شخرم ماسورتك

, الثلاثاء، 11 مايو 2010



سمعت كام كلمة رائعة فى معناها ومضمونها

فقلت فى نفسى ايه الكلام الجميل ده

فقامت الاذن ( الودن يعنى ) بتأدية وظيفتها بإدخال الكلام الى داخل العقل

حتى يتم التفاعل معه

فاءذا بى اجد الكلام قد وقع من الاذن الاخرى ( الودن الاخرى يعنى )

وقامت الاذن بعمل تنفيط للكلام

بشكل ادى الى ان تتصارع الاذنان وحيث انهما لم يلتقيا بحكم التكوين

جرى تبادل لفظى حاد اتهمت فيه الاذن اختها الاذن الاخرى

بالعمالة والخيانة والمؤامرة ووجب ان يتم قطع الاذن الخائنة

وفجاءة يظهر من بعيد رجل يحمل قنديل

تم تزويده ببنزين 92 العالى الجودة

ويقول هذا الرجل فى اشتعال حكيم

لما يا اذن تتصارعين مع اختك

فالكلام قد دخل منك والمفروض ان كانت مراكز المخ تلتقته

وتبدء فى التعامل معه والتفاعل

فقالت الاذن ولما لم يحدث ما تقول ؟؟ هل قام احد بِعض الكلام !!!!!

فقال لا

ما حدث هو عملية حدثت تحت جنح الظلام قامت على اثرها القوات الغير حليفة

بعمل ماسورة قام فيها رجال شجعان وهبوا حياتهم لخدمة الاهواء

بتوصيل تلك الماسورة بين الاذنين

وكان مواصفات تلك الماسورة متوافقة مع المعاير الدولية

وحاصلة على الايزو الماسورى

وصفات تلك الماسورة كانت

صماء اى لا تحمل اى ثقوب وفى مسمى اخر خروم

صلبة حتى لا يُحدث بعض الكلام ضغط على جدارن الماسورة من الداخل فنتهار امام بعض الكلام ذو المعنى

الماسورة مبطنة من الداخل بالفرو الغالى الثمن مع وضع طبقة من الحرير

حتى يتدلع الكلام وينزلق ويخرج فى هدوء دون ازعاج لمراكز المخ

حتى ترقد فى سباتها العميق المتعمق

الماسورة جرى تأمنيها

بعرض مستمر لفيلم مناظر مدته 24 ساعة امام مراكز المخ

حتى تشعر دائما انها تفكر وتعمل حتى لا تقع تحت بند المراكز البطالة نجسة

وقامت ببطولة الفيلم قناة مزيكا قناة الافلام

قناة دلعنى وارقص وقناة انت احمر ولا ابيض

ويتخلل الفيلم فيلم وثائقى تحت عنوان ستار اكاديمى بنوتات ناناو شوباب مزمز

مع مزيج من اعلانات روشن وفكر وافتح كازوزة و اشرب بلوظة

ولا تنسى جوايزك معانا اتصل وحمل احدث الرنات

ابوالليف ابو الصابون ابو القطة ابو الفار ابو الكلب وابو ابوك

وهنا تعجبت الاذن وتهامست الاذن الاخرى والحل ايه يا حكيم

الحل اننا نشخرم الماسورة

بوضع ثقوب فيها لكى نستفيد ونفيد

ممن نقرء ونتعلم ونرى ونشاهد لنحسن التعامل

كما كتب لنا رب الخلق ووضع فينا العقل مناط التميز لكى نستخدمه




ياااااااااا ترى هاتبدء تشخرم ماسورتك

ولاغيرك هايشخرمك



على جنب جالى هاتف يقول

سيدى الرئيس ابنك شاب

يرسل الى سيادتكم صك مختوم

به بصمتى وزيادة فى التاءكيد

قمت بقطع الاصبع الباصم

رمزا" منى للصدق

محتويات الصك

1- اتعهد بعدم اكل اللحمة ومقاطعة اخواتى الكائنات الحيوانية

2- نظرا" لاءن حواء نص المجتمع فقد قررت التنازل لها عن نصفى

3- اقر واعترف انى لن اكون حاملا بطاقة انتخابية و سأرد بطاقتى الشخصية حين الطلب

4- اؤكد على احقية رئيس الدولة فى البقاء مدى الحياه واحتفاظ الاسرة بالدولة

5- اقر بأحقية وزارة المالية بعمل ضريبة تنفس على الاوكسجين الذى اخده بغير حق

لذا سيدى الرئيس اطالب سيادتكم

بطلب واحد بسيط ارجو تلبيته

واعرف مدى حرصكم على مواطنى هذا البلد البسطاء

وهذا الطلب هو

ان تقوم قوات الامن المركزى بإقتحام تلك الماسورة الواصلة بين الضفتين الملقبتان

بالاءذنين

وتقوم القوات بعمل فتحات تهوية باءستخدام الخراطيم المائية ذات الدفع الذاتى

مدعومة بالاسلحة المنوعة وقوات الدفاع المدنى وتشخرم الماسورة شخرمة تنفطر لها كل المراكز المخية حتى اشعر سيدى الرئيس

انى لازالت انسان

وليكن شعار الفترة الرئاسية القادمة

من اجلك انت هنشخرمك

البوست القادم

مكاكا كاكا

16 Response to "شخرم ماسورتك"

ستيتة Says:

ما أثاره البوست في نفوخي

1- نحن نعلم يقينا بوجود مؤامرة فرقة بين الشعوب حتى يسهل اختراقها
ما سر التعليقات التي وصلت اليوم بين ابناء الوطن لسب الرسول سب صريح في جريدة الدستور ده غير مساجلات المصريين وكل اطياف العرب
طب ما احنا عارفين
امال مصريين نشترك ليه في المؤامرة؟
السر في الماسورة
شخرمها يارب من عندك


2- نظرا" لأن حواء نص المجتمع فقد قررت التنازل لها عن نصفى
بدون نصفك تتنازل حواء عن كلها
وبنصفك تكتمل حواء وتكون كيان كامل
مش عارف؟
معقول مش عارف؟
خلاص ها نخلي ربنا يهدي الرئيس علشان يشخرم الماسورة :)
تحياتي

كلمات من نور Says:

- اقر بأحقية وزارة المالية بعمل ضريبة تنفس على الاوكسجين الذى اخده بغير حق .
-----------------

فيه غلطة مطبعية هنا يا أبو علي أعتقد انت تقصد ثاني أكسيد الكربون اللي احنا بنتنفسه مش الاكسجين يا راجل.
------------------
لذا سيدى الرئيس اطالب سيادتكم
بطلب واحد بسيط ارجو تلبيته
واعرف مدى حرصكم على مواطنى هذا البلد البسطاء
وهذا الطلب هو
ان تقوم قوات الامن المركزى بإقتحام تلك الماسورة الواصلة بين الضفتين الملقبتان
بالاءذنين
وتقوم القوات بعمل فتحات تهوية باءستخدام الخراطيم المائية ذات الدفع الذاتى
مدعومة بالاسلحة المنوعة وقوات الدفاع المدنى وتشخرم الماسورة شخرمة تنفطر لها كل المراكز المخية حتى اشعر سيدى الرئيس
انى لازالت انسان
----------------------

انت بتطلب كتير كده قوي قوي وبافكر ابعتك جولة على البلاد اهو تاخد كام يورو على كام دورار سلفه أو معونة علشان نقدر عليكم ...ايكش تتشخرموا مليتوا البلد .......وعجبي

---------------------

يا ترى لو بيرم وجاهين كانوا لسه عايشين كانوا حيقولوا إيه؟؟؟

شكلهم كانوا حيكاكوا زي البوست الجاي بتاعك........خالص تقديري

لــــ زهــــــراء ــــولا Says:

سيدى الفاضل ابوعلى
-*-*-*-*-*-*-*-*-*-*

النهارده فعلا كنت محتاجه اقرأ حاجه جديده لحضرتك وبالفعل بوست كالعاده متميز
اكيد عارف المثل اللى بيقول ودن من طين وودن من عجين ..

ماحدش بقى بيسمع كل عاوز يتكلم
من فتره كنت باتكلم مع مجموعه من الشباب وقولت لهم عارفين احنا ليه عندنا ودنين ماحدش عرف لان ماحدش فيهم بيسمع كله عاوز يتكلم وبس ....
اعتذر ان الكومنت المره دى مش على مستوى البوست طبعا انا مش اقدر ارقى لمستوى حضرتك لكن عن جد شوية ظروف مش قادره اعلق على البوست بجد لكننى قراته باهتمام .....

زهراء

غير معرف Says:

انتا تانى اتقى شر الحليم اذا غصب سيدك الرئيس ساكتلك
بس مااظنش على طول
والنبى تخاف على نفسك
بس بينى وبينك البوست جااااااامد اخر حاجه
وبجد عجبنى وكتباتك مميزه بس ودى فى داهيه
وهاشخرمها انشاءلله
تحياتى

جنّي Says:

السلام عليكم

ومش بعيد نخصخص شخرمة المواسير ونلاقي ناس ماشية في الشارع تقول كالون الباب نعمر ومواسيرك نشخرم واصاااالح الكراسي ..

اما مقاطعة اللحوم فالشعب مجبر لا بطل .. ونفسنا في ماسورة عجل نشخرمها على فتة بالتوم والتربية ..

تعرف يا ابو على كنت بفكر في كتابة بوست عن قناة بورنو دعبس المدعبس بعد ما ورانا كيفية البوس اللي بجد وجد بالصوت والصورة على قناة الرياضة وعرفنا المسكوت عنه لان الشعب المصري الغلبان ما بيعرفش والدليل ان احنا 85 مليون بس .. جم ازاي ما اعرفش .. يمكن لاقيناهم على باب الجامع .. يمكن

قولي رأيك اكتب ولا بلاش وان كانت نفسي مسدودة اصلا عن الكتابة ..

والكاكا دي الفاكهة ولا الكاكا اياها ها نستنى ونشوف ..

سلام

yara Says:

الماسوره دى فعلا مش بس ممكن نطلق عليها ماسوره اللامبالاه بل ان ممكن نطلق عليها ماسوره هدم الكيان البشرى لان وظيفتها انها بتلغى العقل وتخدره وتجعله فى حاله السكون دائما لا يفكر فيما يسمع او يقرا او يعلم ..لذلك ليس فقط ما نحتاجه هو ان نشخرم الماسوره بل اننا نحتاج ان ننقلها ونجعلها تصل بين شىء اخر غير الاذنين فتكون واصله بين الاذن والعين والقلب والعقل والاجمل ان يكون لها فرع محسوس يصل للضمير فتجعل الانسان بالفعل له كيان ملموس ومؤثر بدلا من ان تلغى هذا الكيان ...ما ذكرت من عوامل اعتقد انها ادت الى زياده صلابه وتبطين هذه الماسوره ولكنها ليست العوامل التى بنت او انشاتها لان الانسان هو الذى بنى بارادته هذه الماسوره ثم جاءت هذه العوامل لتجعلها مهيئه لان تاخذ الايزو فى صلابه المواسير ولذلك وحتى وان لم تنتهى هذه العوامل بامكان الانسان ان يتخلص من تلك الماسوره بارادته وهناك الكثير والكثير من الافكار التى اذا تمكنت من العقل والقلب حقا تكون عوامل مزيله ناجحه لهذه الماسوره .
1-النظر للحياه بعمق اكبر وادراك معنى انك ايام فاذا ذهب يومك ذهب بعضك يجعلك تستغل كل يوم فى حياتك استغلال حسن
2-الايمان بانه لايوجد ما يسمى صدفه وانما مشيئه الله هى التى تسوق لك ما تسمع او تقرا او تعلم لتحمل لك رساله ومعنى يجب ان تعمل بها فى حياتك.
3-يجب ان يكون كل فرد فينا على يقين بان الله ميز كل انسان عن غيره بصفه او ملكه لا يتفوق عليه احد فيها لذلك هذا المعنى يجعلك تثق فى نفسك وتحترمها وتثق ايضا فى الاخرين وتسمع لهم باهتمام وحتى لو كانوا لا يطبقون ما يقولون فقد تستفيدانت من فكرهم فى حياتك .
4-البحث دائما على من يساعدونا الى التخلص من هذه الماسوره البائسه من الشخصيات الايجابيه التى لها فكر وحكمه وخبره لا تقدر بثمن .
5-التخلص طبعا من كل ما ذكرت من عوامل اجتماعيه تساعدنا على ان نرتقى بفكرنا .
6-فى بجد برنامج اسمه مجددون البرنامج ده اكد لى ان لسه الشباب عندهم فكر ويقدروا يواجهوا اى تحدى طالما فى اراده وهدف وعمل جماعى منظم وايمان بالنجاح ومنافسه شريفه .
7_طول ما فى ناس ذيك يا ابو على يبقى دايما فى امل مش بس اننا نشخرم الماسوره ونبقى انسان بمعنى انسان ..لكن وجود ناس لهم مثل فكرك يعطى امل بان نكون حقا عظماء.

ده يمكن اللى جه على بالى وانا بكتب دلوقتى لكن لو لقيت حاجه تانيه هقوك مع ان اصلا الشخرمه دى شغل كيمياء بقى ومذيبات مفيش حجاره هتاثر فيها بس احنا بنساعد برضوا علشان بس جمعيه الرفق بالكيميائيين .

بس بجد بوست جميل جدااااا يا ابو على ودايما تشبيهاتك كده بليغه ورائعه ودقيقه وبتخلينى انتبه لاشياء كتير جدا ممكن تدمر الانسان لو استسلم ليها

لك جزيل الشكر والتقدير

ودومت بخير داااااائما.

yara Says:

ههههههههههههههههههههههههه

يااااااربى ايه التعليق اللى طول منى ده

معلس معلس يا ابو على

يلا بقى انت اللى جبته لنفسك

واهو كمان تعليق بجمله الرخامه اللى انا فيها

sony2000 Says:

هههههههههههه
علي راييييييييك
وربنا يسترهاااااااااا

richardCatheart Says:

جميل طبعا البوست وعالى جدا اسلوب ومضمون
بس هاختلف معاك فى نقطه
مين اللى حط المسوره احنا ومش حد تانى
صحيح الاغرات قويه معاك وانت ضربت بيها مثل واضح ومميز بس كل واحد مركب مسوره هو ركبها بنفسه علشان يريح دماغه
ويطفى اللمبه ودا بسبب الاحباط الدائم اللى الناس وصلت ليه
وماحدش هاينفع يشيل المسوره غيرنا بردو
احنا اللى لازم نعرف ان المسوره دى مش بس فى ودنا لاء دى مغروزه فى قلوبنا ومنعا عننا الحياه
التفكر والاعقال هما الحياه

اما عن مقاطعه اخونا الحيوانات
الكل قاطعها غصب عنه ولا تزعل

وموضوع التنازل عن النص بتاعكم دا
لالالالالا متشكرين نصنا مكفينا وفايض
ثم ان نصكم خشن اوى احنا نصنا ناعم وجميل هههههههههه

شكرا ليك على البوست الجميل والمضمون الجميل والاسلوب الاجمل

SHAPE YOUR LIFE (ABOALI) Says:

الى الفاضلة الدكتورة ستيته

امممممممممم

ده الموضوع كبير بقى يا دكترة
ماتيجى نفتح شركة حضرتك وانا اسمها

شخاريموا

ونحدد بقى السعر على حسب عدد الخروم

فكر كده ياباشا

وانا معاك


اه يا نفوخى اه

خالص تقديرى

SHAPE YOUR LIFE (ABOALI) Says:

الى كلمات من النور

هههههههههههههههههههه
بنطلب كتير اه

حتى الماسورة ليها ايزو يا اختى

اه منك يا زمن حملت بنى انس لم يشعروا يوما بالانسانية


تقديرى لما كتبتى

SHAPE YOUR LIFE (ABOALI) Says:

الى زهراء
االفاضلة زهراء اراكى تجهدين نفسك معى حين تعلقى وتبحثى عن المعنى والكلمة

سيدتى كلنا بشر اللى ياءتى على بالك قوليه
فلو كان التعليق حرفان فهذا عن صدق يرضينى

وان كان بدون تعليق ايضا يرضينى

ويكفينى ان تكتبى مررت من هنا

واسئل الله ان ينفعنا بما نكتب ونكتب ما ينفع

وخالص تقديرى

ويقينا لن نكون ودن من طين او عجين
لان من قرء الان لابد ان يغير رايه

SHAPE YOUR LIFE (ABOALI) Says:

الى الشوكة الناعمة

هههههههههههههه
خلى بالك على نفسك
اينعم اينعم

وعلشان كده نكتب
علشان اخلى بالى من نفسى

تقديرى لما كتبت ها هنا
واتمنى عودتك فى الزيارة ولا تخافى على نفسك

SHAPE YOUR LIFE (ABOALI) Says:

الى جنى

ههههههههههههههههههه

ما انا يا جنى هافتح كشك الشخرمة قريب

ابقى تعالى خدلك كام مفك

واكتب يا صاحبى ولا تخاف انت جنى

اكتب اكتب

بس ابقى قولى هاتكتب امتا علشان انت عارف برضوا ومجرب

والكاكا معروفة ومكاكا اخوهاااااااا

ههههههههههههه

يا فندم وجودك يسعدنى

SHAPE YOUR LIFE (ABOALI) Says:

الى سونى

يا هلا يا هلا بالناس اللى عندها امتحانات ودراسة

روحى يا بنتى شخرمى ماسورتك وذاكرى

عسى ان ينفعنا الله بعلمك


والله الموفق


تقديرى ودعواتى

SHAPE YOUR LIFE (ABOALI) Says:

الى richardCatheart

تقديرى اكيد لما كتبتى واوضحتى من وجهة نظرك

وده بحبه جدا فى التعليق لانك بتحسى انى الشخص قرء بوعى وادراك

لذى شكرى مرة ثانية

ام عن ادوار المجتمع ودورنا فى صنع الماسورة

اكيد لكل منهم دور وفى يدنا اكيد الحل
والاستعانة بالحكومة مش معناها هروب

ولكنه اسقاط
يعنى الاستعانة واردة من صديق او شخص ملم وفاهم فى النصح عن طريق يستطع دلنا على طريقة عمل ثقوب فى الماسورة

لذا

كل انسان دوره نعم والاستعانة بالغير ايضا ملطوبة

وربنا يجعله عامر

ويسعدنى زيارتك وعودتك مرات و مرات