اه يا بج بج

, الجمعة، 3 أبريل 2009


لى صديق كان فى المانيا مهندس اسمه محمد كان بيعمل هناك الدكتوراه


وكان هناك هو و زوجته وليه طفلان زج زج وبج بج


طفل منهم كان فى الحضانه فى المانيا

المهم رجع مصر بعد الدكتوراه


وابنه بج بج دخل حضانه هنا فى مصر


المهم شوفته ودار الحوار اللولبى التالى


ازيك يا محمد واخبار ابنك


محمد قال


والله يا حسن انا مش عارف انا حزين ومش مرتاح


قولت ليه خير يا ابو بج بج


فقال بج بج كل يوم لما يرجع من الحضانه بيعيط و يقول انا بتعذب يا ماما


انا بدمر يا بابا وكوابيس طول الليل ويقول فيها


حاضر حاضر ضرب لأ شيتمة اه


ولما انظر فى عين بج بج حاسس فيها بالغدر


وانه ناوى يجيب خنجر ويغرسه فى معدتى

قولت


لالالالالالالالالالا عيب يا محمد ابنك برضوا متربى


وانت ابن ناس ووراك رجاله اطمئن


قولت ليه ناصحا" قرب من ابنك بج بج وشوف ليه ده بيحصل


قال انا فعلا سئلته مالك يا بج بج يا روحى


فقال بج بج انا مش عارف اكتب الواجب بتاع الحضانه


و الابله بتضربنى وتقول انى ما بفهمش كويس


قولت ليه يااااااااااه يا محمد معقوله ابنك بج بج غبى


ده حتى بج بج كان فى المانيا بلد العالم الاول


وقولت ليه هو فى المانيا مافيش واجب ولا ايه


قال لأ مافيش


قولت نعم ازاى !


قال هناك فى فترة الحضانه الطفل بيتعلم بالمشاهدة


يعنى يشوف اللعب ويلعب بيها والابله (الميس يعنى بالعربى )


تقول ده اتوبيس و ده سيارة وغيرها من الوسائل


وتشرح تركيبهم وتفكهم امام الاطفال والطفل يجمع فيها تانى


او يروحوا الحدائق والمتاحف ويشوفوا الاشجار و بعض المناظر الطبيعية
ولا ياءخذ واجب



انا قولت


اووووووووووووووبااااااااااااااااا


وانا فطسان على نفسى من الضحك


وشايف بعينى بج بج بعد لما اتغير بيه الحال والواد شايل شنطة وسندوتش


و زمزميه واكياس الكاراتيه وكتب


وغير كده لما بج بج ها يركب اتوبيس الحضانه


والاتوبيس فيه اكثر من خمسين طفل وسعة الاتوبيس 15 طفل


اه من المشهد المؤلم


ولما الاتوبيس بقى يعتطل وبج بج ينزل هو الاطفال فى الشارع و يزق الاتوبيس


و بج بج هدومه بره والشحم على ايده والتراب يغطى فمه



ياى ياى ياى يع يع يع على المشهد قلبى عليك يا بج بج

وقولت اه يااااااااااا قلبى


اخذت محمد على جنب


وقولت اطمئنه


يا محمد لا تقلق على بج بج


دى مرحلة وهاتعدى عليه وبعدها هايتوافق مع الوضع وهايشعر بعدها انه تمبل


وانا بقول الكلمات دى ليه قلبى لم يطاوعنى وبكى على بج بج

وعيناى تهون على محمد وتطمئنه على بج بج ومستقبله الباهر



يا عينى عليك يا بج بج

وعلى اللى بيحصل فيك

هاين عليك تغز ابوك

بمطواه قرن غزال مصديه

وتقوله ده جزاءك

على اللى بيحصل فيا

عملت فيك ايه يا بابا

معقوله اكتب

كل يوم خس وجزر خمسين مرة

هما هايمنعوا الجزر والخس

يا حسرة عليا

يا بابا انا ابنك بج بج

ولا انت نسيت

ربينى النهاردة

وخلى عندك نظرة لبعيد

بج بج هو ولدك الصالح

بكرة يكبر ويدعى ليك

يا بابا انا ابنك بج بج

ضمنى ليك

خلى عندك ارادة وحاول تنقذنى

انا مش نسخة ليك

يا بابا انا ابنك بج بج



يا ترى فى يوم هانعرف نربى وننقذ بج بج

يلا نغير ونبدء



عانقت قلبى عندما ابكيته كى يبتسم
وعجبىىىىىىىىىىىىى

36 Response to "اه يا بج بج"

mahasen saber Says:

يا عينى عليك يا ابنى هههههههههه

انا بقول صاحبك بعد اليى بيتعمل فى ابنه ده يجمع شنطه ويلم ما ليه وما عليه وياخد عياله وعلى المانيا عدل ويا ريت ميبصش وراه احسن يرجع تانى

اصل البلد دى برغم ما فيها الا اننا برضه بنموت فيها

mahasen saber Says:

بس بج بج حصله كده من بس فترة الحضانه امال لما يشرف فى المرحله التعذيبيه الابتدائيه هيحصله ايه
هينتحر


بس برضه المدارس المصريه والمدرسيين المصريين بيربوا وبيطلعوا رجاله رجاله رجاله

mahasen saber Says:

اه نسيت ااقولك انى مبسوطه انى اوائل التعليقات عندك يعنى حاسه ببراح كده وانى فى صفحة التعليقات براحتى

ABOALI Says:

الى ام بيرو

ههههههههههههههههه
خلى بالك من بيرو
احسن يبقى بج بج

mohamed ghalia Says:

هههههههههههههه
ياااااااااااااااارب يجى اليوم ده
أنا مستنى اه
مش همشى غير لما يجى
ههههههههههههههه

mohamed ghalia Says:

أنا لسه مستنى يا أبو على
ياعينى عليك يابنى يالى لسه مشوفتكش

شمس النهار Says:

يعني اشمعنا الاسم الصعب ده
كده فهمت هنعمل قصه لناس افتراضيين اسمهم زجزج وبجبج ودم الغزال
ماشي ماشي
طب واعمل ايه في سلسلة الحب لما نخلص علي الحب
نشوف موضوع زجزج وبجبج ودم الغزال دول

ABOALI Says:

الى محمد الغاليه

بكرة ياءتى اليوم
ونشوف ونربى
ونعلم ونكبر
ونحكم ونحدد
ويجى دم الغزال ابنك فى الاخر
يغزك بحته قرن غزال ماركة ودعنى يا محمد


تحياتى يااااااااااا مستنى

ABOALI Says:

الى الحاجة شمس

معقوله صعب
حتى بج بج يزعل
انتى بس قوليه كام مرة و هو يبقى سهل
وانا منتظر السلسله

ولا تقلقى كلنا معاكى

موناليزا Says:

رسالة رائعة بجد ارجو ان تجد صداها من قبل المسئولين عن التعليم

فكرتنى لما كنت بشتغل (وبماانى تخصص رياض اطفال يعنى اعرف كويس جدا ان ممنوع تعليم الطفل الكتابة فى هذه المرحلة لاسباب كتير) المهم لقيت مدير المدرسة والوكيلة بيطالبونى انى انسى تماما اللى درسته وامشى زى ماهما عايزيين ويبقى فيه واجب للاطفال(مدرسة خاصة بقى)
فكنت بخليهم بالاسبوعين يكتبوا حرف الالف بس
(مش عشان هيخلص ولا حاجة بس لانه اسهل حرف ممكن يتكتب:))

ABOALI Says:

الى موناليزا

الاصح ان تصل الرساله الى الاباء اولا
باءن يفهموا طبيعة الطفل فى هذا السن
وحاجته الى نوع من التعامل مختلف
واكيد باحييكى على تصرفك المسئول مع الاطفال


واتمنى ان ترسمى البسمه دائما على كل من تقابليه


تحياتى

جنّي Says:

السلام عليكم

برافو عليك يا ابوعلي بدأت قصصك عن زج زج وبج بج بأهم شئ في حياتنا اللي هو مستقبل بلدناوولادنا .. التعليم يا سيدي .. وما ذكرته مثال بسيط جدا لفشل المنظومة التعليمية فشلا زريعا من بدايتها لنهايتها زمان التعليم كان بيخرج لنا انصاف متعلمين اما الآن بيخرج لنا أميين ..
تعرف ترتيب اعرق جامعاتنا ( القاهرة ) على العالم كام وبكم رتبة تسبقنا اسرائيل ؟
لو عرفت الجواب لك جائزة كبيرة جدا قد كده !!!
سلام ودعواتك لي بتمام الشفاء

dodda Says:

كلنا هذا الرجل!!!!


لا اذا خدت العيال وخلعت ع العالم الاول بدرى بدرى

إيمان Says:

يا عينى عليك يا عمر يا بنى
كأنك بتحكى عن بج بج بتاعنا
الواد كان داخل المدرسه ورده مفتحه
فضله ظاطه ويبقى تمبل ربنا يستر
كلامك خلانى أتأمل وفكر واراجع نفسى
عايزه الاقى حل ومش عارفه
البوست بجد تحفه وهلكنى من ضحك
ربنا يسامحك قلبت الواجع
أى والله قلبت المواجع
وقلبى وجعنى وهقوم من على الكمبيوتر خالص

YARA Says:

بجد يا ابوعلى موضوع هداف وجميل فعلا العيال يا عينى متعقدين حتى والله خالد ابن اختى خس يا عينى وقرب يختفى من اللى بيتعمل فيه فى المدرسه وهو لسه فى اولى ابتدائى.
مهو نظام التعليم اصلا فاشل من غير حاجه وانا اسمع ان مستوى ذكاء الطفل المصرى بيكون من اعلى المستويات الى ان يلتحق بالمدرسه
ويبقى تمبل ذى ما قلت بالظبط.
والحل بقى اللى فى ادينا دور الاسره هنا
انها تحاول تقوم بالمهام التى لا تقوم بها المدرسه من المشاهده والخروجات والتركيب والكلام ده
يعنى يعلموه اذاى يفكر .
بس اجمل ما فى الموضوع اخر جمله........ عانقت قلبى عندما ابكيته كى يبتسم
الله الله عليك يا ابو على
فعلا مبدع ايها الانسان

ABOALI Says:

الى جنى
اولا اتم الله شفاك ان شاء الله
وكنت مبسوط انك علقت وشرفتنى
التعليم والتربيه جوهر واساس الامه
فمن خلال التعليم نرى انفسنا
سعيد انى البوست عجبك
ويااااااااااريت ننفذ جزء حتى نعلو ونتقدم


تحياتى الكريمة اليك

ABOALI Says:

الى دودا

طيب وليه نخلع ونبقى عرايا
خلينا هنا مستورين
ولالالالالالالالالالالالالالا ايه
هههههههههههه

شرفتينى

ABOALI Says:

الى ايمان

ايه التعليق المتناقض فى بعضه ده
ههههههه
هى الامور دخلت فى الفيوز ولا ايه

خير البليه ما اضحك وابكى

بس فيه امل
مادام فيه عمر

وليه غايبه عن بوستاتك فى مدونتك

تحياتى الراقيه لقلمك الرائع

ABOALI Says:

الى يارا

تعلقيك يا يارا
يحمل الكثير من الالام التى نشعر بها جميعا
فعلا نحن نفكر و ولكن لا نستمر فى التفكير
ولا نستغله
بل المستغل يكون فى الهدم وليس البناء
وابن خالك
هو نموذج ل بج بج وغيره

بس زاى ما انتى طرحتى
فيه حلول
عاوزين ننتبه ليها
وهى تعطينا جزء من بريق الامل

تحياتى اليك المخلصه

ماما أمولة Says:

كل حاجة غلط المدارس والحمد لله بتربي اولادنا على الغباء والبلادة

وبتحطم اي طموح فيهم من الحضانة للجامعة ماشاء الله

بيربوا جيل متردد

انا بنتي كل يوم ترجع وتدعي على اللي

عايز يتعلم

تصدق في سنة خامسة ونفسها تقعد في البيت

والله يا ابو علي أنا احترت

في موضوع عندي مهم عايزة رأيك فيه

تقديري يا ابو علي

عاشقه الرومانسيه Says:

يب بغض النظر عن زج زج وبج بج
والواد العسل اللى يتاكل اكل فوق ده
انا جايه النهارده اسئلك سؤال لولبى مهم
انت مش بتيجى المدونه بتاعه عاشقه الرومانسيه ليه؟
انت زعلان منها؟
قول قول
مش تخاف مش هاقولها

وحشتنا يابرنس

انا ودماغي Says:

يا عينى عليك يا بجبج
و الله الواد صعب عليا و صعب عليا أكتر حالنا المأندل بقى قال إيه بيتعلموا هناك المشاهدة و هما فى حضانة و الله ناس فاضية إنما أحنا...أحنا ناس عمليين نخش فى الموضوع على طول لسة حنتعلم المشاهدة








عاااااااااااااا

يا عينى عليك يا بج بج طب و الله صعبان عليا

أحمد عمر Says:

السلام عليكم و رحمة الله و بركاته


بحييك حضرتك ف البدايه ع مدونتك الرااااااائعه و اعتبرنى من اليوم مقيم اقامه كامله عندك فيعنى ما تقول استأذن قبل ما تدخل و لا ادينى buzz ^_^

---

بج بج غيره كتير ف مصر و بل يمكن اغلب الاطفال المصريين منذ الفراعنه لحد اليوم عانوا و ما يزالوا زي بج بج كده ما بيمعانى

احنا بنجعل باسلوب احترافى مسأله التعليم مسأله صعبه جداا و اجزم لو ف شهادات ايزو ف صعوبه التعليم ممكن نحصل مركز الاول دا لو ما اخدنا باقى المراكز كمان >_<


ف كل العالم المتحضر يكون المعلم ف المراحل التعليم الاساسيه من افضل الكوادر و اجودها ف مسأله التعليم و التعلم .. عكسنا تماما فاللى مجموعه يخسع منه اهو يدخل تعليم اساسى و هو عاصر ع نفسه مليون ليمونه >>_<<

اتصور نحتاج لمرجعه شامله تبدأ من تحت

اقصد التعليم الاساسى و ما قبله ...


بوركت أخى و بارك الله ف عمرك

ABOALI Says:

الى ماما امولة

كان زمان بنقول انى المدراس بتربى وتعلم
وتكمل دور البيوت ودور الاباء
دلوقتى نقدر نقول انها بتهدم اللى بنعملمه ل اولادنا
لذا محتاجين قرب اكتر واكتر من ابناءنا

حتى نعمل عملية توافق
والطفل يعرف يحكم على الصح والغلط
ولا يحبط


تحياتى لك الغاليه

ABOALI Says:

الى عاشقة الرومانسيه

انا هاجاوب بصراحة والارزاق على الله

الرومانسية عندما تضاف الى شيىء تعنى الراحة النفسية والارتقاء والسمو فوق كل المعانى والمشاكل الحياتيه
لذا اشعر ان الشخص الرومانسى هو الشخص الحالم الذى يسبح بى فوق اغصان الشجر لكى اقطف من الثمار ما اشاء
ثم يتجول بى بين قطرات الهواء يسقينى من الاوكسجين والماء

وارى منه البسمة وعبق الكلمات
وتراقص الحروف وتفاعلها مع الاهات

كل هذا فى الرومانسية
فما بالك بعاشقة الرومانسية


لك الشكر والتحية

ABOALI Says:

الى انا ودماغى
معقووووووووووووووله
هى حالة ال VIP انتهت ولا ايه
يا باشا مشرف هاهنا
وبج بج سعيد
وحاسس انه هايكتشف حاجات كتير جواه

ولالالالالالالالالالا ايه

ABOALI Says:

الى احمد عمر

معك حق فى كل ماقلته
ولكنى اعتقد انا الاصلاح يبدء من الهرم
مع وجود القاعدة الاساسية عندنا

ولا شك اننا انفسنا محتاجين تدريب
حتى نربى اولادنا بطريقة صحيحة


تحياتى لك العطرة
ونورت هنااااااااااا

ندا منير Says:

ساعات تصرفات بسيطة قوى بتاثر على حياة الطفل وتخلى تصرفاته غريبة جدا
وبنكون مش عارفين اننا بنتصرف غلط معاه

الازهرى Says:

لالالالالالالالا
لسه المشوارطويييييييييل
ابتدائية واعدادية وثانوية كمان
وكل ده يهون لما نعرف انه تدري
لمرحلة الجامعة وحشو الدماغ
وركوب الاتوبيسات
طبعا ان لقى مكان فيها

طمن صاحبك ان كل ده فى مصلحة ابنه وتدريب له على مواجهة اعباء الحياة
بلا دلع

مخنوق كيك Says:

يا نهار كيك . بقي انا اغيب عن مصر المحروسة كام يوم ارجع الاقي الاجانب بيشتكو كمان ؟

مش ده الباشمهندس محمد اللي انا اعرفه يا كبير ؟ وبح بح كمان ؟

ليكن في علمك يا كبير . الولد اتربي اه في المانيا بس مشربش من نيل مصر ولا كل ترمس من علي الكورنيس ولا شهد عصر التعليم الزاهر المزدهر بتاعنا . يبقي اذن لازم يبتدي من الصفر عشان يقدر يبني نفسه .

مفيش اي مقارنه بينا وبين المانيا طبعا ً هنا مصر ام الدنيا . يعني البلطجة والتعليم المية مية . لكن شغل الفافي ونظام التعليم بالمشاهدة ده مينفعش عندنا .
خلي بح بح ياخد علي البلد بدل ما البلد تاخد اجله . وخلي الباشمهندس محمد يرجع المانيا تاني ويلحق ولاده .

واخيرا ً احب اقول كلمة لمصر حبيبتي اللي كانت وحشاني الفتره اللي فاتت دي . مصر هي ام الدنيا وهي ام التعلبم وام النضافه اللي في العالم كله واللي يقول غير كده يبقي انسان .. مبيخفش زيي .

يللا سلام

aidy Says:

حلوة اوى حكاية بج بج دى

للأسف التعليم عندنا بيستهتر بالكبار ومش بيراعى قدرات الصغيرين

تحياتى لحضرتك

ABOALI Says:

الى ندا منير
فعلا يا ندا معاكى
علشان كده محتاجين نراجع تصرفاتنا
وهى حاجات صغيرة مش كبيرة يعنى

اشكرك على التعليق

ABOALI Says:

الى الازهرى

ابويا الحاج ازهرى حمد لله على العودة الميمونه من المسرحيه اللولبيه فى مديرية الامن الكيرى

على العموم
رايك سديد وربنا يجعله فى ميزان حسناتك يا ناصح يا امين

منور يا باشا

ABOALI Says:

الى مخنوق كيك

اهلا حبيبى وحبيب عيونى
فينك من بدرى يا قلبى

بكرة نتغير
بس المهم نبدء اول خطوة

لالالالالالالالالالالالالالالا ياءس مع بج بج


مشرفنى يا باشا

ABOALI Says:

الى عايدة

فعلا معاكى حق
بس انا كلامى يشير الى ان نبدء نحن
فى فهم قدرات اطفالنا

وان شاء الله الغد لو بداءنا هانكون افضل


تحياتى لتعليقك

غير معرف Says:

انا اسمي نفسي بج بج