زج زج وبج بج ودم الغزال
, الاثنين، 30 مارس 2009
زج زج وبج بج ودم الغزال حدوته كانت امى بتحكيها ليا وانا طفل
وكانت دايما بتقول ليا فى الحدوته انى زج زج وبج بج ودم الغزال
دول ولاد المعزة وتحكى الحدوته وتقول فيها
انى زج زج هو الكبير
وبج وبج هو الوسطانى
و دم الغزال هو الصغير
وتحكى بقى تفاصيل الحدوته و هما عملوا ايه وكانوا بيسمعوا الكلام ولا لأ وهكذا
وانا علشان كنت منخفض الذكاء ايامها يعنى ( ولسه بايان كده )
كنت بقول هو ازاى ولاد المعزة بيتكلموا
واشمعنا دم الغزال اللى هو اصغر واحد فيهم كان هو اللى دايما" على حق
(اه منك يا زمن)
فكنت لما اشوف المعزة اقول ليها
روحى اجرى اجرى ربى ابنك زج زج وشوفيه عمل ايه
مااااااااا علينا من زمان
ندخل على دلوقتى
زج زج وبج بج ودم الغزال اكيد انتو عارفينهم بطريقة او باخرى
ماهو يعنى مش امى بس اللى اخترعت ليا زج زج وبج وبج ودم الغزال
اوعى يكون اخترعتهم بجد ( ياااااااقلبى اتخدعت فيكى يا امى )
ماااااااا علينا مرة تانيه
اللى فتح الموضوع ده
اننا عاوزين نعمل حركة تتدونيه قصصية
كلنا نتحد ونكتب مجموعة قصصية عن زج زج وبج وبج ودم الغزال
وبدل ما كل مرة دم الغزال هو بتاع الخير والناصح اللى فيهم
نحاول نغير شويه فى الحدوته القديمة
و نخلى بج بج مرة يطلع كويس وكمان زج زج يطلع حلو مرة
واليكم مجموعة من الافكار علشان نفتح شوية الفكر القصصى التتدوينى
زج زج وبج بج ودم الغزال
اصدقاء بيحبوا بعض
زج زج وبج ودم الغزال
ليهم حلم واحد
زج زج وبج بج ودم الغزال
عندهم خبرات مختلفه
وغيرها طبعا من الافكار الجاااااااااامده اللى هاتفكروا فيها
يعنى عاااااااااوز تقول ايه وجعت دماغنا ب زج زج وبج بج ودم الغزال بتوعك
حاااااااااااااضر حاضر
مش هو ده الكلام اللى بتقولوه عليا دلوقتى ماشى ماشى ( المسامح كريم)
ليا رب اسمه الكريم
امرى لله
عاوزين نبدء من جديد فى حكاية ونثر قصص هادفه
نربى فيه كل اللى نعرفه واللى حوالينا
على معانى وعبارات وجمل جديده يفهموا فيها الواقع
ويكونوا مؤثرين فى مجتمعهم ويكونوا نور لغيرهم
نربى طفل واعى مؤثر يفهم الصح والغلط ويعرف يدافع عن الحق
ويرفع راياته
علشان نخفف شويه من حالة التخريب العامة اللى سايدة الايام دى
وكمان الاناماليه المنتشرة
وكل واحد يقول وانا مالى
وكمان بنحس انى الناس مكبرة مخها بطريقه سلبيه جدا"
وكثيرين عايشين فى جزيرة منعزلة مع نفسهم
بدون التعاون مع غيرهم
فوصلنا الى حالة من العته المغولى الانبعاجى
ومش بس كده ده فى اشاعة بتقول
انى الكواكب التانية رفعت علينا قضية
وبيقولوا علينا اننا عندنا غباء برجوازى
يعنى قصدهم اننا اغبيا ومخنا تخين
( اوبااااااااااااااااااااااااااا نهارنا مش معدى )
وبيقولوا كده لاءنناااااااااااااا حتى الان لم ندرك قيمة اننا انسااااااااااااان
ليه عنوان ومبادىء ( هو يعنى ايه مبادىء)
يلا بينا شاركوا معايا واكتبوا عن زج زج بج بج ودم الغزال
والثواب عند الله وعمل الخير بينفع
وانا متنازل عن حقوق النشر
لــــــــــ زج زج وبج بج ودم الغزال
بص جوه المعانى
وخلى بالك من الكلام
ده كلام ذو مغزى
مش هرتله والسلام
واقرء مرة مره تانية
والحقيقه تبان
أُومال ليه نافش ريشك
وبتقول عليك فهمان
وعجبىىىىىىىىىىى
وعجبىىىىىىىىىىى
يااااااااه انا اول تعليق دي حاجة جميلة جدا
يا بختك بمامتك ربنا يخليهالك يارب كانت بتحكيلك حواديت انا كنت عايزة اعرف احداث القصة لكن واضح ان زج زج وبج بج كانو شوريرين ودم الغزال هو الوحيد اللي كان طيب فيهم
البوست جميل ومغزاه ولا اروع
تسلم ايدك بجد