طرشى الحياه

, الخميس، 6 مايو 2010



الوا


دم الغزال ده واد رايق

كان سامع الحديث اللى دار بينى وبين زجزج عن الكلكعة والاوتيزم

شوية وقرب منى وقال

يا بابا انت غالى عليا وخايف عليك من النعناع الكتير

برضوا ان زاد عن حده بقى فيه ضرر

وبدل ما تفكر لوحدك فى الحل خلينى افكر معاك والحياه يا بابا مشورة

صح يا يا دم الغزال كلام جميل و زين

بص يا بابا انت طلعت مش مكلكع باعترافك

بس كنت محتاج تتعالج علشان انت طلعت اوتيزم

واذ بى ترتسم على وجهى علامات التعجب واقول

ياااااااااااا ام العيال الحقينى

شوف يا زجزج بابا محتاج ايه ؟

لالالالالالاء بلاش زجزج علشان خاطرى

واذ بدم الغزال يا بابا بلاش تهرب من الواقع

انت خدنى فى صفك والعلاج موجود وانت ابويا ضنايا

بجد يا دم الغزال انا ضنااااااااااااك ؟

اكيد يا بابا ده حقيقى من الواقع

احنا مجتمع واحد مترابط فى صورة اسرة

انت يا بابا بتفكر اكيد فى حل للكلكعة والاوتيزم

وتفكيرك هايكون منصب فى ثلات نقط

الاولى

هى انى الناس تطبق الدين

علشان تشعر بقيمته الايجابية فى تيسير حياتهم ومعاملاتهم

وقربهم من ربنا

بس ده بابا حل طويل الامد

والناس بقت بتشتغل نفسها بدل ما تشتغل اساسا"

ولو الواحد فى يوم قعد امام قناة الناس

يصحى تانى يوم

يسب كل المجتمع ويقول

اننا مجتمع منحل كافر مرتد نتيجة الفهم الخاطىء

اقول ايه بس يا بابا مأساه صدقنى

النقطة الثانية

انك تكهرب الشعب

علشان تُزيل الكهرباء اثار سنين من السير بدون هدف ولاتخطيط

وده حل مكلف

لاءن توربينات السد العالى مش هاتكفى

خصوصا كمان يا بابا

انى دول حوض النيل حالياً

عاوزة تعطى مصر بانيو صغير تطرطش فيه بدل الحوض

النقطة الثالثة

انك تنتظر انك تفتح مدرسة شكِل حياتك

وفى الحالة دى هاتستورد مربين من كوكب بلوتو

وده مكلف جدا لانى بلوتو طالب سعر عالى

بسبب هبوط مستوى الاخلاق والمبادىء عند بنى الانس

ايه يا دم الغزال ده

حرام عليك خليت نفسى مسدودة عن حتى النعناع

يا بابا ان الله مع الصابرين

اصبر كده الحياه زن وفن

يعنى مرة تكرار علشان تصلح

ومرة تعلم وتطور اسلوب التعامل مع الناس

ايون يا دم الغزال ايون علم ابوك ضنااااااااااااااااااك

كمل يا دم الغزال نتعالج ازاى ؟

بص يا بابا يا جميل انت يا منعنع خالص مالص

فى القرءان كل التعليم بالمثل والقدوة

لو الناس كانت بتقرأ بقلب مفتوح كانت عرفت

واستطاعت انها توصل كل شيىء بسلاسة

والجيل الجديد امثالنا ماكنش طفش وحدثت الفجوة

وعلى راى الشيخ الشعرواى كان يقول

الفرق بين المسلم الذى يقرأ القرءا ن والاخر

انى المسلم يقرئه بغرض الهداية

والاخر يقرأ بغرض النقد والنقض

كلامك معقول يا دم الغزال

قطعت فشة قلبى وقربنى منك يا ابنى

و من محرابك التعليمى

ده انت طلعت غزال غزال

العلاج والحل علشان احنا طولنا واتكلمنا كتير

وان اوان التركيز ولابد من تحديد المعالم والحدود

فاكر الطرشى يا بابا

فاكر يا سيدى فاكر الطرشى بيفتح النفس

بنشتريه اما فى اكياس او برطمان

هو احنا ناويين نفتح محل طرشى يا دم الغزال

علشان رمضان قرب ولا ايه

يا بابا اصبر وكن صبورا تتبسم لك الدنيا ويسقيك الله شرابا طهورا

دوختنى بالكلام ده يا واد يا دم الغزال يا معلمة

ماشى ماشى اتريق يا بابا اتريق بكرة

ابو الصابون هايكون مثلك الاعلى بدل ابو الليف

طيب يا سيدى كمل

لما ننظر يا بابا لبرطمان الطرشى وتصفه

اولا الشكل الخارجى اول لما نشوفه

هانشوف ايه ؟

هانشوف انى ليه معالم وحدود

يعنى نقدر نمسكه ونحدد مكانه وشكله

ثانى حاجة شفاف علشان نشوف المخلل وانواعه من جوا

صليت بينا على النبى يا بابا ولا ايه

اللهم صلى عليك يا خير هدى

ثالت حاجة ندخل شوية جوه

هنلاقى ايه

مخلل اشكال متعددة منها على سبيل المثال لا الحصر

بصل – جزر - زيتون – خيار – فلفل - لفت - الليمون ووووو

تمام يا دم الغزال

هانشوف رابع حاجة ايه يا بابا

ماء الطرشى وده لما نقرب منه

ونبدء فى تذوقه يمكن يكون حادق شوية او محتاج ملح

الخلاصة يا بابا

اذا لم تتقبل انواع المخلل التى فى البرطمان بعضها البعض

ستجد البصل يدمع قلب الجزر

والزيتون يتجبر على الخيار

والكرنب يزكم انوف اللفت

وهكذا وتكون حرب المخلل الشعواء

ولابد ان يفهم ايضا الجميع

انهم يشربون من ماء واحد وهو ماء الطرشى

وكيان واحد يجمعهم فى صورة وشكل البرطمان الشفاف

وبدون ان تتقبل انواع المخلل تلك المعيشة

هايكونوا مكلكاعين و اوتيزم زينا

لذا

الدين هو المعالم والحدود الواضحة ( البرطمان)

البشر من يملاء الحدود والمعالم

فى اختلاف للطبع والشكل ( انواع المخلل )

الارض هى التى تجمع البشر تعطى وتأخد ( ماء الطرشى )

القرب من الله و تمنى الوقوف بين يديه طائع ساجد عابد هو الشفافية

التى تجعلنا برضا نفس وقناعة

نبتسم ونضحك احيانا نحزن ونتألم احيانا نمرض ونتعافى احيانا

ولكننا نعرف من خلال تلك الشفافية

ان هناك حكيم يعرف كونه ووضع مقاديره

ولم يحمل انفسنا ما لانطيق

فقط ينقصنا ان نعمل بما نعرف ونعرف مالانعمل للعمل به

وعلشان نفهم موضوع الطرشى والبرطمان صح

لازم نعمل وقفة تكون بحكمة

الوقفة يكون فيها زوم لكى نرى ما لا نريد ان نراه



وصدق دم الغزال حين يقول منشدا

الحياه طرشى

فاختر نوعك وتذكر ان من حولك لهم انواع

المذاق مختلف اشكال الوان

فاءن قررت الرحيل فاعلم

ان الارض واحدة والمالك الله

فتقرب من البصل وتعجب كيف تدمع عيناك منه

وانظر بطرف عينك ترى اللين فى الخيار اختيار

وتذوق من الجزر الشموخ صامدا

ومن بعيد ترى الزيتون فتقول سبحان اخضر واسودا

فيجرى عليك الفلفل متفلفلا منى الشطة والمحشى ولا اعذبا

فلا تبتعد عنى فهو خلق الرحمن الاوحد ا

فتصفق له اوراق الكرنب وسيقانه و تفرح

فيضحك اللفت قائلا انا اصل المخللات ولا اروع

فينهض الليمون عاصرا نفسه لا تنسونى

بى يحلو الطعم ما اجمل

فاءن اردت شراء الطرشى فخذ العنوان وابحث

عم جمال فى الجمالية موجود عايش

عم حسين فى الحسين واقف

عم احمد فى مصر الجديدة جديد

عم محمود فى اسيوط متسيط

عم قرنى فى الغربية جميل مقطط

عم محفوظ فى اسكندرية بحراوى

عم محمد فى الشرقية كريم بينادى

الست سعاد فى المنوفية يا عينى

الست بهية فى الدقهلية ولا اروع

الست جميلة فى الاسماعلية سمسمية

الست نبيلة فى فى السويس على المينا

ولسه كمان وكمان

احنا خلق الرحمن

اشكال مناظر الوان

عيش معاهم كلهم فى امان

علشان يوم الحساب

تقول كل بنى الانسان

كان ليه كيان

والتفاعل كان

بالحسن والبيان

لانهم

يااااااربى

عبيدك

وامرك كان سارى

كن فكان



وفعلا

وما الحياه الا طرشى


البوست القادم

جنية البحور


30 Response to "طرشى الحياه"

لـــولا وزهراء Says:

سيدى الفاضل ابوعلى

احسن دم الغزال فيما قال
البشر مثل المخلل ..
هناك البصل هو الشخص الذى ما ان اقتربت منه لمسافه بسيطه سوف تنهمر دموعك وقد تكرهه ولا تحاول الاقتراب منه

هناك الجزر الذى يكون صلب وقوى ولكن ما ان تحتبره الايام حيتى يصبح لين وطرى وسهل التشكيل...
وهناك الخيار " الذى اعشقه بشده " الذى لا يمكن تشكيله غير بطريقتين اما تاكله طازج او تخلله وكلك هناك من البشر من يعرف الابيض والاسود فقط ولا يعترف بأى الوان اخرى ...
هناك الزيتون الذى يكون مر وغير محبوب ولكن عندما يتم تخليله تعرف فائدته ومذاقه وكذلك اصناف من البشر قد تكرهه فى البدايه ولكن ما ان تقترب منها حتى تكتشف مدى جمال روحها

وهناك الكثير والكثير ....

سيدى لابد ان نتعلم كيف نتعامل مع كل اصناف البشر لان حياة كل انسان فينا لابد ان يتقابل مع صنف او اكثر من المخلل اقصد من الناس ...

الرجوع الى روح الدين وكيفة التعامل مع البشر سوف تغير من حياتنا الى حياه افضل ...
لكن فى النهايه نحن نعيش على الارض ولسنا فى الجنه فلابد ان نقابل اصناف ونتعامل مع اصناف اخرى وكثيره ....

المره دى من غير اى مدح ...
بارك الله فيك وجزاك الله خير

زهـــراء

كلمات من نور Says:

القرب من الله و تمنى الوقوف بين يديه طائع ساجد عابد هو الشفافية
التى تجعلنا برضا نفس وقناعة
نبتسم ونضحك احيانا نحزن ونتألم احيانا نمرض ونتعافى احيانا
ولكننا نعرف من خلال تلك الشفافية
ان هناك حكيم يعرف كونه ووضع مقاديره
ولم يحمل انفسنا ما لانطيق
--------------------------

ربي يعظم لك نورا يا أبو علي انت و العائلة كلها ....امثلتك من الحياة والواقع تخلي الشباب والكبار يعجب بالكلام وقلبه يزداد نور على نور ...

يهدي الله لنوره من يشاء ....


نيجي بقى للمخلل والطرشي ....انا محتاجة مية خمسين برطمان علشان يرفعوا الضغط ..ههههههههههه

MR.PRESIDENT Says:

هههههههههههههه
وانت ابويا ضنايا عجبتني وسؤالك البرء بجد انا ابوك ضناك ؟

المشكلة ان المحاور صعبه تلعب عليها كلها مره واحدة والناس اصلا مش بتحاول تتغير

يعني في خلل في الخطاب الدين إما يخاطب عقل بحت أو يخاطب روح بحت وفي كلا المطلبين لا يسمو للثاني والحل الخلط بين الجزر والخيار

حته الكهربا احيانا المجتمع يحجتاج كهربا حتي لو غالية وعالية وصعب وجودها

أما اللاعيبة الأجانب ربما يكونوا شرارة

تحياتي

ستيتة حسب الله الحمش Says:

انا رأيي الكهربا اهون كتير من انك تفهم الطرشي
"ان بقاء الخيار مع الجزر مع اللفت مع الزيتون لا تضر احدهم
بل يحدث نوع من التكامل يرضي جميع محبي الحاجات الحرشة" :)

Tarkieb Says:

كلامك لفت نظري انت يا ابني من خيار الناس .. ولو حد بصل يشوف قناه الطرشي عمر برطمان مامته ما ح يطلع.. لانها قناه للطرش مش الطرشي

richardCatheart Says:

هههههههههههههه طيب من فضلك ب5 جنيه مشكل اهو ندرب فيهم
والله كلام جميل بس تفتكر سهل الاغلبيه العظمى من شعبنا مسلمين ودينا حثنا على التعايش ولينا امثله كتير فى المصطفى عليه افضل الصلاه والسلام

وبالرعم من دا مافيش تعايش لاحد بيفهم مع حد اقل منه فى الفهم
ولا حد متدين مع حد اقل منه تدين
ولا حد من مله مع حد من مله تانيه
ولا حد بيشجع نادى مع حد بيشجع نادى تانى
ولا غنى مع فقير
وحالات التعايش عندنا قليله اوى
وكده متهيئلى التعايش فكر لازم نربى ولدنا عليه
علشان يطلعو زى دم الغزال ابو دم خفيف

dalia Says:

أهلا يا ابو على
لي سؤال ده حوار الطرشي مباشر ولا متخيل؟

المدوناتى Says:

بعد السلام عليكم

بجد حاجة تفتح النفس

فعلا ما الدنيا الا برطمان طرشى كبير

كلام جد

من عاش فى طاعة الله وذاق لذة الايمان
فاز بنعيم الدنيا والاخرة

تحياتى وخالص تقديرى

صباح الخير Says:

بعد السلام عليكم

بجد حاجة تفتح النفس

فعلا ما الدنيا الا برطمان طرشى كبير

كلام جد

من عاش فى طاعة الله وذاق لذة الايمان
فاز بنعيم الدنيا والاخرة

تحياتى وخالص تقديرى

سمكه واحده Says:

وما الحياه الا طرشي
وكل واحد والطرشيه اللي تبعه
صح صح يا ابو علي
وحشني وجودي هنا
اخبارك ايه
والله كلامك حكم
اجمل شئ في الدنيا القرب من الله سبحانه وتعالي
من غير تشدد او تعصب
الحياه حلوه بس نفهمها
والدين جميل بس نستعوعبه ونعرفه صح
هننعم بحياه جميله لان حياتنا دي كلها تجربه وحياه زائفه الحياه الحقيقه في الاخره
دي مجرد تجربه ليس اكثر
ربنا يطلعنا منها علي خير

تسلم ايدك يا ابو علي

الشـوكة الــنـاعـمـة Says:

دى تقريبا تالت مره اقرا يوميات الاسره اللذيذه دى
وبجد كل مره بتعجبنى عن اللى قبلها
الناس فعلا انواع سواء كانوا طرشى او غيره
فى الاخر فعلا انواع
انا متفقه معاك فى ان الناس لازم تطبق الدين عشان تحس بالايجابيه
جميل كمان ان الولد يحس بالمسؤليه نحيه باباه كأنه ضناه
تقبل مرورى
تحياتى

جنّي Says:

السلام عليكم

ازيك ياعمنا ها اقول ايه واعيد ايه .. ابداع ورا ابداع وافكار ولا اروع ..

بس تفتكر الواحد لمل يجي يعرف نفسه يقول انا من خيار الناس ..

على فكرة معتقل المغول موجود طول ما فيه حسن .. قصدي حسن الهلالي ..

سلام ورحمة

ماما أمولة Says:

تسلم ايدك يارب يا ابو علي

فاطمه Says:

والله العلاج دا مثالي ودم الغزال طلع بجد معلمه ،بس برده مش كل الناس تقدر عليه ودا ميمنعش اني احاول ، بوست رائع كالعاده .

yara Says:

ابو على
من اول يوم بدات فيه تدوين وانت بتحاول توصل معنى ..بتحاول دايما تضع بصمه نور فى طريق من يقرا لك لتوضح لهم كيف ان الحياه بكل تحدياتها نستطيع ان نواجهها ونعدل الاوضاع ونحقق الاحلام ..تعلمت من كلماتك الكثير فهى ليست فقط نتاج ادبى اتامل بلاغته واتقانه ولكنها معانى بل كنوز اتمنى ان استغلها فى حياتى ..لذلك قررت اخد كده فتره مراجعه للمعانى دى ومحاوله تطبيق على الاقل بعضها فعليا فى حياتى ولمده معينه وهشوف فعلا فى المده دى ايه اللى هيتغير فى حياتى ..وهشوف برضوا الفرق بين القول فقط والتعليق وبين التطبيق ..

يمكن ده قرار اخدته لان حسيت انك وصلت ليه معانى كتييييره جدا وبصفتى انسان له عقل وقلب وحواس قررت استغل كل ده فى انى اعيش بالمعانى دى بصدق .

تحياتى لك يااااااا ابو على واتمنى ان تنتفع قبلى بكل ما كتبته والا تنسانا من صالح دعائك ...وهنياااااالك يا فاعل الخير والثواب..

SHAPE YOUR LIFE (ABOALI) Says:

االى زهراء

رائع تحليك هذا يا زهراء وهو تحليل ذكى اضاف كيان وتفاعل جديد للطرشى بالفعل
واضاف للمعنى بشكل مميز
واوضح ابعاد اخرى فى انواع المخلللات

وبدون تقبل المخلل لذاته سيحدث تنافر مؤكد

وفعلا نحن لا نعيش فى الجنة ولكن بتقبل نسبة معقولة ممن حولنا سنعيش يقينا فى رضا
لاننا لسنا فى دار العذاب
بل فى دار الكد والاجتهاد والاختبار
باءمكانك اكل الرمان وتقولى سبحان الله
وباءمكانك ايضا اكل الرمان
وتقولى ايه ده هو انا هافضل اكل حبة حبة هو ليه متعملش كتلة واحدة

اختصارا" التنوع فى الحياه يجب وجوده لنستفز فينا المشاعر ويخرج من يحلل ويخرج من يتكلم ويخرج من يعالج

ولكن
الدعوة تكون فى تاءلف على اعتبار اننا بنى انس
ولسنا فى معالجة كائنات اخرى


بدون مدح يا زهراء
انتى انسانة رائعة فكريا" مميزة انسانيا"

تقديرى العميق

SHAPE YOUR LIFE (ABOALI) Says:

الى كلمات من نور

ههههههههههههههههههه مية خمسين طرشى

هههههههههههههههه دا انتى كفاية تمشى وسط الناس
والضغط يبقى ضغطين

ويافندم ربنا يعفو عنك من الضغط كله ويصبح ضغط ابتسامات وفرح ان شاء الله

ربنا يتقبلنا بكل خير
ان شاء

SHAPE YOUR LIFE (ABOALI) Says:

الى الرئيس
ههههههههههه
ايون ايون
بس برضوا التوازن مطلوب
لانك ممكن تجمع الجانب الروحى والجانب الجسمانى لانهما لا ينفصلا عن بعضهما

بس شكلك كده متريش ومش همك الكهربا

على العموم نجرب موضوع الاجانب دول واول ناس نكهربهم يمكن يكونوا قدوة لينا

مشرفنى دايما بتعليقك الجميل الذى يقرء ما بين السطور ويستلهم منها

شكرى وخالص تقديرى

SHAPE YOUR LIFE (ABOALI) Says:

الى الفاضلة دكتورة ستيتة
هههههههههههههههه

الحاجات الحرشة المتحرشة فى تحرش كامل متكامل وعجبى على المخلل يا متحرش انت

فعلا محتاجين مجهود كاءنك يا دكترة بتحللى ماء بحر فعلا

ومطلوب فعلا تكامل حتى نفهم حقيقة كينونتنا

بس يا ترى الضرايب على الكهربا دى هاتكون بكام

شوووووووووووووف بقى وقولى يا زميلى

تقديرى العميق

SHAPE YOUR LIFE (ABOALI) Says:

الى richardCatheart

جميييييييييييل جدا التعليق ده يا فندم وعجبنى فكرة التعايش والتقبل
ووجود امثلة يجب تطبيق التعايش فيها ولكننا لا نطبقة
نعم نربى من الصغر
ولكنك انتى ممكن ان تبدئى من الان
كل من يعلق الان يستطيع ان يدرك الان انه يجب ان يتقبل الاخر
فلو كان عدد من علق عشرة مثلا
سيكون عندنا عشرة ادركوا ان الحياه تعايش ويبدؤا فى جذب عشرة مثهلم وهكذا
حتى لا ناخد بيد بعض فى سهولة ويسر

جميل ان تعليقك ها هنا

تقديرى

SHAPE YOUR LIFE (ABOALI) Says:

الى تركيب

ههههههههههههههه
لالالالالالالالالالالالالالالالالالالالالالا ياءس مع الطرش
فهناك سماعات خاصة الان لهم

وطالما ندق على الابواب لابد يوما ان تفتح

خالص تقديرى

SHAPE YOUR LIFE (ABOALI) Says:

الى داليا

ههههههههههههههههههههه
لافندم فيه منه بالزيت الحار وفيه منه زيت خام

تؤمر باييه

ههههههههه

مشرفانى يا راقى

SHAPE YOUR LIFE (ABOALI) Says:

الى المدوناتى

مرحب فى اول زيارة يا مدوناتى

ولا تنسى دفع ثمن الطرشى اللى انت اخدته

هو الدخول زاى الخروج
ولالالالالالالالالالالالالالالالالالالالالا ايه


مشرفنى فى الطرشى الاول

SHAPE YOUR LIFE (ABOALI) Says:

الى صباح الخير

هو انت جاى مع المدوناتى ولالالالالالالاايه

كده التسعيرة بقت دوبل يا رجالة
وكل واحد يشوف كل طرشى بكام
ويدفع بدون ما الشطة تشتغل


تقديرى

SHAPE YOUR LIFE (ABOALI) Says:

الى سموككككككككككة

فعلا يا سموكة انتى فعلا من خيار الناس
فى كلامك كده ليونة وبساطة ربنا ينعم عليكى بكل الخير وكل السعادة واليقين فى حياتك

اللهم امين
وكلامك يضيف فعلا الى اى كلام يكتب لانه كلام خرج من القلب ووصل الى سمك الكيان

ولالالالالالالالايه

تقديرى

SHAPE YOUR LIFE (ABOALI) Says:

الى الشوكة الناعمة

الواد يحس بباباه كاءنه ضناه
الله عليك انت كلام مؤثر فعلا

على فكرة بدون ان يتحمل الابناء المسؤلية
سيتعرضون لمشاكل الحياه ويفقدون روح المواجهة

ومبسوط ان العائلة اعجبتك ومبروك كسبتى تذكرة خروج مع دم الغزال لزيارة محلات الطرشى القربية من الحسين

ههههههههه

خالص تقديرى

SHAPE YOUR LIFE (ABOALI) Says:

الى جنى

هههههههههههههههه
معتقل المغول ده هانخلله وهايبقى مخلول
واسم الدلع ام الخلول

ولعلمك بقى يا جنى
انت فعلا من خيار الناس
ومش هاقول اكتر من كده والريس زغلول بيصبح وبيقولك جاهز للعملية ولا البصل لسه بيدمع

هههههههههه


تقديرى

SHAPE YOUR LIFE (ABOALI) Says:

الى ماما امولة الرائعة
يا فندم بتلك الدعوات نحيا ونستمد جميل المعانى

فالولا قلوب صافية ماكنت اقلام تجتهد

اشرق الله وجهك بنور يقينه ومحبته ووسع فى رزقك ورزق اسرتك وحباكى بكل ما تقر به عينك

اللهم امين

تقديرى

SHAPE YOUR LIFE (ABOALI) Says:

الى فاطمة

دم الغزال بيدور على عروسة تكون برضوا معلمة
اقترح يا فاطمة انك تخرجى معاه فى رحلة
وتنقى ليه واحدة تكونى طرشى كده على بذنجان لزوم التفاعل الحار مع باقى الفلافل

ان شاء الله اعتمد عليكى فى الموضوع ده
وكمان اعملى ميزاينة لدخل دم الغزال علشان قايمة الدخل بتاعته بقت فى العلالى
وبيقول انا من جزر الناس يعجبك كده


هههههههه

تقديرى يا انسانة

SHAPE YOUR LIFE (ABOALI) Says:

الى يارا

ما نثرتيه يا يارا نقلة نوعية جديدة فى حياتى انا
واستفز فيا اننا يجب ان نضغط على زر اوستوب

لكى نعمق فكر التطبيق والتحرر من كثرة ما نحمله من كلمات كلها تتدعو ان نتحرك

ولا نقف محلك سر
واان الاوان لتلك الكلمات ان تنزل الى ارض الميدان ليحدث لها الاختبار الحقيقى فى ارض الملعب

ان شاء الله يهبك الله قوة اليقين والارادة حتى تكونى مشعل يتحرك ويضيىء لنفسه وينير لغيره

وكل دعواتى الطيبة انتى تستحقينها عن جد وثقة


تقديرى لما نثرتى وعبرتى واوجزتى