انتحار البلهارسيا

, الجمعة، 2 يوليو، 2010



الواد زج زج واد حويط  دايما لما يسئل سؤال بيكون ليه هدف تانى
المهم الواد دخل عليا وانا قاعد فى ساعة تجلى
 كنت اساعد  امه فى ذبح البصل  وكلما ذبحت بصلة 
ارسلت عبير  بمجرد وصوله الى العين  تتكهرب
ويبدء المخ فى ارسال مدد  الى العين لتقليل ذلك الماس الكهربى 
 فتنهمر الدموع فترانى زوجتى العزيز اللى ربنا يخليها لينا يارب
 وتقولى ايون كده عيط شوية علشان تشوف بنتعب ازاى 
الدموع   دى بتخلى قلبك رحيم  زاى قلبى 
فتبسمت عينى والدموع تتراقص وقلت كلامك سليم يا مراتى يا فشة فؤادى

المهم
الواد زجرج
استغل الموقف ده وقال ليا
بيقولوا انهم عملوا جهود جبارة فى القضاء على البلهارسيا يا بابا
قولت فعلا يا زجزج الحكومة بذلت جهود جبارة فى كده والحمد لله يا ابنى
 البلهارسيا قلت لانها كانت سبب امراض كثيرة
الواد استغرب كلامى ونظر ليا نظرة شريرة
كنت فاكرك يا بابا مطلع ؟
لكن يا بابا يظهر كثرة ذبحك للبصل جعل  قلبك رحيم كمان على الحكومة
قلت وليه بس يا زجرج لزوم طرطشة الكلام  ورمى البمب
 خليك دوغرى وقول علمنا  من علمك يا عم

فقال
يا بابا قوقع البلهارسيا قوقع نزيه  يعنى بيحب الماء العذب النظيف النقى
 علشان يعرف ياخد راحته ويتنفس بشكل جيد  والجو ده بيساعده على انه يعيش وينمو
القوقع يا بابا يا عزيزى انتحر
انتحر  لالالالالالالالالالالالالالالالالا
ليه  بس يا ابنى ؟ بلاش تقول كده ده يبقى مات كافر
يا بابا بلاش تعجب واستغراب الناس كل يوم
بترمى فى الترع والمصارف بلاوى وملوثات بدون فهم  ووعى
والمرة دى كان فيه فايدة من التلوث
 ايه الفايدة دى يا واد ؟
 الملوثات كتمت على قلب القوقع وقفلت مرواحه والماء العذب اصبح عذاب
  فانتحر يا والدى
لا اله الا الله  محمد رسول الله  سبحان الله فعلا حتى القوقع انتحر على ايدينا
وانا اللى كنت فاكر انى الحكومة هى اللى قضت عليه
ياااااا بابا لو الحكومة ربت بط  وتركته فى الترع والمصارف كان اتغذى على القوقع
وبشكل طبيعى قضينا على البلهارسيا واستفدنا كمان
لكن علشان هى خافت على البط وخافت انى الناس تشبع وتأكل البط وتتغذى
علشان كده  لم تربى
وقالت الناس لوحدها سبب كافى علشان القوقع يموت

قلت تعرف يا زجزج كلامك ده فتح مصارين  عقلى
وطل عليا هاتف بيقول
اننا فعلا بنعمل كده فى انفسنا
بنكتم على الحاجات الحلوة فينا بداعى انى رتم الحياه سريع والدنيا عاوزة كده
وبعدين نشتكى فين الاخلاق فين المودة فين الرحمة فين فين فين ؟
واحنا اللى خلينا الاخلاق والحاجات الحلوة تنتحر
علشان كتمنا على انفاسها وبقينا لا نستخدمها ونحسسها انها مش مفيدة

وهنااااااااا دخلت ام العيال وقالت
معطل ابوك على ذبح البصل ليه؟
فقال زج زج ابدا يا ماما انا قولت افكره 
انى ذبحه  للبصل تنبيه ليه وتذكير بالحاجات الحلوة
 علشان اداء بابا الانسانى قل  اليومين دول
فضحكت وابتسمت وقولت ناولينى يا ام العيال كمان بصلة  
فقااااااااااااالت تؤتؤ  البصلة دى من نصيب  زج زج 
قرب يا واد ساعد ابوك واتنحرر كده بدل ما انت عامل زاى البلهارسيا كده 
فقلت يااااااااااااااااااااااسلام فعلا يا ربى لك حكمة


اتى السؤال من بعيد باكيا
جئت اليك للاجابة باحثا
لما لا تكون للاخلاق مربيا
وبحسن المنطق   تتزينا
وكأنى انظر اليك متعجبا
انك تأخذ السفهاء قدوة"
حان الوقت ان تزيح عنى الالام
وتعيد فتح المسام
فيتنفس خلقك الكريم
وتهلل وتذكر مكبرا
  بأروع الكلم معبرا
فنظرت للسؤال  واخذته فى احضانيا
لا تبكى وخذ هذه البصلة ذابحا
ستساعدك ان يكون دمعك جاريا
فضحك السؤال وكركرا
قلت له
لا تحزن
لقد فهمت ما تريد  يا سؤاليا 
ولن اكتم مسام اخلاقيا
وبحلو المعنى ستكون المعانيا

منك لله يا زج زج

24 Response to "انتحار البلهارسيا"

Tarkieb Says:

الحمد لله ان الحكومة لم تتدخل لاحسن كانت خربتها...انت عارف ان اي بحث عالمي لما يجي بيتكلم عن فيروس س بيقول ان للفلاحيين المصريين ذنبهم في رقبة الحكومة المصرية لما كانت بتحقنهم بالجوز المقئ tartar emetic في السبعينات لما كانت بتعالج البلهارسيا كانت الوحدة الصحية بتستخدم نفس الحقنة لحد لما عدتهم كلهم بفيروس س.....يعني كحلتها وعمتها....ولولا عبد السلام محمد ومحمد رضا لما عملو الحملة بتاعة الحبوب وادي ضهرك للترعة لكانت نسبة الفيروس س وصلت اكتر من دلوقتي --عشرين في المية----تفتكر لو كانت جابت بط كان اكيد ح تدخل مرض جديد....حكومتنا الغبية د ي تشبه الواد سامبو جارنا اللي كان صاحب الشغل بيديلو فلوس بس عشان يروح احسن يخربها له

سؤال تاني بقى انت مابتزورش الا مدونات الموزز بس؟ اصلي بصراحة باستغرب ازاي حاطيت اسمي عندك ووعمرك ماهوبت عندي....؟وربنا ما بقول كدة عشان تيجي لان حتى لو جيت ما حتفرق وبكرة تفهم كلامي....

MR.PRESIDENT Says:

احمد ربنا يا مولانا ..
إن ام العيال مدكتش كام بصلة كمان
كانت خلت قلبك حجر علي الحكومة اللي شايفة مصالح البلد ..
ربنا يسترها معانا ومعاك علي العموم أما الاخ زجزج فهو ذو حكمة بليغة وقولا سديدا فالحذر الحذر عشان اللي كانوا هيجبوا بط ومجبوش .. سلمت الأنامل يا زجزج
وادي دهرك للترعة
البلهاريسيا طول عمرها في جسمك ما هترعا
تا ترات تتا

ستيتة حسب الله الحمش Says:

بقة كده
اغيب يومين عن البلوج لا تسأل ولا تبعت جواب
خلاص ها أشتكيك لفشة قلبك :)

رأيي الشخصي قلته زمااااااااااااان

عملنا معهد تيودور بلهارس في علم عين شمس علشان نقضي على البلهارسيا
مات أعضاء هيئة التدريس وظلت البلهارسيا شامخة

عملنا معهد بحوث وقاية النبات علشان نقضي على دودة القطن
مات السادة اعضاء هيئة البحوث وتم تأبينهم وانتصرت الدودة وظلت شامخة

فيه حاجة فينا بتخلي الأفات "عادة" تبألظ وتحلو وتقاوم وتزداد "شموخ"

تحياتي وفكرتني بالبط

SHAPE YOUR LIFE (ABOALI) Says:

الى الريس
فعلا يا ريس
محتاجين ندى ضهرنا للترعة علشان الترعة تعيش

ولالالالالالالالالاايه

تقديرى الكامل

SHAPE YOUR LIFE (ABOALI) Says:

الى تركيب

شدنى التعليق لما فيه من بعض الاسقاطات المهمة
اسمح ليا ان اشاركك المناقشة فيها
اولا
الحكومة مخطئة بالفعل ولكن ايضا وعى الناس وادراكهم كان قليل بحالة الاستسلام المستمر
وظهر هذا مع قوقع البلهارسيا الذى انتحر من ملوثات البشر وليس ملوثات الحكومة
ثانيا
هدف البوست انى فى انفسنا اشياء نفعل فيها كما فعلنا فى قوقع البلهارسيا
من كتم انفاسها
وهى الاخلاق وما هو جميل

ثالثا

هناك كلمة احب ان تتزين اقلامنا بغيرها
وهى ان كانت دارجة فى لغة اهل الشارع
فاؤلى بنا نحن المدونين ذو العلم والخلق الكريم ان لا نستعملها
لانها تشكل اهانة مباشرة لشريكة الدرب
فهى ليست جسد وانما كيان نحن كنا فيه وخلقها الله وخلقنا ليكون الاكتمال
فهى الزوجة والام والاخت وووووو


رابعا

تقصيرى فى زيارة بعض المدونات انا اعترف به وليس له علاقة بسوء نية مقصود
او بنوع وجنس من يكتب فى المدونة

وضعى لبعض المدونات رغم عدم تعليقى فيها لا يمنع انى لا ازورها

خامسا

اعرف انى زيارتى لمدونتك او اى مدونة لن تفرق
فاءنا مجرد قارىء لفكر مطروح يعبر عن صاحبه

وتعليقى لن يغير فى ذلك الفكر
الا اذا كان فكر هذا الشخص مرن وقابل ان يرتقى ويعلو
وراغب فى الاستفادة من خبرات الاخرين

بالتاءكيد وجودك هنا يسعدنى
وتبادل الفكر يسعدنى
ولكن بعض الكلمات تغلق مسام فكرى
فلما نبدء من الان فى تنظيف بعض تلك الكلمات وتنمو بدل منها كلمات ترتقى بنا


تقديرى لشخصكم ورغبة فى تنقيح بعض الفكر الذى لا يعبر عن جوهر الشخص وانما حالة ضيق نمر بها جميعا او زعل
اعتذر ان كنت قد شاركت فيه عن غير قصد وظهر ذلك حين عرقت بعض الكلمات واخرجت روائح تحتاج حامل مسك ليغير رائحتها

SHAPE YOUR LIFE (ABOALI) Says:

الى ست الكل الفاضلة دكتورة ستيته

فشة قلبى وصلت ليها الرسالة وادركت
وسماااااااااااااااح يا بيه
احسن الفشة تنتحر وتذهب كما ذهب

المعهد و قسم النبات وقسم الحيوان
واظن قسم الانسان فى الطريق


لك كل التقدير الكامل كما تعلمى سيدتى

وان ليا معزة ابقى هاتى ليا بطة
نفسى اتصور جنبها

Hager ZaǮbal Says:

زجزج شكله هيطلع ذكي مش بياكل بكلام الاعلانات والحكومه :))

brightlyanny Says:

ازيك ابو على؟
والله شكرا بجد ع الافاده انا بجد اول مره اعرف المعلومه دى عن البلهارسيا...
(انها يعنى بتعيش ع الماء العذب)
وكمان جميل اوى موضوع اننا ندور ع الحاجات الحلوه جوانا بس ياترى هو كل واحد مننا عارف نفسه ومتصالح معاها بحيث يقدر يعرف ايه الحلو وايه الوحش فيها ويصلح الوحش.
ف كلمه دايما بتقولها الحكومه بتاعتنا(الشفافيه) عايزيين نوصلها لنفوسنا كمان بس تبقى شفافيه بجد مش بتاعت الحكومه..

ربنا يباركلك ف نفسك وف افكارك البناءه.
تحياتى

لـــولا وزهـــراء Says:

سٍيدى الفاضل ابوعلى

اولا امين على كل دعواتك لى فى البوست السابق فى رد حضرتك عليا اشكرك بجد
ثانيا فى انتظارك فى البوست الجديد عندنا عشان يهمنى راى حضرتك

ثالثا نبدا على بركة الله فى التعليق على البوست
جميل انك بتساعد زوجتك بس ياريت يكون الكلام ده بجد مش مجرد كلام للتدوين وبس ;) ;) ;)
على فكره دموع البصل دى مفيده اوى للعيون وكمان علشان تحس بقيمة زوجتك لما تطلب منها محشى او عجه فاكر العجه
:d :d :d
بالنسبه بقى لموضوع البلهارسيا اللى كانت تعيش فى مياه نظيفه ونقيه كلنا بنحب نعيش فى جو نقى نطيف سليم خالى من اى شوائب وعيوب لكن للاسف ليس كل ما يتمناه المرء يدركه ....

اشمعنى بط يعنى اللى كان هيقضى على البلهارسيا على فكره بط ده من اسماء الدلع بتاعى هههههههه

كل واحد فينا بداخله قدر كبير من الموده والحب والرحمه عارف حضرتك فى شعار لاحدى الرياضات العنيفه عباره عن دايره نصها ابيض ونصها اسود وفى النص الابيض داخله نقطه سوداء وفى النص الاسود نقطه بيضاء يعنى مهما كان الواحد اسود اوى من جوه هتلاقى فيه خير جواه والعكس صحيح ...

ممكن تبلغ اجمل تحيه الى زج زج لانه بسم الله ما شاء الله عبقرى وهذا الشبل من ذاك الاسد ربنا يحفظه لك ...

اتمنى ان تسود الاخلاق الفاضله بيننا جميعا وان يعم الحب والسلام والخير العالم كله
اتمنى ان نحيا فى جو نقى نظيف وخالى من اى شوائب


ادعو الله لك ان يهبك السعاده والفرحه على الدواااااااام


زهــــــراء

كلمات من نور Says:

داه كده مش انتحار يا أبو علي داه كده يا ولدي ماتت شهيدة البلهارسيا ...شهيدة تلوث ماء النيل
انت عايش في بيت فلاسفة يا أبو علي بدءا من الزوجة التي تذبح البصل حتى الوصول إلى حكماء الزمان زج زج وبج بج ودم الغزال ....وطبعا الوالد هو فيلسوف كبير (:

ربي يخليكم لبعض

فتاه من الصعيد Says:

ههههههههه

وحضرتك فاكر ان الحكومه بتبذل اي مجهود

ده مجهود ذاتي من البلهارسيا :)

تحياتي

العيسوى الصغير Says:

للميعرفش

لسه لحد دلوقت االناس بتغسل فى الترعة
وتستحمة كمان

شكل الاحزاب فى بلدنا كلهم يبدحوا بصل

انا ودماغي Says:

الولد زجزج ده كويس و الله
D:
عجبنى جدا تشبيهك اننا بنعمل فى نفسنا زى ما بنعمل فى البلهارسيا .

بس من فضلك سكت الاستاذ زجزج احسن يتمسك و انت استمر فى تقشير البصل عشان تبقى فى السلييييييييم
D:

الشـــــوكه النــاعمه Says:

نعيب زماننا والعيب فينا
زجزج ده مصيبه جاب المستخبى
اسفه عن انقطاعى الفتره اللى فاتت
تحياتى

بنك دم المدونيين Says:

نرجو الاطلاع على الفكره ونقدر مساعدتك

SHAPE YOUR LIFE (ABOALI) Says:

الى هاجر

كلنا اذكياء ولكن نحتفظ بالاراء فى دواخل انفسنا ونكتئب

تقديرى

SHAPE YOUR LIFE (ABOALI) Says:

الى برتلى

الجاجات الحلوة لها بريق ينادى من لم يتعرف عليها سيكون نائم بالتاءكيد

واجبنا اننا نصحيه علشان يشرب ويروى الجميل الذى يشعر بالظمأ فيه


دورك يا انسانة ياريت تعمليه

تقديرى

SHAPE YOUR LIFE (ABOALI) Says:

الى زهراء

ابدا من الاخر
واقووووووول مثلك

اللهم امين على دعائك

مساعدة الزوجات متعة لا يدركها الا العقلاء
فمهما كان فى القلب حب مكنون
وجودك مع زوجتك فى المطبخ له اسرار له فرح وبسمة لا تزول اهم حاجة عدم وجود عزول
ههههههههههه

اما عن ادراك المرء
نحن نصنع يا زهراء ما نتمناه وان لم نصنعه على الاقل نشارك حتى ولو بكلمة

ومن اجل عبير الورد لابد من المرور على الشوك

اما عن البط
اصلى يا فندم البط البلدى ليه قدرة خاصة على التحمل والصبر على القوقع
شوفى بقى انتى ليكى صبر ولا


اما عن زجزج وصلت ليه الرسالة وشايفه قاعد منتشى وطالب واحد كانز دايت
والاسد طالب طالب كوكتيل

وانا اتمنى مثلك ده
بس ده فى الجنة ان شاء الله
علشان دى اختبارات لينا

ولولا المعنى وعكسه ما كان المعنى

ولالالالالالالالالالالالالالالاايه

تقديرى لك المستمر

SHAPE YOUR LIFE (ABOALI) Says:

الى كلمات من نور

الله الله

البلهارسيا شهيدة

تصدقى فعلا
هى لم تتوقع هذا الاستقبال وحدث ليها حزن كبير على قوقعها

اه منهم البشر

كل عائلة ابوعلى تدعو لكم بكل البشر والسعادة
وتبلغكم انهم من صحبة الاخيار تأتى الكلمات والمعانى

ربنا يهبك كل الخير ويهب الخير لك

تقديرى

SHAPE YOUR LIFE (ABOALI) Says:

الى فتاه من الصعيد

ههههههههههههههههههههههههه
جمييييييييييييييل التعليق المختصر الفعال ده

اشكرك على البسمة التى تبسمت بها حين قراءت التعليق

SHAPE YOUR LIFE (ABOALI) Says:

الى العيسوى الصغير

اممممممممممممم بس اكيد العيسوى الكبير
كان احسن مننا وكان فاهم انى الميا نعمة
وتلويثها نقمة

تقديرى لوجودك الاول واتمنى تكرار الزيارة

والا هاشتكى للعيسوى الكبير حول

SHAPE YOUR LIFE (ABOALI) Says:

الى انا ودماغى
هههههههههههههههههههههههههههه
هما سبوكى من المعتقل امتا

وانا اقول المدونة ريحتها باظت والواد زجزج مساك دماغه

يا مرحب يا مرحب

هاتى كيلو بصل وانتى جاية المرة الجاية

ولالالالالالالالالالالالالالالالالا ابلغ السلطة عليكى تانى


تقديرى وعودة موفقة

SHAPE YOUR LIFE (ABOALI) Says:

الى الشوكة الناعمة

يا فندم مشرفانى دايما
ولك كل الدعوة بالخير والصفاء والنقاء وراحة البال

كنت هاسلط عليكى زج زج بس سامح المرة دى


تقديرى العميق

SHAPE YOUR LIFE (ABOALI) Says:

الى بنك الدم

ان شاء الله نشوف ونشارك

تقديرى