تكوس

, الأحد، 24 أكتوبر، 2010



لازالت مرحلة الطفولة وما كانت تحتويه كنز خفى
يحتل مكانة حينما نتنسم عبيرها  نبتسم لاننا نراها ليس بأعيينا
 وانما باءعين من كنا فى كنفهم فى تلك المرحلة
ويقولون دائما على تلك المرحلة
 أنها مرحلة النقش الاولى فى الصفحة البيضاء
واستهوى نفسى كثيرا" ان اُداعب امى لكى تقص لى
 ويستبين عندى بعض من ملامح تلك الفترة
 التى تعتبر البذرة الاولى فى تشكيل الارض
وقد دفعنى الى هذا هو احساسى وشعورى الغريب
 لنوع معين من الاكلات 
معروف لدى الجميع وله شهرة عظمى
خصوصا" فى تلك الايام
وهى الكوسة
فمنذ ان وعيت وادركت وليس بينى وبينها ذلك التألف
فتحدثت مع امى واستفززت مشاعرها لكى تحكى
والحديث مع امى له عناق اخر
 فهى حاصلة على اولى ابتدائى
 بتقدير اجلسى فى البيت وارعى اولادك احسن
ولها بسمة اكاد لا اراها الا فى هذا الجيل النقى
وبدءت امى فى سرد الحكاية
بعدما حكيت لها قصة اختلافى فى وجهات النظر مع الكوسة
فقالت انى ولدت و وزنى وحجمى ماشاء الله كأنك عجل صغير
قلت البداية عسل وكلام شهد  يا ست الحبايب
فقالت فى ضحكة انيقة العنوان
 بجد كان وزنك كأنه من رافعى الاثقال
 وكان الفول عشقك وغذاك
فقد شعرت 
انك بامكانك الاستغناء عن لبن الرضاعة وتأكل الفول
ولما كبرت وترعرت
كنت تٌحب القلقاس والسبانخ والخبيزة والبطاطس
كأن الفول قد أهلك وهذب معدتك
 لمثل تلك المأكولات
الا
 الكوسة
 كنت عندما اعدها لك كان شكلك  عجيب لما تشوفها
وجهك يتكوس واشعر انك دائرى الشكل
فتبسمت
 وكركرت هى بالضحك
**********
ومرت عليا الايام
 ولازالت الكوسة فى الجانب الاخر من النهر الغذائى
وكلما رايتها  يأكلها بعض من الزملاء
 احسست انها تقترب ان تكون مهلبية بلون اخر
وها انا فى اولى خطواتى لاختيار شريكة الايام
فيتم دعوتى لتناول الطعام  مع محيط اقارب العروس
فأجد
 الكوسة
 ولكنها كانت فى تلك اللقطة
 قد تطورت فى الشكل واصبحت محشى
كوسة محشية
وكنت استغرب ان يتم حشو تلك الكوسة
 وتعذيب الارز مع باقى زملائه ووضعهم داخل الكوسة
وعاد لى الوعى مرة اخرى بعد تلك الغيبوبة حين رايت الكوسة 
ورايت المعدة والمستقيم والاثنى عشر والامعاء الدقيقة 
مرروا" بالكوبرى الدائرى المسمى بالمصران الغليظ 
تقول فى نفس واحد 
وكسة وكسة 
فوجدت حروف الابجدية
تقول لى مبروك
لقد دخلت المسابقة الكبرى للشعب
حزر فزر
اكلة  من اربع حروف 
بتبديل الحرف الثانى مكان الاول 
يحدث لبيتك تكوس
والجائزة 
شيبسى بطعم الكوسة 
هيييييييييييييييييييييييه
واستجمت احشائى من الغضب
فقررت اثناء الاكل
 ان اقوم بعمل عملية تحرير للارز
 من براثن الكوسة فقمت بغز الكوسة بالسكين
وانتشال الارز بسرعة وادخاله فى فمى ليتنفس هناك الصعداء
 وسط تهليل وفرحة  المساجين الذين كانوا معه
فقالت لى ام العروس هو انت بتعمل ايه يا ابوعلى؟
فقولت لها انى احب ان اكل الكوسة المحشية بس فتح
لإنى حشوها بيكون رائع ومسكر
 وجلد الكوسة بعدين
 فضحكت
 وقالت لما اجرب زيك
واكل الجميع الكوسة فتح
********************
ومرت الحياه مرة ثانية
واصبحت رجل مسئول فى العمل
ووجدت ان الكوسة عناوين بارزة فى التعاملات
وكأن نفسى تبرز لى من الداخل مخرجة لسانها
 وتقول
شوفت رحمتك منها ازاى
وخلال ممارسة العمل ودخولى مع الكثير فى الحوارت
ادركت ان الكلام الجدى يتم صبغه
بطابع من الليونة مثل الكوسة المطبوخة
وحين تكلم احد لتحديد موعد للمقابلة
يقول
اه ان شاء الله
بكرة
بعد العصر بعد المغرب
وهكذا فى لغة حملت مراسم التسويف
لذا وجدت صعوبة فى التعاملات بهذا المنظر
وقررت انى اتكلم كلمات واضحة المعالم
لا تأخذ  تفاسير ومعانى اخرى
واستوضح من غيرى فهمه لتلك الكلمات
 مع ربط تلك الكلمات بوقت محدد معلوم ومعروف
لذا ادعوكم للبدء فى تغير الكلام الكوسة ذو الطابع التسويفى
ونعلم اطفالنا الالتزام  بكلمات ناصعة لها بريق الياسمين
ومذاق اللحم ولون الطماطم  وحجم الكوسة
واسترهااااااااااا علينا يارب

32 Response to "تكوس"

yara Says:

ههههههههههههههههههههههههه

نفسى اعرف ليه دايما بنربط الكوسه بالهمجيه وعدم النظام والمنطقيه فى التعامل بين البشر مش بنقول ليه مثلا اى اكله تانيه ..تقريبا انت اول واحد اطلقت اسم كوسه على الموضوع ده يا ابو على علشان مش بتحبها ....بس انا كنت ذيك الاول الى ان عرفت انها كانت احب الاكلات للرسول عليه الصلاه والسلام وانه كان بينتقيها من بين الاكل فحاولت اغصب نفسى الاول علشان اكلها وبعدين حبيتها جدااااا..حاول كده انت كمان يمكن تغير رايك..

اما بالنسبه لتعليم اطفالنا لغه وطريقه حياه بعيده عن الكوسه فده اتمنى انه يحصل علشان شويه شويه نطلع جيل ملامحه مختلفه عن جيل الومين دول اللى ما يعلم بيهم الا ربنا..وطبعا انا مش تبعهم الحمد لله انا اللى ذيى فى الدنيا قليل طبعا وده رحمه للبشريه ..

بس بجد استمتعت بالبووووووووست جدا وخصوصا كلام ست الحبايب ربنا يبارك لك فيها ويسعد كل ايامكم يا ابو على

yara Says:

ياااااااااااه من زمان ما حصلش الموضوع بتاع اول تعليق ده ..

اييييييييييييييييييييييييييييه


اياااااااااااااااااااااااام

كلمات من نور Says:

ابوعلي مش بيحب الكوسة؟؟؟؟؟؟

دي جميلة والله بس مش أي كوسة يعني (كوسة الأكل بس ) التاني بتجيب قولون وارتكاريا ولوثه وووووو

SHAPE YOUR LIFE (ABOALI) Says:

الى يارا

يا مراحب يا مراحب
دائما اللقطات الاولى تعطى ملامح للحياه
وترسل لنا رسائل معينة
قد اكون حرمت من حب الكوسة على الغم من فؤائدها
وقد يكون هذا الحب رسالة لى وتذكرة
بعدم الانسياق وراء تلك السلبيات الكوسية المعنى والاتجاه

ويكفى يا ست الكل انك تاءكليها لتعوضى ما اتلفه الزمن معى

اما عن الاطفال والجيل الحالى
يهيىء لى ان الكوسة تستنجد منهم
لانهم تغلبوا عليها فى السلوك والفعل
وربنا يهديهم

يسعدنى دائما تواصلك وتذكرك تلك المدونة المتواضعة من الحين الى الاخر
فمرور الاقمار دائما كل ليل
ومرور الشمس كل نهار
ولكن مرور الهواء نحتاج له كل يوم
وزوار المدونة اصحاب الفكر واثراء المعانى هم هواء المدونة

تقديرى

لـــولا وزهـــراء Says:

ابو على

-*-*-*
تكوس ده فعل جاى من كوسه
زى تفلفل جاى من فلفل
وتطمطم جاى من طماطم ربنا يجعل كلامنا خفيف عليها ههههههههه

انا مش باحب الكوسه المسلوقه مبدئيا كده مافيش اى طلبات النهارده

زهراء

SHAPE YOUR LIFE (ABOALI) Says:

الى يارا فى لقطة ثانية

فعلالالالالالالالالالالالالالا"
صدقتى

اياااااااااااااااااااااااااام
كانت ثووووووووووووووووووووانى

SHAPE YOUR LIFE (ABOALI) Says:

الى كلمات من نور

ههههههههههههههههه
طب اعمل ايه فى نفسى يا نورانية
والعلاج فين
اكلها مش قادر عليه

ساااااااااااااعدينى
والكوسة التانية دى
الناس تقريبا بقت بتزرعها وترويها فى الافواه

تقدييييييييييييييرى

SHAPE YOUR LIFE (ABOALI) Says:

الى زهراء
كده تبقى عمى وحبيبى
ناكل بقى الكوسة فتح

وعندك كيلو كوسة محشى ع السكين يا واد

ههههههههههههههههههه

لـــولا وزهـــراء Says:

ابوعلى

اتذكر ابن جيرانا كانت والدته بتحب الكوسه جدا والواد صغير ومش بيحبها وهى كل لما تطبخها يجى الواد يتغدى عندنا وفى الاخر مامته زهقت وقالت له على فكره الكوسه دى كانت غذاء النبى عليه الصلاة والسلام من يومها الواد بيحبها وهو دلوقتى فى ثانويه عامه وبيعشق حاجه اسمها كوسه

واحنا اطفال بنكون صفحات بيضاء واللى عايشين فى كنفهم بيسطروا فى هذه الصفحات سطور ونحن نمشى على هذه السطور ..

فاصل ومن بعده نواصل ان شاء الله

زهراء

SHAPE YOUR LIFE (ABOALI) Says:

الى زهراء

مهو انا باكلها فتح اهووووووو
علشان منحرمش نفسنا من شرف من تزينها بفم المصطفى صلى الله عليه وسلم

وابن الجيران اكيد كان بيحشى الكوسة بروتين حيوانى من عندكوا شكله كده

وربنا يجعله عاااااااااااامر يا سيدى

لـــولا وزهـــراء Says:

ابو على

انا مش باحب الكوسه المحشيه ارجع فى طلبك باحبها باللحم المفروم يعنى لها طريقه خاصه كده ...

بمناسبة الحديث عن الكوسه احكى لك موقف وبما انه حديث طفولى وانت عارف انى عيله يوووووه اقصد طفله بص يا سيدى ادهم ابن صديقتى حنان مامته كانت تسلق له الكوسه وهو طفل صغير اوى والواد يعشقها ومره كنت عندهم لاقتها بتقولى ممكن تاكلى ادهم قولت لها طبعا مسكت الطبق قولت لها ايه ده قالت كوسه مسلوقه قولت لها حرام عليكى دى طعمها صعب اوى الواد كان عمره تقريبا سنه ومن يومها مش بيقرب للكوسه وكأنه فهم كلامى ....

على فكره انا بطنى وجعتنى من وصفك للكوسه المحشيه وخاصة انى مش على وفاق معها :(( :((

عوده بعد شويه لاخر تعليق

زهراء

SHAPE YOUR LIFE (ABOALI) Says:

الى زهراء
اصلى الكوسة برضوا بينى وبينك ليها فوائد كتيرة
سهلة الهضم فتامينات سعرات حرارية اقل
يعنى تنفع فى الريجيم

بس لعلمك بقى الناس بتروح تنقى الكوسة الصغيرة
بس الكوسة الكبيرة هى الانضج والاصح
بس الناس بقى بيحبوا يكبروا الكوسة على مزاجهم

واه منك يا زمن كوسة

لـــولا وزهـــراء Says:

هلاااااااااااااا يا ابو علي كيفك يافندم؟

يارب تكون بسعادة وخير وحب
لولا

لـــولا وزهـــراء Says:

على فكرة بقى انا بموووووووت في الكوسة بس مش الهرجلة والهمجية لا بحبها بالحمص والصلصة :d :d :d
لــولا

لـــولا وزهـــراء Says:

ابوعلى

ههههههههههههههههههه حتى اهل العروسه قدرت تسيطر عليهم وياكلوا بطريقتك ههههههههههههههه مقنع اوى انت والله
تعال نحلل اخر جمله

" نعلم اطفالنا الالتزام بكلمات ناصعة لها بريق الياسمين
ومذاق اللحم ولون الطماطم وحجم الكوسة
واسترهااااااااااا علينا يارب "

مذاق اللحوم وياترى اللحمه بقيت بكام النهارده
لون الطماطم طيب عارف الطماطم الكويسه وصلت كام

حجم الكوسه بقى مش عارف بصراحه اى حجم فيها لانها احجام طويله وقصيره وتخينه ورفيعه

بصراحه اكتر نوع من الخضار منتشر فى احدى الدول هى تلك الكوسه وكذلك فى كل وزرات تلك الدوله بس للاسف اسم الدوله رايح من دماغى ;) وش بيغمز لانه خايف من اللى بالى بالك واللى اتلسع قبل كده من الكوسه لازم ينفخ فى الزبادى

البوست حلو ويحمل حاجات خفيفه رغم ان بطنى بتوجعنى بجد

ممكن لو تسمح واحد زبادى بعسل النحل


زهراء

لـــولا وزهـــراء Says:

ما شاء الله ايه خفة الدم دي وربنا كلامك مسكر ومضحك الاسلوب نفسه رسم البسمة على القلب ليس الفم فقط حلوة الكوسة اللي بتتاكل فتح دي دا انت بهدلتها معادش محشي هههههههه بقى مسمى اخر ابعد ما يكون عن المحشي
لولا

لـــولا وزهـــراء Says:

انا بتواجهني مشكلة الكوسة دي في الشغل مش تسويف للشغل فقط لأ وكمان تنويم للضمير وزرع الضغينة بين الزملاء وكل واحد بقى عايز يرتفع على كتف التاني وياخد شغله وينسبه ليه والبيه كان قاعد يشرب قهوة وشاي وداخل ع النت وحاطط رجل على رجل ومستني غيره يخلص الشغل عشان يروح للمدير المباشر ويعرض الشغل وكأن هو اللي تعب فيه وحضره وحسبي لله ونعم الوكيل وربنا يبعد عننا الكوسة المهلكة اللي بالشكل ده
لولا

MR.PRESIDENT Says:

الله أكبر
الله أكبر
فهمت
فهمت
البوست بيتكلم علي المحشي صح

بغلس
أخوك في الله .. ورفيق في الدرب .. وأمير مثلك في الإبتعاد عن الكوسة والتكوس وأمثلها بداية من الأكل مروراً بالتعاملات وأعشق الكلمات الناصحة المغسولة .. مش شرط مسحوق مركز .. لكن يكفي أن تكون واضحة .. لا تخفي وراءها أي معالم للتأويل .

تحياتي لبوستاتك الجامدة جدا .

سلمت الأنامل يا أبو قلب وعقل شبه كامل .. لأن الكمال المطلق لله .

في أمان الله .

ستيتة حسب الله الحمش Says:

ها ابدأ من آخر البوست

تعرف معنى أن تعلم أطفالك الإلتزام بالمواعيد؟
أنت تنشأ أطفال معذبون دائمي الشجار مع زملاء كوسة
ومع خطيب كوسة
ومع زوجة كوسة
ومع مجتمع متكوس آخر حاجتين تلاتة

يا جماعة متسمعوش كلام أبو علي ذو الوجه المتكوس صغيرا الخالي من مظاهر الكوسة كبيرا
لحسن العيال ها تلجأ للطبيب النفساوي :)

تسلم ايدك

richardCatheart Says:

ههههههههههههههههههههههههههههههههه

ههههههههههههههههههههههههههههههههههه

هههههههههههههههههههههههههههههههههههههه
حرام عليك موتنى يا ابوعلى والله

اهو انت وصفت بدقه متناهيه احساسنا بالكوسه

كان يوم اسود لماما تعملها
ولما اتجوزت اتفاجأت ان جوزى الحج مابيطقهاش حمدت ربنا وصليت ركعتين شكر فضل وحمد
وانتهت معانه الكوسه بنت الموكوسه
من بتنا عقبال ما تنتهى من البلد كلها

تحياتى يامبدع حتى فى المطبخ هههههههههه

شهد الكلمات Says:

انامش بحب الكوسة لا مسلوقةولا مطبوخة و لا محشية ولا اي شكل من الاشكال
خصوصا كوسة الشغل دي بقي ليها طعم يوجع البطن :s

بس المهم العروسة بتحب الكوسة ولا لاء بعد مشروع التفريغ اللي عملته عندهم


تحياتي

SHAPE YOUR LIFE (ABOALI) Says:

الى لولا

يااااااااااامراحب يا مراحب
كده هانتعود على وجود الناس الافاضل

ولالالالالالالالالالالالالالالالاايه

SHAPE YOUR LIFE (ABOALI) Says:

الى لولا فى اللقطة الثانية

ماشاء الله ماشاء الله
اللهم لا حسد
اللى ياكل الكوسة
يبقى هايعرف يتعامل مع الكوسة

ولالالالالالالالالالالالالالالالاايه
كمان بالحمص
اه ياااااااااانى يا مصراينى يا يابا

SHAPE YOUR LIFE (ABOALI) Says:

الى زهراء
لالالالالالالالالالازم نبقى حمشين فى اول جلسة اوووووووووومال
وكله اكل الكوسة بالطريقة الجديدة يا معلمى

اما عن ارتفاع الاسعار يا انسان

فنحن نناشد الامم المتحدة التدخل واستخدام الصورايخ الكاتيوشا
ماركة انا فى الخليعة
وبرىء من المعلق
الذى قال ان السعر اللحمة والطماطم غالى

لانه من مناهضى الحكم فى بلادى

سسسسسسسسسسسسسسسلام يا صاحبى

SHAPE YOUR LIFE (ABOALI) Says:

الى لولا

مهو يا اختى لازم الواحد يتصرف
علشان يتعامل انسانيا" مع الحدث الراهن
والا البعد السياسى للكوسة سيكون له مردوه السيىء على الاحوال المعيشية

ولالالالالالالالالالالالالالالالاايه

SHAPE YOUR LIFE (ABOALI) Says:

الى لولا
تؤتؤ
دى حالة حياء سلبى
لازم ندافع عن مجهود تم بذله ونحاول ان نظهره

حتى تذهب الكوسة لتشتكى بقى وهناك
الفتح والتحرير على ايدى يا باشا

منورة مكانك يا لولا وبيتك

SHAPE YOUR LIFE (ABOALI) Says:

الى الريس
ههههههههههههههههههه
اه البوست عن المجشى بانواعه
خصوصا المحشى الريائسى المعروف عنه انه يساعد على التساهيل

ههههههههههههه
اخجلتم تواضعنا يا ريس
وهب الله الجميع حسن الادراك والوعى
ووهبك ما يقر عينك ويصلح به شاءنك
ويرفع من قدرك

قوووووووول امين
بلاش تكون زى ريس من بلادى

SHAPE YOUR LIFE (ABOALI) Says:

الى الفاضلة دكتورة ستيته

وانا معاااااكى باءعلى صوتى
بلاش تسمعوووووووووووا ابوعلى
لانه معاكوا عند بنت الاكرمين نسمع كلامها كلنا

دكتورة ستيته دكتورة ستيته

معلش بقى يا دكتورة
ده نداء الشعب
وانا المواطن

SHAPE YOUR LIFE (ABOALI) Says:

الى قلب قطة
كده بقى
انت حبيبى واثبت كفاءة
اللى مايكلش الكوسة هو الغالى
ليك منصب ان شاء الله مهم
وتحية للحاج ريتشارد واهلة وناسه
هما دول الرجاله
وده البيت الخالى من التكوس

اه يا اختى اه

ومتشكرين على حبة الكلام اللى بطعم روز الكوسة

SHAPE YOUR LIFE (ABOALI) Says:

الى شهد

يااااااااااااا هلا يا هلا
كده انت فى التمام يا انسان
اطمئن على حالك
معايا ان شاء الله ونفتح حزب فتح الكوسة

وهانبقى لمة والدعوة عامة

والمدام ياصاحبى تقدر
دى كانت تتكوس فورا

ولالالالالالالالالالالالالالاايه
اسعدنى وجودك يا انسان قدير

شمس النهار Says:

مش عارفه ليه الكلام وراه كلام

:))

بس بحب اجدا حديث الذكريات مع الامهات عن ماكنا نصنع ونحن صغار

وتعليقاتهم المضحكه علينا

وكذلك مفرادتهم اللغويه اللطيفه وتتساوي جميع الامهات فيها

:))

Dr/ walaa salah Says:

انا عن نفسي مبحبش الكوسه

وواضح ان اغلب الناس كده والدليل انهم سموا الواسطه والمحسوبيه بالكوسه

بس للاسف الكوسه دي لا هي مطبوخه ولا محشيه

دي بقت مشويه وريحتها انتشرت في كل مكان



مشكور ابو علي على البوست