حوار امى

, الثلاثاء، 15 يونيو 2010




دخلت عليا امى وقالت
بتعمل  ايه يا ابنى ؟
قولت ليها
عامل حملة اسمها يلا نخربها وبكتب موضوع ليها
لقيتها ابتسمت  وقالت ياااااااااااااه  معقولة نخربها
طب قول يا ابنى نعمرها نبنيها زاى ما ربنا امرنا نكون فيها خليفة
يا امى
فيه ناس كتيرة شجعت الحملة وليهم افكار
والله يا ولدى ليهم عذرهم الزمن صعب وناسه بعدوا عن الدين ومعاملاته
خلى خرابك   يا ابنى  ايجابى يمكن ربنا يستخدمنا ويبعد شرور شياطينه عنا
خرابى ايجابى ازاى يا امى؟
يا ولدى لو عملت معجم  الخراب وكلماته
هاتستعجب وهتلاقى كل كلمة ليها وجهان عكس بعض
فيه ناس هاتقول كلمة طناش  والسلبية ليها مفعول السحر فى التخريب
لكن يا ولدى لو كان طناش للشر-- طناش للتخازل -- طناش للهزيمة --طناش للسلبية
اكيد يا ابنى هتلاقى انى ده ايجابى
السلبية يا ابنى فى الظلم والايذاء تبقى ايجابية
بس يا امى المشاكل بقت كتيرة والكل تايه وبقينا اغراب فى وطنا
يا ضنايا
جايز اكون ست عجوزة مش حسه بكم المشاكل ده كله
ومقدرش اقولك انى معايا  مفايتح لحلها
لكن يا ابنى  ابوك علمنى اننا على الاقل نقدر نفكر مع بعض
فى حل المشاكل والتحديات اللى بتقابلنا فى حياتنا وجزء جزء تتحل
شوف رسولك  فى مكة كان عايش  23 سنة
علشان الناس تقول بس لا اله الا الله
اد ايه صبر وتم ايذاءه وكان نبى !!
والسفهاء  تتطاولوا عليه كمان
لو كان قال مافيش فايدة  ودعا عليهم
كان فى لحظة كان فيه امر من ربنا  واستجابه لدعاء نبيه
 فعلا يا روح قلب امك التحديات والمشاكل كتيره
بس ازاى تواجه المشكلة ؟
قصادك طريقين
اما تفكر فى حلها
او تقعد جنبها تشيلها وتخلى غيرك كمان مهموم بيها 
وتحس بالضيق والملل وكمان الزهق وتفكر يا ابنى
وتقنط من رحمات ربك وقدرته وحكمته فى كونه
يا امى بس القوة مش فى ايدينا علشان نغير والاشرار كتير
ضحكت وضمتنى لصدرها
عارفة والله يا ابنى
بس خلى ده تحدى ليك
غير فى نفسك الاول  وخليك ايجابى دايما
وكمان خلى كمان واحد كده يبقى ايجابى زيك 
واحد  مع واحد مع واحد هاتكونوا جبال من الرجال الصالحين
افتكر كده دعوة رسولك كام واحد كان مؤمن بيها فى الاول
وشوف على الرغم من وفاته كام واحد دلوقتى لسه مؤمن
 على الرغم من وفاة صاحب الرسالة
 ملياااااااااارات  مؤمنين ولسه ناس فيها داخلين
علشان  رسالته  ثابته صحيحة هادئة كلها حب وعمران لأرض  ربك خلقها
وده خلى الناس كل الناس متمسكين بيها وعارفين انها حق وغيرك بيحسدك عليها

طب العيب فين يا امى ؟
مافيش عيب يا ابنى ابدا انتوا كويسسين اوووووى بس مستعجلين اووووووى
طفل اصحاب الاخدود لما تقرء  قصته  هتلاقى اهل قريته كلهم كان الايمان طريقهم
والطفل مات ولم يشاهد ايمانهم بس هو اللى كان ليه الفضل 
علشان كده طريق الحق ربنا من حكمته جعل فيه مطبات
علشان تكون اختبار لينا ونعرف معادن الناس منها

محتاجين والله يا امى ناس زيك
يا ابنى موجودين كلنا معاكوا فى كل اوان
خلى بس انت بالك من نفسك واعرف انى الخراب الحقيقى
لما تقف يوم الحساب خسران
متعرفش تبرر سبب بعدك عن حوض نبيك
والخراب الكبيييييييييييييييير  مش هاتشوف ربك يا ابنى وتستأنس بيه
ويا ترى هاترد تقول ايه وقتها ؟
كنت بخرب فى ارضك وكونك علشان الناس وحشين ؟
مهو يا ابنى لازم يكون فيه ناس وحشين
مش يمكن كان ده كان دورك فى دنيتك انك تعلمهم
 ويشوفوا فيك انك  صالح و قدوة ليهم
بدل ما تكون مساعد للهدم واليأس
اعمل تقيم لنفسك يا ابن بطنى  وشوف انت
كنت دليل للخير ولا مساعد على الشر
كنت مفرج للكرب ولا مساعد هدم
كنت زارع بسمة  ولا
كنت باسط رحمة  ولا
كنت ناشر صدقة  ولا
كنت حسان ومحسن  ولا
كنت ايمان ومسلم  ولا
كنت صاحب العطر ولا
كنت
كنت

وجاوب على نفسك !!!!!
*********************
تؤتؤ
مش ابنى اللى يبكى
حسن ابوعلى  الامور ده  ربيته علشان يكون للخير حاضن  
  بستان زهر ناضر نخلة ثمارها عطاء باسم

معلش يا امى دى دموع بتقوينى وبتحسسنى انى اد ايه لسه عليا بدرى
اتعلم واعرف طريقى

فاكرة يا امى
نشيد حضانتى
كان بيقول 
انا طفل مسلم
الله ربى
محمد رسولى
الاسلام دينى
العلم سلاحى
الايمان صديقى
الامل نورى
الصبر يقينى
الارض رزقى
الشيطان عدوى
الصلاة انسى
الجنة هدفى
رؤية ربى غاية
انا طفل مسلم
انا طفل مسلم

30 Response to "حوار امى"

blue-wave Says:

الله عليك يابوعلى
لسه مبدع زى ما انت
ربنا يخليلك الحجه:)

أنا - الريس Says:

علي فكرة ان خدت حملته للخراب بمعني ايجابي .. ربنا يخلي لك الوالدة ..
كلماتها درر ..
خليك في طوعها دايما ورقم واحد
النصحية دي من عاصي علي فكرة
...............
بجد والله الكلمات عجباني جدا أري انها اشبه بالشعر ..
---------------
بلغها سلامي .. وتحياتي .. وقلها .. لو أمهاتنا كلنا زيك .. كنا زمنا اتحررنا من التخلف الفكري ..
واتحررنا من الاستعار بأنواع .. وكانت زغاريط الأمهات في القدس .. وصوت الأذان بيرفرف علي المسجد الأقصي ..

تحياتي لك ولها ..

sharm Says:

شفت ازاي ان الام مدرسة بجد
و مهما كبرنا و اتعلمنا مش هنوصل لضافرهم

زهــــراء Says:

سيدى الفاضل ابوعلى

-*-*-*-*-*-*

اول حاجه الصوره جميله اوى اوى اوى نظرة عيون طفل تحفه بجد بتقول كلام كتير اوى اوى اوى ....

عنوان البوست رائع لان اى كلمه من امى حتى لو كانت بسيطه هى حوااااار راقى عاقل لابد ان اخرج منه بحكمه وفائده ...

كده برضه انك تقولها على حملة يلا نخربها اوعى تكون قولت انى عضوه فى الحمله ده سر وماحدش يعرفه حتى انى مختفيه كمان ومش داخله باسمى الحقيقى فيها :-$

الله على معنى كلمة الطناش بجد انبهرت من تفسيرها ....

اكبر جهاد هو جهاد الانسان لنفسه وانه يقومها ويحارب كل الافكار السيئه التى يحملها ..
فعلا لنا فى رسولنا الكريم قدوه حسنى ولكن يعيب على الانسان انه مستعجل وصدق رب العزه يحنما قال وخلق الانسان عجولا يعنى مستعجل اوى على كل حاجه ماحدش بيصبر على تحقيق اى حلم او اى هدف او حتى يصبر على اى دعوه للخراب

ايه رايك نعمل حمله نخليها يلا نبنى .. يلا نعمر ... يلا نحب بعض بجد ... يلا نقف مع بعض ... يلا نطبطب على بعض
يلا نبتسم فى وجع بعض .. يلا نخفف من الآم بعض ... شوفت بقى كام حمله حضرتك اختار وانا معاك نعمل جروب على الفيس ان شاء الله ....

على فكره الخير فى هذه الامه اللى يوم القيامه والى ان يتوفى الله الارض ومن عليها ....
تحيه لهذا الحوار الرائع الاكتر من ممتاز واذا كانت هذه هى والدتك الفاضله بهذه الحكمه الجميله فلابد ان يكون ابنها مثلك فى ثقافته ونظرته الى الامور
فى انتظار انك تقولى ابدئى فى تنفيذ خطوات الجروب

حفظ الله لك والدتك وبارك فى عمرها

استاذى ومعلمى لك جزيل الشكر والاحترام

لــــ زهــــــراء ــــولا Says:

اولاَ ربنا يباركلك في مامتك ويباركلها في صحتها ويبعد عنها كل غم وهم وحزن وتكون دايماَ مطمنه على حضرتك سواء الحوار ده حقيقي او لا بس بجد بجد بتحرك اذهانا وتخلينا نفكر ونفكر في اخرتنا كتير
"بدل ما تكون مساعد للهدم واليأساعمل تقيم لنفسك يا ابن بطنى وشوف


اللهم اجعلني دليل خير لا دليل سوء

انتكنت دليل للخير ولا مساعد على الشركنت مفرج للكرب ولا مساعد هدم



اللهم اجعلني مساعد في بناء العقول والافكار ولست ممن يساعد على هدمها وتدميرها


كنت زراع بسمة ولاكنت باسط رحمة ولاكنت ناشر صدقة ولاكنت حسان ومحسن ولاكنت ايمان ومسلم ولاكنت صاحب العطر ولاكنتكنت
"


اللهم اجعلني زارعة للبسمة كفي ابسطه للرحمة وانشر الصدقة واكون من المؤمنين المحسنيين المعطرين اخلاقهم بالايمان ..دام قلمك ودام ابداعك

موناليزا Says:

قوليه يا ام حسن كمان الله يخليكى.. انا ساكتة من اول ما الحملة بدأت لما اشوف ايه اخرتها
---
ماكنتش اعرف ان حضرتك غنى اوى كده بوالدتك.. بجد الست دى كنز حقيقى.. ربنا يخليهالك

الزهرة البرية (Joudy) Says:

بجد ونعم الأم ربنا يحفظهالك أنا برغم إنى كنت متغيبة فى فترة الحملة إلا إنى مش خسرت كتييير كسبت أكتر لما قرأت الكلام ده بجد ربنا يسعدك دوما بالخير ويسعد أيامك يارب ويرزقك الخير يارب

تحياتى لك ولوالدتك

دمت بكل الخير والسعادة

لــــ زهــــــراء ــــولا Says:

يونيو, 2010 02:34 م

لـــولا وزهـــراء يقول...
اولاَ ربنا يباركلك في مامتك ويباركلها في صحتها ويبعد عنها كل غم وهم وحزن وتكون دايماَ مطمنه على حضرتك سواء الحوار ده حقيقي او لا بس بجد بجد بتحرك اذهانا وتخلينا نفكر ونفكر في اخرتنا كتير
"بدل ما تكون مساعد للهدم واليأساعمل تقيم لنفسك يا ابن بطنى وشوف


اللهم اجعلني دليل خير لا دليل سوء

انتكنت دليل للخير ولا مساعد على الشركنت مفرج للكرب ولا مساعد هدم



اللهم اجعلني مساعد في بناء العقول والافكار ولست ممن يساعد على هدمها وتدميرها


كنت زراع بسمة ولاكنت باسط رحمة ولاكنت ناشر صدقة ولاكنت حسان ومحسن ولاكنت ايمان ومسلم ولاكنت صاحب العطر ولاكنتكنت
"


اللهم اجعلني زارعة للبسمة كفي ابسطه للرحمة وانشر الصدقة واكون من المؤمنين المحسنيين المعطرين اخلاقهم بالايمان ..دام قلمك ودام ابداعك

نسيت امضي لولا

فاتيما Says:

نظراً لأن المدونة بتاعتى بترخم
و البوستات الجديدة
مبتطلعش ف الريدر
فلو سمحت تقرى البوست دا
و لو تقدر تساعد متتاخرش
و شكرااااا مقدما
من قلبى

http://nonoymm.blogspot.com/2010/06/blog-post_16.html

brightlyanny Says:

ازيك ابو على

جميل جدا جدا الحوار الاسرى ده ياابو على.

ويمكن الحوار ده مفتقد ف كتير من الاسر ويمكن ده كمان سبب من اسباب الخراب
ا للى ف مجتمعنا . صحيح الا هما زج زج وبج بج فين اليومين دول؟؟؟
كلمات جميله جدا وهادفه جدا والاجمل كمان (الخراب الايجابى ) فعلا لو نفذناه هنتغير كتير للاحسن .
انا مش قادره اعبر كويس ف البوست ده
. وربنا يعنا ع التغير الايجابى.
جزاك الله اخى كل الخير

غير معرف Says:

ست حكيمه ربنا يباركلك فى عمرها
تحياتى

richardCatheart Says:

سامحنى لا تعليق

لــــ زهــــــراء ــــولا Says:

سيدى الفاضل ابوعلى

لسه برضه المدونه عندنا زعلانه من الريدر عند حضرتك امسحها خالص من الريدر وكل لما نعمل بوست جديد هاقول لحضرتك

زهـــــراء

Mona Shereif Says:

بصراحه احلى بوست فى التخريب
ولو انى مش فاهمه ليه حملة التخريب دى بس اكيد ليك وجهة نظر

جميل يا ابو على

كمان عاجبنى القالب ده


اخبارك ايه بقى؟

كلمات من نور Says:

يا سلام عالوالدة ودرر كلماتها

طبعا احنا عارفين وفاهمين ان التخريب مكنش هو المقصود واننا في كل بوست كان لازم نعمل بعكسه بس امنا الحبيبة وقفت لنا وقالت ولو خليكم مع الله تكسبوا :

دي هديتي يا أبو علي للكل وللوالدة كمان : نشيد مع الله لمحمد العزاوي
http://www.youtube.com/watch?v=cxKdzfNNkG4

خالص تقديري للام الغالية التي أنجبت لنا أبو علي

SHAPE YOUR LIFE (ABOALI) Says:

الى بلو ويف

الله عليك انسان مبسوط انى شوفتك وفينك من زمان وان شاء الله يرجع اللى كان وكان


تقديرى لانسان

SHAPE YOUR LIFE (ABOALI) Says:

الى الريس

فعلا عندك حق الام ليها دور اساسى فى التكوين

بس احنا داخل انفسنا ام كبيرة لازالت موجودة
ياريت نعرف نستخرجها علشان تقول وتقول

تقديرى لرايك المحترم

SHAPE YOUR LIFE (ABOALI) Says:

الى شارم

عرفت يا شارم ومش هاعمل كده تانى
حرمت حرمت

تقديرى ليك الكبير

SHAPE YOUR LIFE (ABOALI) Says:

الى زهراء

اول حاجة صفائك هو اللى شاف الصورة كده ف تحية لبسمة ونضارة ذلك الوجة البشوش
وكمان يا ستى سرك فى بير بس تدفعى كام
علشان انتى مشاركاتك كانت ايجابية فى حملة يلا نخربها


تقديرى للحماس الذى اراه فى عيونك
انتى عارفة انى فيه جروب اسمه شاب عملته على الفيس بوك
تستطيعى ان تكتبى ما شئتى فيه بقلمك وشخصك المحترم

اما عن تقصيرى ووجودى فى مدونتك الرائعة
ان شاء الله هاكون موجود
وبلاش يا ستى تقولى ابعتى رسالة او رنه
ده رقمى 0184080070

تقديرى لانسان فاهم

SHAPE YOUR LIFE (ABOALI) Says:

الى لولا

ياااااااااااه دايما ليكى رؤية احبها يا لولا بجد

معظم الناس لم تفكر ان كان ده حوار حقيقى ام لاء وانتى اللى جه فى بالك كده
سبحان الله

على العموم اسعدنى سرورك بالحوار
وبداخل كل منا ام يمشى بها دايما
المهم ان ندرك فعلا اننا بين الحين والاخر نحتاج ان نصنع حوار حتى نعيد تقيم ما نعمل

تقديرى لفهمك المميز وحضورك العطر

SHAPE YOUR LIFE (ABOALI) Says:

الى موناليزا

هههههههههههههههههههههه
قوليلوه قولى خليه يصحى ويعيش يتكلم بالبسمة ويكون
فعال فى الحياه انسان عاشق محب للخير فهمان

قووووووووووليلوه قولى

حاااااااضر يا موناليزا حرمت


تقديرى

SHAPE YOUR LIFE (ABOALI) Says:

الى الزهرة البرية

ربنا يبارك ليكى انتى فى حياتك ويديم الله عليكى الصفاء والطمائنينه ويهبك السعادة التى تحبين

تقديرى يا انسانة

SHAPE YOUR LIFE (ABOALI) Says:

الى فاتيما

الرسالة وصلت يا فندم

وقراءت البوست المراد
واظن ان المطلوب هو فصيلة اووووووووه سالب مش موجب

لان الموجب متوفر فى مصر وكتير جدا

اعانك الله على الخير ووهبك الله جنته

SHAPE YOUR LIFE (ABOALI) Says:

الى برتلى

ههههههههههههههههههه
دم الغزال جالك فى البوست الجديد

وررررررررررينا بقى هاتعملى ايه


تقديرى المستمر

SHAPE YOUR LIFE (ABOALI) Says:

الى الشوكة الناعمة

اه
ربنا يبارك لينا كلنا

يلا بقى شوفى ام نفسك هاتقول ايه

مستنى تقولى


تقديرى

SHAPE YOUR LIFE (ABOALI) Says:

الى قلب قطة

تؤتؤ

مش مسامح

SHAPE YOUR LIFE (ABOALI) Says:

الى لولا وزهرا

مقدرش امسحها من الريدر
قلبى نصه كده يبقى عليه العوض فيه

هههههههههههههههههههه

تقديرى

SHAPE YOUR LIFE (ABOALI) Says:

الى بعض الوقت

يااااااااااااااااااه

والله يا منى فيه ناس عرفتهم عن طريق التدوين اتمنى ان اجلس فى وسطيهم واسمع كلامهم وحكاويهم

واطمئن عليهم واسمع صوتهم

سبحان الله

كنتى انتى من ضمنهم و دايما اقول لنفسى اين ذهبوا

ربنا يبارك ليكى فى حياتك يااااااااارب
وتكونى فى اتم صلاح وسعادة

الحمد لله انا امور اهو وجميل ولسه انسان عايش محب للحياه واثق
انى فى يوم هاكون صالح


ان ماكنش فيها غتاته رقمى هتلاقيه فى تعليق من التعليقات اتمنى ان اطمئن عليكى دايما

SHAPE YOUR LIFE (ABOALI) Says:

الى كلمات من نور

التقدير لك انتى يا سيدتى على صفائك وهمتك وعلوها ورغبتك فى نشر الخير والعمل به

ربنا يهبك فردوس الجنان كائنه مع الاطهار الاخيار


عميق التقدير

غير معرف Says:

السلام عليكَ
لا أعرف إن كانت هذه التدوينة مجرد قصة تنويرية من قبلك أن حديث ونقاش تم بالفعل بينك وبين أمك الفاضلة

على كل حال أعجبتني التدوينة للغاية
بوركت