خطة بحثية

, الجمعة، 26 فبراير، 2010



جمعت العائلة الكريمة ولبوا جميعا" دعوات الحضور

زجزج افندى وبج بج المشهور بمجلة عض نفسك ودم الغزال وام العيال

المهم قلت لهم انه سوف يقوم بزيارتنا شخصية دينية عظيمة الاسبوع القادم

ايه رايكم يكون الاستقبال ازى وفى نفس الوقت الاستعدات للزيارة

فقالت ام العيال

من وجهة نظرى انك تعدل من نفسك و تبطل فلسفة كده وتساعدنى فى شغل البيت شوية

بدل الكتابة اللى هاتاكل نفوخك دى

على الاقل دى صفة حلوة اقولها للشخصية العظيمة دى

ضحكت كده وقولت يا باشا من عيون القلب

انتى عاوزانى يعنى انظم وقتى واخلى جزء منه جنبك وده طلب منطقى ماشى الكلام

اى حاجة تانية

قالت انت مالك كده هادى هادى ومطيع

كل ده علشان الزيارة اه منكوا يا رجالة

قلت يا ام العيال انتى كيان البيت كله

ولما حتى استغل الزيارة واتغير ده برضوا خطوة ايجابية

قاااااااااااالت ماشى

طب انتى بقى استعدادتك ايه

قالت بص بقى

هو مادام انه شخصية دينية وعظيمة زاى ما بتقول

يبقى نرفع شعار انى الدين اهم شيىء عندنا طول الاسبوع ده

بس كده يا ام العيال الاسبوع هايبقى نفاق ونعمل زاى الحكومة

احنا عاوزين لو بنعمل حاجة مش متوافقة مع اساس دينا

نصلحها بس يكون عالطول مش الاسبوع ده بس

قالت ما انت عارف يا ابو العيال نور ومهند ورتانا سينما والنيل للدراما واسكار للدراما

وام بى سى والحياه مسلسلات وووو

دول بحبهم اقوووووووى

ماهو يا ام العيال ممكن تحبيهم طبعا

بس لو كان فيه استفادة كده ومش مضعين الوقت

قالت عندك حق هما بياكلوا الوقت فعلا

وكنت زمان بعمل شوية تريكو واشوف مجلة حواء بتاعة التفصيل

لكن منهم لله بقى شاغلونى عن كل ده

يعنى انتى هاتبطلى افلام ودراما

قالت نبطل على الاقل افوق ليك شوية مش كده ولا مش عاوز

قلت طيب طيب امرنا لله فوقى فوقى يااااااااااااااااااارب قوينا

وانت يا عم زجزج باشا

قال يا بابا بعون الله هاشرفك اصلى ناوى اعمل خطة بحثية علشان مستقبلى اكون مخطط له صح

قلت استغفر الله خطة بحثية وهى الشخصية الدينية هاتحتاج خطة بحثية

قال يا بابا هو ده الجديد

الشخصية الدينية لازم تشوف انى

الدين دافع للتفوق والتغلب على الصعوبات من خلال الفكر المبتكر وتحديد هدف

لينا علشان نوصل لربنا واحنا خلفاء بجد

مش عيال خيخة كده زاى االجيل المايص بتاع البنطلونات الساقطة

قلت جباااااااااااار يا واد يا زجزج من يومك

وانت يا عم بج بج

قال بص يا بابا هابطل فى الاسبوع ده

ضرب العيال فى المدرسة واعاملهم كويس

ولما انادى على اى حد هاقوله باسمة بدل ما اغيظه واجتهد فى المدرسة ازيد

واحافظ على مواعيد الصلاة

لاءنى بجد كنت مقصر

امممممممممم جميل يا بجبج بجد

بس هاتستمر بعد كده ولا اسبوع وخلاص

قال يا بابا الصح مافيش احسن منه بس الواحد ساعات بيشتغل ضميره ويخدره

صح يا بج بج صح

وانت يا دم العزال

قال انا يابابا هابطل ارمى ورق من البلكونة

وكمان هاكنس امام البيت وانضفه كويس والسلالم كمان وهاساعد ماما

يااااااااااااااااا سلام عليك يا دم الغزال رائع رائع

وفى نفس واحد قالوا وانت يا بابا

قولت

كل واحد مننا محتاج تغير وكلنا جوانا طاقة

علشان نتغير بس ساعات بنحس جوانا احساس اننا مهزومين ومافيش امل

بس لو شوفنا نفسنا كويس واننا نقدر نتغير هانتغير

لاءن احنا معانا المنهج الصح

اللى بيحدد طريقنا بس احنا بنحاول فعلا نشتغل ضميرنا ونبكى على الاطلال

وانا هاوعدكم انى هاكون اول واحد اتغير

بعد اسبوع رن جرس الباب

روحت فتحت الباب والعيال ورايا كلهم لهفة يا ترى مين الشخصية

ولما فتح الباب

نور ورحمة هلت عليهم

قال ليهم انى

رسول الله

يااااااااااااااااااااااااااااااااااه

يا رسول الرحمة

نشتاق لرؤياك

يعجزالحرف ان يعبر عن فياض الاشتياق

تنساب منى دموعى حينما يهل سناك

يقولون ميلاد احمد قد اهل هناك

فيطير قلبى منطلقا يتمنى رؤية محياك

هل تحتضنى و تجعلنى المس يداك

يااااااااااااااااااااااا رسول النور

سنتك وقراءنك ضياء

هما العزة والرفعة و رمز الاقوياء

ياااااااااااا رسول الكون

اشتاقت لرؤياك الكائنات

كم تزينت اعين المحبين بالبكاء

واستمتعت الدموع بذكر خاتم الانبياء

ان كنت يا احمد احتاج فخرا وتيها

فيكفينى يا محمدا

انك رسولى حتى الفناء

صلى عليك الله يا ايها الرسول الانسان





وهنا لما فتح الباب

قال لى يا ابو العيال ظبطت بيتك ولا لسه

فرد زجزج

يااااااااااااااااااااااااااااااااااه الخطة البحثية

كانت محتاجة نور نور نور نور نور نور

ويكفى انى سوف اراك فى منامى يا نور كل الاوقات







على جنب


اتى عليا ميلادك يا احمدا (ص)

و طيات الالم تطوينى ولكنى

سأكتب عناوين من صبرك وحلمك على جبينى

سأجعل يا احمدا (ص) الالم متعتى ويقينى

وسأكون ذلك العبد الصابر طالما احتوت الدماء شراينى

وميلادك يا خير من وطأ الثرى

ميلادا" لنفسى

والالم سينزوى هناك كابيت عنكبوتى

تنساب من انسجته حبى لك ورفعة دينى

عناق الغضاريف

, السبت، 20 فبراير، 2010


داهمتنى الام ظهرى فتبسمت

فقلت له هيهات هيهات

اهبت عليك حنين الذكريات

فضحك فى همسة

فزاد الامى

قلت هل ابقيت ضحكاتك صامتة

فقال لا تخف انه تعانق الغضاريف

قلت يااااااااااااا لطيف يا لطيف

ادعوها للعناق بعيدا بعيدا

فقال سبحان سبحان

امن العناق انت الان تخاف

قلت لقد سمعت ان بين الغضاريف

مواد مثل سائل البيض

تخفف من عشق العناق

فعلت اصوات ضحكاته

وانفعلت الامى فصارت بركان

وخفتت الضحكة

وتبسم قائلا

ايعجبك هذا الان

نعم كانت تلك المواد موجودة

ولكنك كنت تظن انك فرعون بلا سلطان

فقلت تؤتؤ تؤتؤ عيب عيب

انت كده بتغلط فيا وانا زعلان

فضحك وضحك

وقال معلش يا مان

ده جزاء طول اللسان

كنت تهيم هنا وهناك

فتأكَل ما بين غضاريفك

وجئت تشكو الان

ونسيت روح نفسك

واشتياقها الى صوت الاذان

وجلست طويلا طويلا

تخطط هنا وهنا

ونسيت انك انسان

لم استطع الكلام

فأذا بحقنة كبيرة

تدعونى وتقول تعالى يا هومام

قلت استغفر الله استغفر الله

اتكالب عليا اعدائى

فانغرست الحقنة وقلت اى اى

فسمعها القاصى والدانى

واقررت معترفا" انى غلطان


نظرا لهذه الالام وانعكاسها على ادائى الانسانى فى الحياه ساأغيب ردح من الزمن

يعقبه تلك المواضيع



لقطة كيان

كشك التقبيل

سرقة النفس

البوسة بعشرة جنيه والحاسبة بتحسب

زغزغنى تعرفنى

اتبرع بصوتك

عندما تتطير الاسماك

عندما يغرق الماء

لولو فى الجامعة

اوباما والدلاى لاما

الملابس الرش والبنطلون الكراش

منحنى الرفاهية كرشو

كيف تشتغل ضميرك يا معلم

الضحكة الصفرا والكلورة

حتى البطاطس احمرت

اخلعنى شكرا

هى راماتك كام ؟

ترمس صينى

زجزج افندى

فن الكهربا

قلم مكسور

روقان بجبج ودم الغزال

شبس وشبسيكو

اللعاب بلع البلعوم

هى البرداعة بكام ؟


استودعكم الله وعلى كل من سيعلق اختيار موضوع لكتابته

ان شاء رب العباد وكان عناق الغضاريف قصيرا

رااااااااااااااااااااااجع ليكوا يا مدونين بلدى بعووووووون الرحمن

ناس الفضاء

, الخميس، 18 فبراير، 2010



"الذين يلمزون المطوعين من المؤمنين في الصدقات والذين لا يجدون إلا جهدهم فيسخرون منهم سخر الله منهم ولهم عذاب أليم )
سورة التوبة ( 79 )


الناظر الى ما يحدث هذه الايام له الحق ان يتعجب من حال الناس

فغياب المبادىء وتدنى سلالم الاخلاق يدعو يقينا للدهشة

حيت ان المبادىء والاخلاقيات والتربية هى الدعائم التى يتم عليها بناء اسس الامم وحاضرها

وعلى الرغم من تلك الحالة التى تقترب بنا الى حالة الفزع والخوف على حياتنا

والنظر الى اطفالنا على ان مستقبلهم القادم سيكون حالك السواد

استرعى انتباهى اثناء قراءتى للاية السابقة فى سورة التوبة

سبب نزول تلك الايات

وتعجبت اشد العجب من ذلك

لقد حث المصطفى صلى الله عليه وسلم على الصدقة

فجاء عبد الرحمن بن عوف يقال بمبلغ كبير او عدد من اوقيات الذهب

فقال الناس بعد معرفتهم بتلك الصدقة انه مرائى اى محب للرياء ويريد من الناس ان يقولوا كذا وكذا

وفى نفس الوقت اتى رجل فتبرع بصاع من تمر

فلما علم الناس بذلك قالوا ان الله غنى ذلك الصاع

ياااااااااااااااااااااه على اقوال الناس سبحان سبحان

لم يعجبهم من تصدق بالمال الوفير وقالوا مرائى وهو من انه عبد الرحمن ابن عوف احد المبشرين بالجنة

ومن جاء بقدر جهده وما انعم الله به صاع من التمر لم يتركوه

اين كانوا تلك الناس كانوا على عهد الرسول صلى الله عليه وسلم

وها نحن اليوم

نجد الاحداث تتكرر والسؤال الذى تتطرحه الاحداث

هل انزوى عبد الرحمن بن عوف وابتعد وقال لن اتصدق

هل قال الرجل الذى تبرع بالصاع لن اكرر التصدق

يااااااااااا الله جاءت الاحداث عكس ذلك

تصدقوا واستمروا فى فعل الخيرات والصالحات وانتهزوا كل فرصة ليقتربوا من الله ويعلنوا ان القلوب مادامت عامرة بتقوى الرب والاخلاص له فلا يضيرك كلاب تعوى هنا وهناك

ما حدث اليوم هو انسحابات وروح من الانزواء حدثت لمن يحرص على رفعة الدين وتطيبق الاخلاقيات

والملعب اصبح فارغا للغوغاء ليعلو بصوتهم وافعالهم

يا محب لربك ارفع هاماتك وانطلق

يا محب لرسولك اقتدى به وانطلق

يا محب لجنات الخلد اعمل لها وانطق

يا محب للفلاح فى الدنيا حدد الهدف وانطلق

ارفعوا هاماتكم واقلامكم واجعلوها سلاح يمن تبتغوا رضا الله يا لا تهنوا ولا تحزنوا وانتم والله الاعلون

يا مدونين اجعلوا ما تكتبوه عنوانا للصفاء للخير للوحدة للعمل للكد للجهد انقلوا كل خير تفاعلوا مع كل فرح

كونوا قاطرة للغد تحس على كل الاخلاقيات والمبادىء ارتفعوا بذلك الوجدان ليحلق هناك بعيدا"

كونوا نسرا

كونوا اسودا

كونوا طيور

كونوا صقورا

كونوا بنى الانسان كما ارد الله

يا من تركتم التدوين لبعض الجهلاء اعلم ان الجهلاء قد زادوا بأنسحابك

يا من تركتم الاوطان اعلم انك انت انت الوطن انت ربيع حياته انت اليد التى تبنى

يا من ملىء اليأس ربوع حياته تذكر رب حننان مننان بيده مقاليد الامر له الحكمة والقدرة خلقك قويا" ابيا

سجد لخلقك الملائكة باءمره وسخرت لك الكائنات بسلطانه

فكن له العابد يكن لك الرب الوهاب

واذكر نفسى قبلكم لن ولن يأتى أناس من الفضاء لنتعامل معهم


ولن يخرج من البحر موز يقال له سمك الا اذا جعلته انت كذلك

الفروالة اكلت السكر

, الثلاثاء، 16 فبراير، 2010



يا سلام يا سلام دخل عليا الواد زجزج وانا متلبس

والحقيقة كنت مكسوف وفى غاية الحرج الادبى

وانا اغتصب يوسف افندى وانتزع ملابسه

واجرده من تلك الثياب التى يتحلى بها ذات اللون البرتقالى

ثم تبدء اناملى فى معانقة تلك الفصوص ذات الجمال المبهر

وتحتضن اناملى الفص تلو الفص

متأملة ذلك الرونق فى اكتساء ذلك الفص بشعيرات والياف

تحمى ما بداخل الفص سبحان سبحان

ويسيل اللعاب منتظرا" فى لهفة اكمال عملية الاغتصاب فى مشهد تقشعر له المعدة

المهم عشان ماتقولوش عملية اغراء

الواد زجزج شاف المشهد بحذافيره

واذ به يقول ماكنتش برتقالة يوسف افندى يا بابا

ولا انت بتغظنى يعنى وتستميل مشاعرى فى الاكل

تعرف يا بابا

ان فعلا اول واحد ادخل النوع ده من البرتقال فى مصر هو يوسف بيه افندى

واتحرف بقى الاسم الى اليوسفى او يوستفندى

قلت ماشى يا عم متشكرين على المعلومة الجامدة

قال علشان تعرف بس ان يا بابا كل لما نقرء نتعلم ونفهم والمخ ده يشبع

ماهو يا بابا المخ والعقل غذاه القراءة والمعرفة

قولت يا سلام يا مثقف انت

المهم كنت عاوزة حاجة منى قال

يا بابا الموضوع اللى هاكلمك فيه ده بالغ الاهمية

واحتمال نكون مجلس هضم غذائى لبحثه

قولت اوعى يا واد تكون بتقصد طريقتى فى اكل البرتقالة

انت عارف ابوك لازم يشوف حكمة ربنا فى خلقة ويشكره ويتاءمل كده

قال متخفش يا بابا سرك فى قلب عم يوسف

قولت يوسف مين قال يوسف افندى

قلت اه اه اطمئنيت يا بنى (عيال سبحان سبحان)

ايه بقى الموضوع قال

بص يا بابا ماما اشترت فروالة

اكلت الفروالة لقتيها ماسخة جدا تصور مع انها المفروض العكس

المهم يا بابا وضعت عليها السكر

وكانت المفاءجاة بقى يا بابا المذهلة

قلت ايه خضتنى يا واد

قاااااااااااااال يا بابا منظر لا تتخيله الفروالة اللى كنا فاكرين كلنا انها على خلق كريم

يا بنى وقعت قلبى قووووووووول

الفروالة يا بابا اكلت السكر

اوووووووووووووووووووووووووه اكلت السكر الفراولة ماتقولش

صدقنى يا بابا فى فمتو ثانية زاى ماقال العالم احمد زويل اكلت السكر

قلت مهو ده شيىء طبيعى قال تؤتؤ

ده معناه انى الفروالة حسة بالذنب اللى عملته

علشان كده بتكفر عنه قلت بلاش فلسفة بقى يا زجزج

قال صدقنى الفروالة المفروض تكون مسكرة

بس نتيجة انها كانت جعانة اكلت السكر

قلت اممممممممممممممممم

وانت تفسيرك ايه لكده

قال يا بابا انا اللى باسالك ليه الفروالة بقت ماسخة كده

يا زجزج بتقلب عليا مشاعرى اللى بتوجعنى

بص يا زجرج الارض هى الارض اللى كانت اللى بتطلع الفروالة المسكرة زمان

وكان الطعم تحفة ورائع

بس لما استعجلنا طرح الفروالة وبقى فيه تهافت فى البيع بسرعة

حدث اضطراب فى الزراعة و واضفنا الى الارض اشياء تسرع جمع الفروالة

علشان كده نضجت على سرعة ومش فى وقتها فكان طعمها ماسخ

لكن اللى بياخد وقته وبيكون فيه كد وتعب ومجهود

وبخطوات منتظمة بهدف بتكون نتيجته

اتقان وتاءثيره رائع

علشان كده يا زجزج

لا تستعجل الحصول على النتيجة فى حياتك

وعيش حياتك بخطوات ونظام وهدف مهما كان حال اللى حواليك كفاية رضا ربنا عليك

وده بدل الفلهوة والتسرع المنتشر

علشان يكون ليك طعم وكيان فى حياتك يا بنى

بدل ماتطلع انت كمان ماااااااااااااااااااسخ

وتاكلك الامراض

قال يا بابا انت تستحق تصفيق حاااااااااد

وانا قولت وانت تستحق انى اكلك

يا بابا يا بابا انا مش يوسف انا زجزج ابنك

استنى استنى يا واد

بسم الله الرحمن الرحيم

امممممممممممممممممممممممممممممممموه (دى بوسة وش بيغمز)

مُت صحيت

, الأحد، 14 فبراير، 2010


ٌمُت صحيت


الله الله بنات امامير شباب صاعدين خضرة جميلة

هوانا فين فين فين

فى الجنة

تؤتؤ تؤتؤ

انت فى حديقة الازهر


مُت صحيت


دخان دخان تفاح تفاح اناناس اناناس ضباب ضباب ضباب ناس ناس

هو انا فين فين فين

فرن بهية

تؤتؤ تؤتؤ ده دخان الشيشة يا اهبل


مت صحيت


مخنوق حران متضايق

هو انا فين فين فين

مدفون

تؤتؤ تؤتؤ فى اتوبيس قطاع عام يا مغفل


مت صحيت


ام احمد ام جميل شلوت هنا هدوم بتطير


هو انا فين فين فين

فى القلعة

تؤتؤ تؤتؤ ده طابور العيش يا مكسر


مت صحيت


ضرب ضرب ضرب اصوات اصوات

هو انا فين فين فين

فى المعتقل

تؤتؤ تؤتؤ مراتك بتنادى عليك يا صُغير


مت صحيت


مش واحد ولا اتنين دول قوة ثلاثية حرام حرام حرام

هو انا فين فين فين

افغانستان

تؤتؤ تؤتؤ دول زجزج وبيج بيج ودم الغزال يا معلم


مت صحيت


قايم نايم مفقود تايه باسم حزين مربوط

هو انا فين فين فين

فى الثانوية العايمة

تؤتؤ تؤتؤ انت فى ستى ستارز يا مقشفر


مت صحيت


شوفت انسان معاه كيان
وكيان نفسه يبان
يصرخ يقول يتكلم
يعرف يتعلم ينادى
يتألم يفرح يقول
انا انسان معاه كيان
وكيانى ثانية لحظة دقيقة
ساعة يوم شهر سنة
ويمكن اكون فيها انسان


مت صحيت


ياااااااااااااه رحلة كل ده فى الاشارة وانا راكب العربية


هاكمل نوم بقى

هو انت جاى معانا ؟

, الجمعة، 12 فبراير، 2010



دخل دم الغزال على ابوه ( اخو زجزج وبجبج فى البوست الماضى )

وقال له

ها يا بابا هاتجيب ايه لماما فى عيد الحب ؟

دبدوب احمر ولا وردة حمراء

ضحكت وفى سرور واخذت دم الغزال لصدرى

وقولت انت رايك ايه ؟

قال والله يا بابا ماما تستحق كتير

كفاية انها بتستحملنا كلنا وساعات باشيل الغطا من عليا علشان اخليها تغطينى تانى وباكون مبسوط اوى

قلت يا سلام عليك يا واد

طب وتفتكر فيه يوم واحد يعوض ماما عن كل ده

قال هو اليوم يعتبر رمز بس للحب يعنى كلنا نهتم بيها ونخليها فى اليوم ده لا تعمل اى شيىء وكلنا نخدمها

قلت وجهة نظر برضوا

بس ليا وجهة نظر تانية

قال احكى يا بابا

قلت فى اعياد كتيرة ظهرت فى بلدنا متنوعة منها اللى اقره الدين زاى عيد الفطر وعيد الاضحى

واعياد تانية مستحدثة ودى بعضها يتعلق بالوطن وذكرياته زاى حرب 73 19 وعيد تحرير طابا وعيد الشرطة

واعياد تتعلق بالوحدة الوطنية زاى عيد ميلاد السيد المسيح للاخوة الاقباط

وعيد ميلاد الرسول صلى الله عليه وسلم

وعيد هجرة الرسول صلى الله عليه وسلم

يعنى قصدى يا دم الغزال انى بقى فيه اعياد كتيرة متنوعة ومناسبات مستحدثة كتير

قال فعلا يا بابا كتير فعلا وبقت الدنيا زحمة حتى بقينا بناخد اجازات كتيرة فى المدرسة

قلت طب لو كل مناسبة يا دم الغزال عملنا ليها عيد هاتختلط الاعياد

طب يا دم الغزال شوفت مرة عيد للمجهود عيد للعمل عيد للنشاط

قال ساعات بيكون اه فيه بس التركيز عليه من الاعلام بيكون ضعيف جدا

قلت يا سلام عليك فعلا

قال يعنى انت من رايك يا بابا لا نحتفل بعيد الحب ونعمل مناسبات كتيرة

قلت عيد الحب من الاساس

هو مش محتاج يوم لاننا يا دم الغزال بنعيش قصة حب من يوم ماتولدنا

انت مثلا بتحب نفسك وتحب تكون شخص راقى وتخدم بلدك

وكمان بتحب ماما وبابا واخواتك وبلدك واصحابك وكده

يعنى الحب ده مستمر

علشان كده حبنا لماما ده قصة نمو مستمرة

طب ليه يا بابا عيد الحب ده كان موجود؟

قلت من زمان فى التاريخ كان فيه اساطير كتيرة وانت تعرف انى فى ايطاليا

كان هناك الروم اللى كان بينهم صراع مع الفرس وذكر القراءن قصتهم

قال ايوه يا بابا

كان زمان بقى فيه عندهم صراعات كتيرة وكان فيه الهة كتيرة مش الة واحد

قال فعلا درسنا ده فى التاريخ

قلت صح لما الناس بتتعدد عندهم الالهة بيكون فيه اساطير وحكايات

منها بقى اسطورة بتحكى ان ملك من ملوك الروم منع الجنود انهم يتزوجوا حرص منه على

تركيز الجنود فى الحر ب

فكان فيه راهب اسمه فالنتين كان يتم عملية الزواج فى السر فلما عرف الملك قبض عليه

واعدمه

ومع مرور الزمن احتفل الناس به على اساس انه رمز للتضحية عن طريق فالنتين

وكمان شعار للحب

قال دم الغزال

يااااااااااااااااه يا بابا ده الموضوع كبير جدا وبعيد عنا

طب ليه يا بابا

الناس استمرت عليه كده فى مصر

قلت والله يا دم الغزال

احنا شعب عاطفى يحب الحب والكلام والضحك والمداعبات

بس نتيجة البحث عن الفلوس والجانب المادى افتقدنا احساس الحب وكلماته

واصبح عندنا فجوة وحالة جفاء طوال السنة

اسئل نفسك كده يا دم الغزال

كام مرة قولت لماما انا بحبك وبقدرك يا ماما مش عاوزانى اساعدك فى حاجة

كام مرة روحت طبطبت على ماما وقلت ليها انتى نهر وفيضان عطاء ليا ربنا ما يحرمنا منك

كام مرة روحت قلت لكتابك الله عليك انا بحبك اقوى بتفتح عقلى وذهنى وتخلينى احلم

كام مرة روحت لاخوك زجزج وقلت انا سعيد انكوا اخواتى وبحبكم اقوى

قال فعلا يا بابا مافكرتش بكده خالص

قلت ايه رايك نبدء من دلوقتى

نغير بوصلة حياتنا ونقول ونشجع بعضنا ونحب اللى بنعمله ونجتهد ونكبر ونتفوق وننجح

والوقت ده فعلا

يبقى عيد حب مستمر طول عمرنا

قال تعرف يا بابا

قلت ايه

قال انا سعيد انك بابا وبحبك كتيييييييييير

تبسمت وقلت

السعادة والحب ده انت اللى بوجودك دلوقتى معايا صنعته يا دم العزال

لاءن حوارك كان راقى راقى

قال

انا رايح اقول لكل الناس بحبكم وطول عمرى هاحبكم وهاقولها ليكم على طول

مش فى يوم واحد بس

أُم دم الغزال دخلت انت قاعد والواد بتعمل ايه؟

بدل ماتشوف هاتجيب ايه فى عيد الحب؟

ضحك دم الغزال وانا معاااااااه فطسان

وقلنا

انتى يا ماما كل كيانا وكل يوم بيعدى علينا

وانتى معانا عيد حب

قالت اه اه هو ده الكلام الدبلوماسى طب وعيد ميلادى اللى نستيه

قلت تؤتؤ عيب عليا فعلا

بس لعلمك كنت فاكرعيد ميلادك بس لما بصيت لوجهك ا لقمر ده حسيت انك لسه صغيرة وشمسك دايما" عطاء ولو جبت ليكى هدية ابقى باكبرك

لقيت دم الغزال بيقول انا ماشى يا بابا

قلت استنى استنى قال ايه

انا جاى معااااااااااااااااااااااااااااااااااااااااااااااك اغير من نفسى شوية

عُض نفسك

, الأحد، 7 فبراير، 2010


المشهد الاول


دخلت من على باب الشقة لاقيت ام العيال مقابلانى

هو انت فين طول النهار وسيب ليا عيالك دول مش تقوم بمسئولياتك شوية

قولت حاضر من عيونى وكيانى

قالت اه اه ابدء بقى وقول كلمتين لزوم الاستهلاك المحلى

قلت يا ستى نخليهم مستوردين علشان خاطر عيون ام زجزج وبيج بيج

العيال ماسكين فى بعض طول النهار انا زهقت


المشهد التانى

ايه يا زجزج وانت يا بيج بيج حد يزعل ماما ست الكل نور عيونا كلنا

قال زجزج مهو يا بابا بيج بيج عمل حملة مضادة

قولت ايه ايه حملة مضادة اعوذ بالله

ليه يا بيج بيج تعمل حملة مضادة وتزعل اخوك خليها حملة قومية

قام زجزج قال يا بابا الموضوع جد

المشهد الثالت

يابابا انا عملت نشاط اجتماعى فى المدرسة وعملت مجلة تحت عنوان نظف نفسك

قولت الله الله الله هو ده الكلام احنا فعلا نسينا النظافة وطريقة التنظيف كمان

علشان كده نتعرض لهجوم من الامراض الوحشة

صح يابابا

لكن بيج بيج عمل حملة مضادة وقال ليا انه هايعمل مجلة بعنوان عض نفسك

يرضيك كده يا بابا

امممممممممممممم مجلة عض نفسك صعبة اووووووى دى يا بيج بيج

شوفت يا بابا كده بيج بيج هايهد اللى بعمله

قولت طب ايه وجهة نظرك يا بيج بيج فى مجلة عض نفسك

قال يا بابا هو لو سئلنى كنت قولت ليه

قلت فعلا لما نريد الاستعلام عن شيىء محيرنا نسئل وبلاش نجتهد

ايه بقى وجهة نظرك

قال عُض نفسك دى كناية يا بابا عن لوم النفس وتاءنيب ضميرها

يعنى لما نتعرض للمرض ويكون نتيجة تقصير منا يبقى نعض نفسنا

ولما نرمى مثلا قشر موز واحنا نتكعبل فيه يبقى نعض نفسنا

قوووووووووولت ماشاء الله ايه الفكر الجميل ده يا واد

زجزج قال

بس ده يا بابا هايخلى الناس يقرؤا مجلة بيج بيج

قولت مش شرط يا زجزج فيه ناس بتحب الاسلوب الكلاسيكى او المعتاد فى النصح

وناس تحب الاكشن وكده

يبقى الفريقين كل واحد يختار اللى يريح فكره


المشهد الثالث


تعرفوا يا اولاد

كنت زمان امضغ لبان وشافنى واحد زميلى وقال ايه اللى بتعمله ده مش عيب عليك كده

وانت كبير تمضغ لبان وتبقى شبه الستات

كده انت متشبه بهم و ربنا هايكون غضبان عليك

وده اسلوب مش كويس

وانا طول الوقت ده ساكت

وبعدين قولت

خلصت كلامك قال هو الكلام هايخلص مادام فيه ناس زيك

قولت يا صديقى

قبل ان تجهد نفسك فى الحيرة واطلاق الشتائم

اسئلنى وانا اعرفك ليه

الدكتور قال لما تحس بحبة حموضة فى معدتك امضغ لبانه هاتقلل شوية من نسبة الحموضة

وبعدين تتحسن

ده السبب

قالى مش تقول

قولت ومش تسئل

علشان كده يا زجزج اسئل اخوك بهدوء واعرف وجهة نظرة واحترمها يمكن يكون عنده فكره

او وجهة نظر مش واضحة بدل ما نتخانق ونتضايق ماما حبنا الكبير

المشهد الرابع


ايه ايه ده انت لميت العيال وعملت حزب بدل ما تيدى كل واحد على دماغة من الدوشة اللى عملينها طول النهار

سئلتها طب كانت الدوشة دى سببها ايه

قالت معرفش يا مدلعهم

قاااااااااام زجزج وبيج بيج فى نفس واحد

اسئلى تعرفى ياااااااااااااااااااااااااااا ماما

المشهد الاخير

عض نفسك

جبااااااااااااااااااااااار الواد ده ابن مين ؟




بعد ان تقرء اول مرة اقرء مرة كمان

صدقنى مش هاتندم

وبعدين ان كان هناك درجة من عشرة

اعطى درجة يا استاذ وليك دعوة هدية اسبوعية