جرب الحياه

, الجمعة، 25 يونيو 2010



جاء بجبج  وفى يده كيس لب ابيض لزوم التسالى
 تعلو شفاتاه  الحزن وراسه منبعجة وقفاه متعلم عليه
وقال لى يا بابا انا
 مش سعيد
حاسس انى الحياه ملخبطة
باشعر بالملل والزهق بسرعة
وكمان نفسى احقق حاجات كتير
تفتكر يا بابا لو اتصلت بالمفتش كرومبو  هايكون عارف حل لمشاكلى الكبيرة دى ؟
مش عارف يا بج بج جرب يا ابنى وشوف
قالى طب هات المحمول بتاعك اتصل بيه
معلش يا بج بج رصيدى دايما باخلصه فى الشغل
جرب كده من محمولك انت لسه واخد مصروف
قال طيب هما دول الابهات اللى بيساندوا اولادهم
قولت معلش بقى زمن وحش دلوقتى كرومبو هايظبطك
ماشى يا بابا
تخيل  يا بابا عامل سلسلة خطوط  منها خط النصايح  الراجل ده جبار
فاتصل بج بج
ودار الحوار التالى
ان كنت تريد خط المسابقات اضعط الرقم واحد
ان كنت تريد خط الحلول اضغط الرقم اثنين
ان كنت تريد خط الفرفشة اضغط الرقم ثلاثة
ان كنت تريد خط النغمات اضغط الرقم اربعة
ان كنت تريد خط احدث الاغانى اضغط الرقم خمسة
ان كنت تريدخط الالعاب السحرية اضغط الرقم ستة
ان كنت تريد خط احدث القفشات اضغط الرقم سبعة
ان كنت تريد خط نتائج الماتشات اضغط الرقم ثمانية
ان كنت تريد  خط الموضة اضغط الرقم تسعة
ان كنت تريد خط النصائح اضغط الرقم عشرة

فضغط بجبج رقم عشرة
فجاء صوت مسجل النصحية الاولى
ابدء اولا بخط الفرفشة  خليك فرفوش
ثم ثانيا دلع نفسك بخط الاغانى والفيديو كليب متع نظرك
ثم ثالثا كام قفشة كده لزوم القهقهة
ثم رابعا لعبة كده علشان الوقت والملل
ثم خامسا روق نفسك مع بنطلون ساقط روش فى خط الموضة
ثم سادسا نغمة جديدة طحن لزوم الانعرة علشان انت الشاب الهئ بئ
ثم سابعا خلى عندك علم ومعرفة واعرف نتائج الماتشات
ثم ثامنا"  ساعد نفسك على التفكير العميق بكام سؤال علشان تتدخل المسابقة
( من بنى الاهرامات ؟ اليسا – نانسى – المثريين )
ان لم تعرف الحل اتصل على خط الحلول واحنا نظبط ع طول

وانقطع الاتصال فجاءة وتتدخلت شركات المحمول
عفوا لقد نفذ رصيدكم ويرجى اعادة الشحن
ها يا بج بج رد عليك المفتش ولا لسه ؟
رد يا بابا رد مقنع بليغ متمكن متعمق ذو رؤية ثاقبة
 وقال ليا معلش يا بج بج اخوك خرمان وجيبه فاضى وانت لا يرضيك كده المدام عاوزة تسافر هاواى
والرصيد عندك لازمنى            
وانت عارف بقى الشيىء لازوم الشيىء
وعلت اصوات القهقة  وتبسمت اسنانى
وقولت يا ابنى
ضاع الرصيد وضاع الوقت وضاع المجهود وكل ده حياتك

فقولت له اتعرف كلمة الجرب
فقال ايون يا بابا ده مرضى جلدى يأتى من قلة النظافة  والمريض به
يهرش فى كل جسمة ويشعر بأكلان وخصوصا بالليل بيزيد الهرش
فعلا يا بج بج عندك حق هو ده فعلا المرض
اللى بتشعر بيه يا بج بج  من احساس انك مش سعيد وحياتك ملخبطه
انك زهقان وعندك ملل
ده نتيجة انك عندك جرب حياه
الحياه يا ابنى تحديات وصعوبات وجهد وعرق لما تشعر فيها بالملل والزهق  تبقى محتاج نظافة  وترتيب اوراقك من جديد وشحن بطاريات الطموح والامل مع وجود هدف فى اى شيىء فى حياتك
افتكر يا بج بج كلمة الجرب وافتكر كمان لو وضعنا حرف الألف بعد حرف الراء
هايكون فيه كلمة جديدة اسمها الجراب
كلنا محتاجين جراب فى ملابسنا وفى  انفسنا لما ندخل ايدينا فى الجراب ده
نفتكر رحمة ربنا  نفتكر ذكرياتنا الحلوة نفتكر بسمة جميلة نفتكر ساعة نجاحنا
نفتكر صديق مميز نفتكر حضن ام رائع نفتكر اخ مساند
نفتكر  اننا انسان ربنا خلقه وليه حكمة فى وجوده على الارض

يلا بقى اختار لنفسك
اما تتصل على خط جرب الحياه
او تتصل على خط جراب الحياه

طيب يا بابا هات محمولك انصح المفتش كرومبو
ههههههههههههههههههههههههههههههههه
وفى تلك اللحظة التى هزت القلوب 
يستقيظ دم الغزال من النوم بابا لوسمحت انا عندى مشاكل كبيرة جدا  
خير يا دم الغزال
اخويا بج بج عنده جرب حياه وانا خااااااااااااااااااااااايف على نفسى 
ههههههههههههههه 




26 Response to "جرب الحياه"

أنا - الريس Says:

بعد السلام
ببعت سلام لكل
من بج بج ودم الغزال
والوالد طبعا .
حياتنا بقت فوارغ داخل فوارغ
ينصب علينا باسم الفوز والفلوس
والناس الهطل مالي جواربهم
يله
مسير مصر يصبها جرب التقدم يوما ما قادر ياكريم .

عندما نحب Says:

الله عليكيا ابو على
لازم فعلا فى وسط ازماتنا ندور فى جراب حياتنا
على صديق ساعدنا او حضن دافى ضمنا او ايد حنينه مسحت دموعنا

كلامك كالعاده مميز و ذو معنى

تحياتى

صيدلانيه طالعه نازله سابقا
حاله ملل حاليا

لــــ زهــــــراء ــــولا Says:

سيدى الفاضل ابوعلى
-*-*-*-*-*

شدنى العنوان جدا جدا

حوارك مع بج بج تحفه بجد

فى حياة كل منا هناك اشياء فى الجراب قد ننساها فى وسط الزحمه وعتمة الحياه ولكن حينما نجلس مع انفسنا حتى مجرد لحظات من الهدوء والسلام النفسى نجد اننا نتذكر نصيحه من صديق او كلمه من قريب او ضحكه من زميل دراسه ونجد ان الجراب به الكثير من الاشياء الرائعه بل الاكثر من رائعه

كلام حضرتك فى كل مره اتعلم منه الككثير والكثير من المعانى التى تعطى امل فى غد افضل ان شاء الله

حفظك الله

زهـــــــــراء

-_- Says:

هههههههه
بج بج اسم جامد جدا

القدر و انا Says:

ابو على
بجد اسلوبك فى الحوار مميز يجمع ما بين البساطة والحكمة
سيناريو يمتلئ بالجاذبية
وحقيقى باتعلم منه ازاى اخاطب ابنى الذى يقترب من التاسعة علشان افهمه كتير من الامور التى تشد وتحير اولادنا اليوم
الكارثة ان اعلانات المسابقات وكورومبو وغيره تشد الاولاد بصورة يصعب مقاومتها وفعلا لازم نعمل لهم غسيل مخ يومى لكل المستنزفات دى
تحياتى لبجبج ودم الغزال
تحياتى لفكرك الراقى واسلوبك المميز

غير معرف Says:

طيب محتاج كورمبو في ايه وعنده اب زيك :)

ربنا يبعد عننا كل الامراض الجلديه والعقليه يا رب :)

تحياتي

لــــ زهــــــراء ــــولا Says:

مازلت اقرأ في شكل حياتك لكي اتعلم فيزداد فكري كل يوم وتعمقي للأشياء
ونظرتي للامور اصبحت اكثر عمقاَ مع معلمي الفاضل الفيلسوف الكبير ابو علي ... كلا منا في الحياة محتاج يجرب الحياة بشكل مختلف بعد الكثير من التنظيم والترتيب للاوراق ... لكلا منا محتاج جراب خاص به يجمع بداخله ذكرياته المفرحة واماله ونجاحاته ...شكراَ الف الف شكر على كلامك الاكثر من رااااااااائع

لولا

ليله شتاء Says:

السلام عليكم

الأن عصر المسابقات وشبح كرومبو وغيره لازم يكون فى جرب الحياة

******
قصة جميلة جداا

تحياتي

Doba Says:

متابعة


صامتة


مبهورة


مستمتعة


للغاية


تسلم يا غالى
هبة

richardCatheart Says:

ههههههههههههههههههههههههههه

والله من اجمل اللى بقرئه بجبج ودم الغزال وابوهم

لو مافيش عقلزى نااااااااااااس كتير بالهبل

هايفضلو متخيلين ان الحل عند كرومبو

وهايخلصو رصيد الحياه كلها

استسهال فكره الفانوس السحرى اللى هايحل كل المشاكل فى لحظه
لاننا محباطين ومعندناش قدره للاسف

تحياتى يا انسان

mohamed ghalia Says:

انا جاى اسلم وماشى
حفل توقيع كتاب هل تبحث عن السعادة للكاتب محمد غالية
بمكتبة عرابى المهندسين وذلك يوم يالسبت الموافق 3/7/2010 فى تمام الساعة السادسة مساء

كلمات من نور Says:

تصدق يا أبوعلي .رصيدي نفذ الليله دي مرتين وجالي صداع من الموبايل ومكالمات اتصالات علشان يجيبوا الانترنت وبرضه مجاش .....انا عملت العقد وبس يبعتولي اول فاتورة وحاروح ادفع واخلص كل معاملاتي وانقل في شركة تانية .من يوم ما اشتروا شركة الانترنت الله يهديهم بوظوا كل حاجه ...جرب الاتصالات عبر الموبايل والانتظار وسماع اعلانات عن اتصالات بالعافيه وكل دقيقتين واحده تطلع : عزيزونا العكميل جميع الخطوط مشغولة انهم يقومون بخدمة العديد من العملاء يرجى الانتظار قليلا وجرب الاعلانات بقى ......انا بحب جراب الحياة ربي يكتر ما بداخله من خير وصلاح وتقواه ...قول آمين آمين آمين

brightlyanny Says:

ازيك ابو على؟؟

كلماتك كلها حكم والله انت اب تتوزن بالدهب ؟؟

بو ست هايل مش عارفه اعلق اقول ايه بس (جراب الحياه )دى حاجه هايله لو فكرنا فيها بعمق هتبقى افضل بكتير من الدكتور النفسى اللى كنت بفكر ازوره...

انت دايما كده كلماتك ونصايحك كلها (امل وحياه)...

تحياتى

SHAPE YOUR LIFE (ABOALI) Says:

الريس
فعلا مسير الحال يتعدل مادام حنا فينا بيطبق اللى بيعمله وبيحاول ينور لغيره طريق وبياخد بيده ويشجعه

ان شاء الله تبقى الدنيا احسن

تقديرى

SHAPE YOUR LIFE (ABOALI) Says:

الى حالة ملل

هههههههههههههههههه
وليه ملل بس يا صيدلانية
ان شاء يهبك الله الملل من المعاصى والقرب من حسناته
قوووووووووووووولى امين

تقديرى المستمر

SHAPE YOUR LIFE (ABOALI) Says:

الى زهراء
يا قهلا يا قهلا بالناس الكمل
والله يا زهراء فينا الكثير من الحلاوة
وكمان نقاوة
بس ساعات ساعات بنبص للوحش ونمشى وراه

ونهيىء لانفسنا ان الدنيا بقت زرقة
وهى فى الحقيقة ملونة

ان شاء الله غير
بيعجبنى تحليليك للموضوع من اول العنوان
الى هدفة
وده يدل انك انسانة ماشاء الله واعية
ربنا يديم عليكى الخير
وتذكرى اننا كلنا من طين
لا فضل لاحد على احد
وكلنا نتعلم


تقديرى المستمر

SHAPE YOUR LIFE (ABOALI) Says:

الى شارم
فعلا بج بج اسم لذيذ تحس فيه بالبجبجه

تقديرى

SHAPE YOUR LIFE (ABOALI) Says:

الى القدر وانا
يا فندم اشكرك على رايك الجميل المشجع
اولادنا فى تتطور والاباء عليهم التطور ايضا علشان نقدر نرد عليهم بنفس طريقة كلامهم

وده فى الغالب لن ياءتى الا بفهم طريقة تفكيرهم
وسنة هدوء وصبر مننا

تقديرى لك المستمر

SHAPE YOUR LIFE (ABOALI) Says:

الى فتاه من الصعيد

كلنا محتاجين يا انسانة
مليش دعوة انا عاوز كرومبوووووووووو

ههههههههههه

تقديرى لوجودك الدائم

SHAPE YOUR LIFE (ABOALI) Says:

الى لولا

ايه يا لولا الكلام الكبير ده
انتى يظهر اخطئتى فى العنوان وبتتكلمى عن حد تانى

كلنا فيه حته كده
وانتى فيكى حته كده
وغيرنا فيه حته كده

كل اللى بنعمله اننا بنجمع الحتت كلها
علشان نفهم كل حته بس بوعى اكثر

ايه رايك انتى بقى فى الحتة دى

عروستى
ههههههههههههههههههه

تقديرى يا انسان

SHAPE YOUR LIFE (ABOALI) Says:

الى ليلة شتاء

اشكر لك الحضور الاول واتعشم ان لا يكون الاخير

لاننا فى الحر ده محتاجين ليالى شتا

ولالالالالالالالالالالالالالاايه

تقديرى الكامل واشكرك لرايك

SHAPE YOUR LIFE (ABOALI) Says:

الى دوبا

ولييييييييييه الصمت طيب
خلينا نتكلم شوية عن الامل ويجرنا الكلام الى الياسمين وناس كتيرة قاعدين يقولوا كلام ذو فرحة وكلام احيانا انين بس احنا لازم نقول ونقول يا رب هبة منك للصالحين والعفو يوم الدين
يااااااااااااريت يا هبة تقولى امين


تقديرى الكامل

SHAPE YOUR LIFE (ABOALI) Says:

الى قلب قطة

نخلص رصيد الحياه
فعلا والله عندك حق
الكلام فى الهايف وقلة المضمون بيخلى العقل فاضى واحيانا ممكن يكون مجنون
بس هو ده الحال علشان يكون فيه حكماء يرفعوا لواء النور ويرشدوا الناس للخير والعمل المصون

تفتكرى هو ده رايك

تقديرى الكامل
وكل سنة وانتى طيبة ودايما انسان صالح ناضر

SHAPE YOUR LIFE (ABOALI) Says:

الى الغالى
فين مكتبة عرابى دى
المهندسين واسعة يا صاحبى
ومبروك مقدما

تقديرى

SHAPE YOUR LIFE (ABOALI) Says:

الى كلمات من نور

امين امين امين امين
يصلح الحال ويملاء الجراب صلاح وتقوى ويقين ومحبة وقرب وهنا وفرحة

ليكى ولينا يا انسانة

قوووووووووووولى امين
تؤتؤ
مش سااااااااااااااامع
قوووووووووولى بقى


تقديرى المتكامل

SHAPE YOUR LIFE (ABOALI) Says:

الى برتلى

يا قهلا يا قهلا

الحمد لله موجود كاين عايش

يارب تكونى فى امان وصحة وكل ضفائر الحنان

عندك حق افضل كتير من الدكتور النفسى
وحاجة ببلاش كده


تقديرى لرايك المحترم ولوجودك هنا دايما