خراب (3)

, الخميس، 10 يونيو 2010



هى الدنيا حصل فيها ايه
فى لحظة غاب فيها الضمير شاهدت من يأكل قوتى وتعبى
فقلت فى نفسى الساكت على حقه شيطان اخرس
 يجب ان اقاوم هذا العبث التخريبى الذى اضر بى ولا اكون من حزب الصامتين الماصى الشفاه
وقررت ان انصب كمين لمن كان وراء جرحى بهذا الشكل وعبث بمقدراتى
وبالفعل حدث ما توقعت فالشر لابد ان يقع ودخل من اكل قوتى الكمين
ودار بينى وبينه الحوار التالى
عجبك  منظرك كده ؟ تاخد حق مش بتاعك ليه ؟ هو مش حرام عليك؟
انت معندكش اسس ؟ مافيش عندك خوف على نفسك؟ فين اخلاقك؟
ووجدته يطأطأ براسه كأنه يعلن علامات الندم
ولكنى رايته ازداد شموخا" وقال
نعم تستحق ان اكل قوتك وتعبك وشقاك لأن من تعب واجتهد وخاف على قوته لابد ان يحافظ عليه ويؤمنه ويوفر له حدود الامان ويتسلح دائما بما يدافع عن قوته الذى يشكل حياته ويحفظها
وهل معنى انى تركت قوتى هكذا ان تلتهمه وتأخذه اين المبادىء التى كنت تتشدق بها
فتبسم قائلا  من ينشد انشودة الخراب  عليه ان يكتوى بنيرانها

والحياه دول يا صديق الكون

فقلت سبحان الله
فأر يأكل الجبنة الرومى بتاعتى  تدور على لسانه الحكمة
وانسان نسى نفسه

18 Response to "خراب (3)"

غير معرف Says:

هههههههههههههههههه
هو اعترف ؟
غريبه ...مافيش حد بيقول على نفسه انا حرامى بس المبادئ لسه فى منها جزء اهه
لا وكمان وقعت على راسك
شوف من حفر حفره للاخيه
كل جبنه رومى وانتا طيب
تحياتى

أنا - الريس Says:

لا حول ولا قوة الا بالله
------------------
فكرتني بجوز اختي ايام حرب العراق والكويت
شغال في الكويت في المجال الطبي
-----------------
والمهم بعد انتهاء الحرب كان فيه مكافئات للي قعدوا اثناء الحرب
---------------
اسمه نزل في الجدول
بعدها اتشطب واتحط اسم واحد تاني لسه راجع من السفر لأنه عارف مدير المستشفي
000000000000000000000000
الحياة ليست سهلة
ولكن ايضا عليك ان تحارب من أجل قوتك
وحياتك ..
كله الا الكرامة والشرف هكذا قال لي أبي

Doba Says:

أقولك الصراحة

أنا منبهرة

منبهرة من طريقة تفكيرك
ف كيفية إلتواء كلماتك للوصول للنتيجة المرجوة

فى كيفية التلاعب بالعقل وجذبه للتفكير والمعن والانتباه لعكس الواقع اللى الكل منجرف ليه بمساوءه

ف اننا نشن حملة شعواء للخراب ف حين اننا بنستنكر بمنطقية شديدة مساوىء جيلنا ومجتمعنا الحالى

حقيقى انا مبهورة بطريقة تفكيرك
وبكيفية تناولك للأشياء

أحييك لما تسطر
أحييك لفكرك
أحييك لشخصك

وحقيقى برافو
وللأمام دائما

هبة

-_- Says:

لو لم تطالب بحقك لن يطالب به احد غيرك

غير معرف Says:

ههههههههههه

طيب المهم انه وقع بس في المصيده :)

ففار الحكيم ده :)

تحياتي

كلمات من نور Says:

وما أكثر الشياطين المصابين بالخرس في هذه الايام .مليار وكام مليون؟؟؟؟؟؟؟؟؟؟

ربع سكان العالم !!!!!!!!!!!!!!!

ولا تعليق سوى جزيت عنا الجنة ورزقك الله سعادة الدارين ...قل آمين

زهــــراء Says:

سيدى الفاضل ابوعلى

اعتذر على تأخيرى فى التعليق على اخر خراااااااااب ده ..


هو لسه فى حاجه اسمها مبادئ فى ظل هذا الخراب الذى نحيا
كملة مباردئ دى اصبحت موضه قديمه اوى واضح انك مش متابع الموضوع وهى الفهلوه واللى تكسب به العب به
كل واحد بيحارب من اجل الحصول على قوته ولكن لكى اضمن قوتى لابد ان احافظ عليه ...

على فكره الواحد ممكن يقابل ناس بسيطه ويسمع منها حكمه تغير مجرى حياته

دمت فى حفظ الله ورعايته

Tarkieb Says:

الجبن سيد الاخلاق دي الحاجة اللي يحبها الفار..تحياتي على فلسفتك ...

richardCatheart Says:

شوفت ماتستهنش به وتقول فار

فار لكن عنده اهم اسس الخراب

مش ديما اننا نتعب ونجتهد دا كل حاجه

فى بردو اخر لازم نوصله لازم نحافظ على التعب ولا دى النتيجه

SHAPE YOUR LIFE (ABOALI) Says:

الى الشوكة الناعمة

ههههههههههههههههه
الله الله

جميلة جدا البسمة التى ارتسمت على وجهك

يا سلام لو تفتحى نوافذ حياتك بالبسمات ستاءتى لك الدنيا راكعة

تقديرى وربنا يهبك البسمة والفرحة

SHAPE YOUR LIFE (ABOALI) Says:

الى الريس
فعلا الا الكرامة
وكمان الجبنة الرومى دى حاجة تانية

اشكرك لاهتمامك بكل انواع الجبنة


تقديرى

SHAPE YOUR LIFE (ABOALI) Says:

الى دوبا

هما دايما كده اللى اسمهم هبة
بيكونوا لينا هبة تشجيع من الرحمن

يبعثون فى الحياه انوار الامل

وهبك الله الامل ووهب السعادة لك

تقديرى لوجودك هنا

SHAPE YOUR LIFE (ABOALI) Says:

الى شارم

فعلا يا انسان
طاااااااااااالب بحقك بقى

وبلاش تدخن سجاير مصرية
خليك فى المستورد

تقديرى

SHAPE YOUR LIFE (ABOALI) Says:

الى فتاه من الصعيد

اينعم اينعم

فئران الحكمة بدل من حكماء البشر

تقديرى لتوجداك المميز

SHAPE YOUR LIFE (ABOALI) Says:

الى كلمات من نور

اينعم
بس يكفى اناس صادقين تكون لهم القيادة

وحينها ينصلح العالم

اميييييييييييييييييييين لك ولنا

تقديرى العميق

SHAPE YOUR LIFE (ABOALI) Says:

الى زهراء

زهراء الحياه ليست بوتقة من النعيم المطلق او العذاب الاوحد
انما هى صندوق كبير
بامكانك النزول فى الصندوق واختيار ما يحلو لك ويريحك ويضع فى وجهك البسمة
ثم تخرجى من الصندوق

زهراء
هناك من يغوصون فى البحر فيستخرجون اللؤلؤ والياقوت والمرجان
وهناك من يغوص فى نفس البحر ويستخرجون
الثعابين واسماك القرش وهو هو نفس البحر

فلا تجعلى من حولك يكونون لزهراء حاملين رايات الى الخلف دور
ولكن اجعلى نفسك انتى فى مقدمة للامام دور


وهبك الله اليقين ووهب نفسك له


تقديرى

SHAPE YOUR LIFE (ABOALI) Says:

الى تركيب

مرحبا بك من جديد
لتضع بقلمك اشياء تحتاج تركيب
الفئران حاصرونا وبنى الانس تركيب
ايعجبك هذا ؟
ام فى الجبن سر يحتاج تركيب


تقديرى

SHAPE YOUR LIFE (ABOALI) Says:

الى قلب القطة

اينعم اينعم فئران احتوت على الحكمة
وبشر لم يحافظوا عليها

تفتكرى الحل اننا نزرع الجبنة ؟

تقديرى لك يا انسانة