصدع نازل من البيت اذا فجاءة وقف امامه كتلة متناسقة العضلات مفلطحة تتدعى انه زوجته ويدور الحوار التالى
نازل كده من غير ماتسيب فلوس ؟
هو البيت ده ايه مش بيصرف ولا انت علشان خارج ايتحرق بقى اللى قاعدين
طب يا ستى قولى كلمة حلوة على الريق
ايه ايه ايه كلمة حلوة طب اعمل اللى عليك علشان اقولك يا سبعى
ويشعر المصدع فى هذا الحالة بحالة من الاحباط ويبدء الدم الواصل الى المخ فى التضاؤل نتيجة ان الاوردة الموصلة الدم للمخ قد انكمشت نتيجة سماع كلام سام
اتفضلى يا ستى عشرين جنية اهم
نعم نعم نعم اعمل بيهم ايه دول يادوبك اجيب بيهم تلت تربع فرخة
انت عارف الفرخة بكام الكليو 14 جينة يا محترم
بلاش يا ستى فراخ فكرى فى حاجة تانية انتى عاوزنى افكر بلاش صداع بقى على الصبح وسيب خمسين جنية
وهنا يزداد الاحساس بأن شيىء قد قام بخنق المصدع وتنبعج بعض شعيرات الوجه فتظهر شدة فى العضلات ويختفى انبساطها
ويقرر ان ينزل للعمل
وتبدء رحلة الشارع
على محطة الاتوبيس
يارب الاتوبيس يجى بدرى بقى
هو احنا مش زاى الناس اللى راكبه عربيات دى
هما بيجيبوا الفلوس دى منين
منك لله يا ابويا ماكنتش اجتهدت شوية وعملت لينا خميرة حلوة
وهنا نلاحظ قلة الاوكسجين الواصل الى المحور الدماغى وبدءت الفردة الجسدية تتأثر بالكلام
وسع يا سيدى شوية كده خلينا نركب وسعى شوية يا ستى انتى واخدة نص الاتوبيس لوحدك
ما تحترم نفسك يا بنى ادم ابقى انزل اركب اتوبيس ابوك
ربنا يقل منكوا( يقولها فى السر)
هى دى اخرة الحكومة السودة اللى حاكمنا
ولا مواصلات مريحة ولا مرتب ولا طرق وزحمة وبهدلة
وعيشة هباب وزفت وكمان الطريق واقف وهاندق الكارت متأخرين فى الشغل
افتح الباب يا اسطى انت نزلنى هنا
ممنوع يا حضرة
هى جت عليا انا افتح يا عم ماهى خربانه خربانه
لما نعدى الاشارة انزلك
وصلنا ام الشغل
وهنا نلاحظ على المصدع ان هناك الالام بدءت تهاجمه
ويشعر بتنقير الصداع بعد ان شحنت الفردة المعنوية الفردة الجسدية
بكل المشاعر السلبية واسودت الدنيا
ويدخل الشغل مصدع
وتبدء رحلة المعاناااااااااااه
وووويـ مستمرين معاكوا ابوعلى شكل حياتك من على المحور الدماغى
ورحلة فى كيان مصدع
ونترك حضراتكوا مع فاصل اغنية مصدع وعاوز حباية
انا مصدع مثرواى
قاعد على الوطن
والوطن بيعانى
ويقول احم احم
حزمنى اه يانى
هو انت صحيح وطن
ولا اونطة وطن تانى
رد عليا يا وطن
وصدعنى طول الزمانى
احلى صداع يا اخويا منك بنشوفه
متقولش انت جدع ولا بط مسكوفى
هيييييييييييييييييييييييييييييييه
يا عينى على طماطمك يا وطن
كل يوم ليها سعر وزبون
وانا يا خيبتى مليش تمن
اه اه اه اه منك يا وطن
صدعنى شوية شوية
ولعبنى على الفرديتين
خليك حونين شوية
صاحبك ضارب حبيييييييييييتين
هيييييييييييييييييييييييييييييه
فعلا اغانى مفرحة جدا
ويااااااااا خسارة الوقت اللى حجزه البلوجر على المحور الدماغى خلص
وهانكمل المرة الجاية
كان معاكوا ابوعلى شكل حياتك من اعلى نقط المحور الدماغى
هدف الحلقة
استدعاء المشاعر والاحاسيس السلبية يؤثر بشكل جوهرى على المحور الدماغى والحدق يفهم
ربنا يسامحك يا عم ..
مش كفاية السلبية اللي شوفتها النهاردة
علينا بالتغيير احنا نولع في الاوتبيسات طبعا بهزر
انتا مضايق عشان كل ربع او نص ساعة يجي اتوبيس
احنا عندنا كل 3 أيام يجي اتوبيس
لك تحياتي