جنية البحور

, السبت، 8 مايو، 2010


هبت رياح خماسينية اثارت العديد من التساؤلات خلال الفترة الحالية

واطاحت بالعديد من الرقائق التى تسمى سواتر او فى مسمى اخر ملابس

وتحولت تلك الملابس الى مسمى اخر اخذ منحنى

اما مينى او نانو او فمتو فى بعض الاحوال بدون

ومن بعيد يمكنك ان ترى مع وجود ضباب على النظارة انى تلك الملابس

فى المعنى يعنى

اصبحت رش

كأنك ان اردت ان تلبس ما يدعى البنطال

او نتيجة التحريف اصبح نوعه برمودا باستطاعك فقط ان تطلب زجاجة وتبدء فى الرش حتى تصمم لنفسك البنطال المناسب ومن صفاته الاكيدة ان يكون ظاهر لجمال تلك المقعدة كما نراها عند القرود ومش عيب برضوا مهو الحيوانات كائنات للقدوة برضوا وهنيالك يا محب الجمعية الحيوانية

ثم يأتى الدور على بنى حواء

فترى عنوان كبير يسمى الجراءة اللحمية

ف لكى تكون جرىء طحن او جرىء جاااااااااامد

اتبع المثل القائل اللى يظهر منك ده زكا عنك

وكلما تكشف اكتر ستقترب من الحيوان الذى تحبه اكثر

واتصل على زيرو تسعومية هنكلمك

والكلام مش كفاية الرؤية فن فن وحكاية

فعلا وضع يدعو للتأمل

فحدثت الصاعقة بعد الرياح تعويم للجسد

فبعد قراءة الفاتحة والتشهد على الجينه المصرى على الرغم من الاستعانة باسطول الحملة الفرنسية ومحاولة شامبيلون فك رموز عوامة الجينة

الا انه قد استلذ بالغرق وغرق

فهبت علينا رياح التغير واصبح تعويم الجسد

فحدث للجسد تضخم وترهل واصبح المعروض كثير كثير ولكن الفائدة منه والعائد قليل قليل

فنظر اليه الناس نظرة الاستهجان ولكن بدون الرفض

نظرة القرف دون الزجر نظرة الغابة دون الانسان

فحدثت فوضى الاختيار

وسئل البعض من الذى اختار

ان كان كل الظاهر قد قام بتعويم جسده

وتعرى فى بحر ملذاته ليتذوق لذة وقتية

ولم يسأل لنفسه السؤال

كم عصى الكثيرون من قبل ولكن ان ذهبت لذة معصيتهم

عندما رايت الصورة فى اعلى

استفزتنى تلك الكلمات





قوليلى يا جنية البحور

عندى سؤال بين النوافذ محشور

فارس الحلم حقيقة ولا وهم مكسور

جاوبى عليا بصراحة دنا قلبى بحور

الم حزن تايه وعيونى نهر شجون

قوليلى واَصدِقينى القول

الامل موجود ولا ليه اسوار وحدود

القمر ليه نوره خافت

الشمس ساكنة وفى الخسوف باتت

قوليلى وخلى صوتك عالى

سَمعى بقى طنين مسموع

ربيع ايامى خريف متواصل

مطر الشتا موج وانا غريق شاهد

ثلوج فى دمى والنبع بقى مش صافى

قوليلى يا جنية البحور


هاقول وخلى بابك مفتوح

الفارس على الحصان خيال

قطب جنوبى شمالى شغال

باحث وحلم الاميرة ظاهر عيان

خريطة فى القلب محفورة

فى ثناياه راسم الصورة

على العرش كائن كيان

حَسن الوجه منير سبحان

باسم صبوح للفرح ناظر

عينه ضمة والفتحة بصيرة

الكسرة حياء علامة وشيما

والجر كان اخلاق كريمة

والجزم كان معلوم

والعلامة ثبوت النون

نور رحمان رحيم مقرون

نبى هادى مصطفى رسول

الماس ماس مهما دارت عصور

الفارس حلم واقع رافع راية

كتب عليها معنى ميرسال

اميرتى باحث عليكى انا

خادم ليكى قبطان حارس

ضمتى سكنك فؤادك

قلبك عنوان بريدى

رسالة ليكى مكتوبة

كرات حمرا كرات بيضا

قطرة دم بصمة فصيلة

قطاع فيلق عليكى بينادى

الندا عالى للسما داعى

جنتى فى الدنيا انا ليكى ساعى

كونى فى الانتظار اصيلة اصالة

كبار الزوار ليكى تحية

مرحب بيكى ومأذون شاهد

شهود للفاتحة قارئين

بسم الله

الرحمن

الرحيم

الحمد لله رب العالمين

الرحمن الرحيم

مالك يوم الدين

اياك نعبد و اياك نستعين

اهدنا الصراط المستقيم

صراط الذين

انعمت عليهم

غير المغضوب عليهم

ولا الضااااالين

ونقبل الكف فوق الكف

ونقول اميييييييييييييييين

زغروته جميلة من الحلوين

عقبال كل انسان

لله يا محسنين


دعوة للادرك

ان جمال الخلق هو كساء الجسد ومفاتنه العلى

فاءن لم تدرك فسئل يا قبرُ ماذا بقى من رفات الجسد


البوست القادم

شخرم ماسورتك

19 Response to "جنية البحور"

لـــولا وزهراء Says:

سيدى الفاضل ابو على

-*-*-*-*-*-*-*-**

اسمح لى ان ابدا من حيث انتهيت حضرتك

"ان جمال الخلق هو كساء الجسد ومبلغ مفاتنهُ بلا حسد "

احسنت بهذه الجمله اتلى تختم بها هذا الحديث الاكتر من شيق
عارف حضرتك من فتره كنت ادرس كورس كمبيوتر يعنى كنت انا المدرسه المهم الطلبه كان مستواهم المادى عالى شويه دخلت لاقيت شاب البنطلون ساقط قولت له ادخل الحمام ارفعه قال لى ليه قولت له عيب معاك بنات راحت بنت قالت على فكره دى الموضه يا انسه :-O
اتصدمت بجد رغم انى باشوف المنظر فى الشارع والنادى لكن عن جد كان اول تعامل ليا مع البنطلون الساقط

ان شاء الله لى عوده تانى

زهراء

SHAPE YOUR LIFE (ABOALI) Says:

الى زهراء

اعتذر كامل الاعتذار لانى قد غيرت فى تلك الجملة الاخيرة
وقد اعدت نشرها اكثر من مرة
وكنت افكر فى الغائها حتى ياخد الكلام المعنى الرومانسى كما كنت احب
ولكن بعد قرئيتها وضعتها من جديد ولكن بتعديل رايت فى وجهة نظرى انه الاصلح

وعودة لك موفقة ان شاء الله
واشكر لك صدارة التعليق
بهذا المثال الرائع لما يترجم الواقع

كلمات من نور Says:

"ان جمال الخلق هو كساء الجسد ومبلغ مفاتنهُ بلا حسد "

---------------------------

سبحان الله يا أبو علي لما قريت البوست ضحكت علشان النهارده كان عندي اتنين شباب عمال صيانة الكونديشن والاتنين واقفين متشعلقين عالسلم والبنطلونات دقيقتين وتسقط والالوانات ( علشان القافيات ) باينه من تحتها مسخرة حقيقية ودقيقتين ولقيت البنت اللي بتشتغل عندي عيونها طلعت لبرة وحاطه ايدها على صدرها وهي مش مصدقة مناظرهم .......وبعدما نزلوا بتقولي وحياة ربنا كنت خايفه يا مدام البنطلونات تجع (تقع ) منهم ...دي جلة حيا ( قلة حيا )....ربي يرزقنا الستر دنيا و آخرة يا أبوعلي يا أبو المفهومية ...تحياتي

ستيتة حسب الله الحمش Says:

البوست عميق؟
دي عادة
لكن مضحك جدا مع كل الحقيقة
دي جديدة

وهنيالك يا محب الجمعية الحيوانية

مش ممكنة دي
اضحك الله سنك ونفعك ونفع بك


تحياتي

جنّي Says:

السلام عليكم

كنت ها اقولك بتسأل جنية ليه وجنّي موجود .. طلع كلامها معسول في طبق بنور معطر بعطور الفاتحة والقرآن ..
والفجر أذن وها اقولك اعذرني ها اغادر البلوج على طول ..

انا بس نفسي اعرف يا عني ايه شخرم ماسورتك ها استنى ولا تجيبها من الكنترول ..

سلام يا ابو علي يا جن ..

تحيتي

richardCatheart Says:

ههههههههههه يمكن بيحاولو يثبتو نظريه دارون الله يجحمه ماترح ما راح

شوف ياسيدى انا مع الحريه كل واحد حر عايز يقلع يغور يقلع عايز يلبس ياريت يلبس

انما الاصل هو الستر كون الدماغات اتغيرت واتوسخت دا بردو مايغيرش من اصل النظريه وهى الستر

كل اللى بيقلع ويبين نظمته زى القرود
اغلبهم عندهم نقص حقيقى
فى ناس مش محجبات ولبسهم محترم جدا
وفى ناس محجبات ورشين دواخل وخوارج

للاسف هما مش فاهمين انهم كده بيخلو نفسهم زى اى سلعه معروضه ويبقى من كل اللى يتفرج يقول رايه يعععععع
دى معفنه اه بس فيها ايه حلو افففففف
دى وحشه الله دى حلوه
زى انواع الشبسى اللى ضررها اكتر من فايدتها دا لو فيها فايده

وعلى راى ابويا الله يرحمه
لاشعر نافع ولا جمال شافع
متشكرين على البوست الحلو دا

الشـوكة الــنـاعـمـة Says:

اخى الكريم البوست له معنى كاالعاده وهادف
بجد الشباب زودوها اوى فى حكايه البنطلونات الساقطه دى
وخصوصا هما وناولين او طالعين العربيات
ببقى نفسى اقوله ايه الارف دع الغريب انى قريت فى موقع بص وطل عن نفس الموضوع وكانوا جايبين تقرير عن خطوط تاموضه للرجال 2010_2009
وكمان كانوا مستعينين برأى مصممين ازياء ونفواان عاده تسقيط النطلون تكون موضه او تمت للموضه بشىء
زكانوارافعين شعار اسموا ارفع بنطلونك لو سمحت
زانا بضم صوتى لصوتهم
ثانيا والبوست جميل والشعلا كمان
تسلم ايدك
تحياتى

الشـوكة الــنـاعـمـة Says:

عذرا ع لاخطاء الا ملاءيه
الكيبورد انجليزى بس ومطلعه عينى

لـــولا وزهراء Says:

سيدى الفاضل ابو على

-*-*-*-*-*-*-*-*-*-

عن جد خجلى من كلام حضرتك مش عارفه اكتب اى كومنت يعنى كنت السبب ان الجمله لا يتم حذفها ....
على فكره كل كومنت حضرتك بترد به عليا احتفظ به عندى لانه شهاده اعتز بها ....

حضرتك نعيب زماننا والعيب فينا
تقريبا وصل لنا كل ما هو تكنولوجى من الخارج ومع ذلك اخذنا منه كل ما هو سلبى يعنى هاحكى لحضرتك على موقف كنت من حوالى شهر فى رحله الى القاهره وفى منطقة الحسين بالتحديد وجدت بعض السياح حضرتك تتفرج على ملابسهم بسيطه جدا جدا ومافيش ميك اب وحاجه رقيقه اوى تعالى بقى اتفرج على الجروب اللى كان معايا فى الرحله البنات معظهم مش عارف يفرق انه فى رحله او رايحه فرح يعنى الميك كامل متكامل والحجاب اسبانى ونص الشعر باين واكسسورات ايه كبيره وضخمه
اما الشباب اللى بتاع اللى هو ممكن نقول على بنطلون واقع وتى شيرتات عليها جماجم وكلام تقريبا مش فاهمين هو ايه ........
بجد كرنفاااااااال

ربنا يرحمنا فوق الارض وتحت الارض ويوم العرض عليه

اللى يعيش ياما يشوف وبما انى فى مدينه ساحليه يبقى الصيف ياتى ومعاه كل ما هو جديد فى الموضه
بالمناسبه اقول لحضرتك احدث موضه فى الحجاب ان لازم ولا بد ومن المهم ان خصله من الشعر تكون نازله على الجبين والعين الشمال نصها طاير ومش باينه لان الخصله دى هتدارى على العين وياحبذا لو الخصله لونها ذهبى او اصفر ملعلع هههههههههههه
والله موضه

اسلوب حضرتك فى طرح الفكره اكتر من رائع بارك الله فيك

زهــــراء

SHAPE YOUR LIFE (ABOALI) Says:

الى كلمات من نور

ههههههههههههههههههه
هاتقع يا ستى هاتقع
الحيقيييييييييييييييييييييينى يا امى

هى مش هاتقع
علشااااااااااان هى رش

وربنا يوفقك ونعمل رش اوسع شوية

مشرفانى دائما

SHAPE YOUR LIFE (ABOALI) Says:

الى دكتورة ستيته

البوست عميق متعمق له ابعاد ارتوازية كبرى واحتمال وجود ماء فى الابار قائم لوجود حالة من النهجان الميتوزى
متوافقة مع حالة لحمية جذابة
توحى بعدم حاجة الشعب الى اكل اللحوم الحيوانية لان هناك نوع اخر يسمى لحوم انسانية بدءت بالظهور

يا فندم والله
من تبسم وضحك هو انا
ربنا يجمع لك شتات حياتك ويهبك السعادة

تقديرى

SHAPE YOUR LIFE (ABOALI) Says:

الى جنى

قوووووووووم صلى يا عم وادعى لينا
ربنا يهبك لنا حسن الاستقامة وحسن الخلق وحسن التعامل وحسن الادراك وحسن اليقين وحسن الادب وحسن المودة وحسن الرؤية


مع تحيات الحسنات تزيل السيئات


خالص تقديرى

SHAPE YOUR LIFE (ABOALI) Says:

الى richardCatheart

فعلا صدق الوالد
لا شعر نافع ولا جمال نافع
ماينفع ما يثبت فى الارض ويستحسنه الناس وترضى عنه السماء

ويتبقى دائما الستر هو العنوان

خالص تقديرى لتعليق محترم واعى

SHAPE YOUR LIFE (ABOALI) Says:

الى الشوكة الناعمة

الهدف من البوست مش البنطال الساقط فقط ولكن استحسان حالة العرى
ولم يدرك احد ان من يتعرى هم الحيوانات فقط
فلما نريد الاقتراب من الحيوانات بتلك السرعة


جزاكى الله كل الخير على المتابعة المستمرة
وارائك الصائبة

SHAPE YOUR LIFE (ABOALI) Says:

الى زهراء

هههههههههههههههههههه
حلوة حكاية الموضة الجديدة دى
تصدقى لم اكن واخد فى بالى
هاركز بقى علشان اشوف واعين
هههههههههههههههه

فى الحقيقة يا زهراء هى حالة توهان محترم
من النوع اللى يقدر بالوزن
ولكن اطلاق الكلام والتعبير عنه واستحسان البعض لهذا التعرى هو ما يقلق
لان الخطء سيظل موجود ولكن استحسان الخطء والدفاع عنه هو ما يثير الرمال والريبة

لكن
يتبقى ان الناس اذ استمر احد يقول ويذكر ويحلل ويوجه
سيكون التعرى منزوى ومستهجن رغم تشبس البعض به لغرض فى نفسه

لذا
عندما نستمر فى التوجية والنصح باللين والكلمة والمعنى
افضل من التواجد الصامت الذى تنكسر عينه فقط

لذا احيى فيكى استهجان فعلا الشاب بالساقط بنطاله

وان رد البعض وقال هذه هى الموضة
فقولى له وانا اعرف موضة اكثر فى حدائق الحيوان حيث يلبس القرد بنطال به سقوط كلى


خالص لتقديرى لقلم محترم

brightlyanny Says:

ازيك ابوعلى
موضوع البوست بتاعك المره دى حساس اوى وعايز كلام كتير بس انا شايفه ان المشكله دلوقتى ف الموضه البايخه اللى بيقولو عليها ان الشباب او البنات اللى بيشتروا الحاجات دى مش بيكونو شايفيين وهما بيشتروها انها غلط يعنى من كتر مهم شايفينها قدامهم من بيشفوها غلط
ودى نفس فكره الشخص اللى بيسافر بره لدول اوروبا مثلا احنا لما بنسافر بنشوف بعض تصرفاتهم غلط وغير مناسبه لاسلامنا انما هما بيكون ده شئ عادى بالنسبه ليهم وده اللى بنغلفه بفكره اختلاف الثقافات
الموضع كبير ابوعلى اتمنى لو ينفع يتناقش باتساع اكبر من كده

جزاك الله اخى كل الخير وربنا يوفقك

فاطمه Says:

بنطايل رش صحيح والله عندك حق يا ابو علي لكن انت عارف الازمه المليه يدوبك الواحد يجيب رش يغطي بيه جسمه ،بس بيحب الفيل يعمل اي؟، طبعا انلا متفقه مع حضرتك في الراي م100في الميه ،وبالنسبه لموضوع العروسه طلب دم الغزال باشا موجود عندي انجليزي عربي اللي يحبه هيلقيه تجاره زي ما انت عارف كمان لازم تزودله الايراد اليومين دول عشان العروسه بقي خروجات وكده وبكده تتظبط قايمة الدخل .

SHAPE YOUR LIFE (ABOALI) Says:

الى برتلى

فينك يا انسان وحشنا التفاعل معاك

ان شاء الله تكون بخير
وفعلا عندك حق
ساعات علامات الخجل تخجل مما تراه الاعين

ربنا يهب لنا الستر

اللهم امين


خالص التقدير

SHAPE YOUR LIFE (ABOALI) Says:

الى فااااااااطمة

ههههههههههههههههههه
يا عينى عليك يا واد يا دم الغزال
اتطمئن على مستقبلة

و يا سلام بقى يا فاطمة لو تعملى كده الميزانية بتاعة الزواج ده وتحسبى الفايدة المناسبة اللى هاتعود عليه واذا كان هايكون فيه شريك متضامن يضمن حرية تعبيره

علشان انتى عارفة الواد دم الغزال ده مساهم فى كل سجون البلد

اوووووووووومال ده واد خلاصة


خااااااااااالص تقديرى ومستنى الميزانية