واجب تدوينى ولائى

, الخميس، 16 ديسمبر 2010






الواجب علينا حق
له الوصال مكتوب
يقربنا من المحبوب
تضلل علينا شجرة 
فيها ثمار وقلوب
نقطف منها البسمة 
تزرع فينا حياه
نرفع للسما ايدينا
يارب
القدرة والعفو عنوانك
خلينا دايما" فى رحابك
نطل على احبابك
نمشى معاهم نعمر
والنهاية تكون اروع
سجود تحت ظل عرشك
رحمتك وسموك
غفران لعبدك
ياااااااااارب
******************
الاعتراف الاول
بياناتى الشخصية
حسن محمد على
بكالوريس علوم جامعة القاهرة قسم الكمياء
متزوج واعول طفلان مروان ومهد
37 سنة
HASSAN M ALI على الفيس بوك
 للتواصل وليس المضايقة 0184080070
اعمل فى المجال الطبى فرع الدعاية الطبية
حاصل على ماجستير ادراة الاعمال مع اللحاف بدون المرتبة
الاعتراف الثانى
من انصار التعدد فى الزواج وناوى ان شاء الله
والاسباب كتيرة لا حصر لها
اهم شيىء العروسة الجديدة عندها شقة
وترغب فى الاستقرار المحلى نظرا لتذبذب
السوق العالمى
ودائما اردد
الراجل مش شقة تمليك
الراجل ايجار جديد
الاعتراف الثالث
احب الهدوء واعشق كل المناظر الطبيعة بكل انواعها
الاعتراف الرابع
مجادل والجدال عندى على علم وليس بمب لعمل فرقعة اعلامية
الاعتراف الخامس
سبب دخولى التدوين تعرفى بالصدفة على احد المدونين عن طريق الشات
الاعتراف السادس
لا احب التعليقات القصيرة او التيك اووى سواء عندى او عند غيرى
الاعتراف السابع
مبتسم ذو ضحكة تبعث على التفاؤل بس السحابة السودا ساعات بتكون قادرة
الاعتراف الثامن
اكتب كل بوستاتى وانا اجلس اشرب كوب شاى  لما اخلص الكوب
اكون كتبت اثنين ( اللهم لا نق)
الاعتراف التاسع
يوجد افلام مقاولات وكذلك توجد مدونات مقاولات تصطاد القلوب المفتوحة
وتتغلل فى كيانات اصحابها( حذارى )
الاعتراف العاشر
متأمل فى كل نواحى الحياه اسعى دائما للوصول الى الافضل
HOW TO DO IT BETTER?
الاعتراف الحادى عشر
البعد عن الدين هو اول درجات الشعور بالاضطراب فى الحياه وتزاحم المشاكل
الاعتراف الثانى عشر
لا انظر الى سلبياتى وان كنت اقيم نفسى واركز على ايجابياتى 
 واحاول تنميتها بكل الوسائل

الاعتراف الثالث عشر
ضعيف امام حواء  وهى لى كيان احبه
اجد فيه مفراداتى تملاء فراغات مسامى
الاعتراف الرابع عشر
لا اميل فى الطرق المباشرة فى العرض 
الامثلة توضح ما نريد فى حكمة وطبطه على العقل
الاعتراف الخامس عشر
لست قارىء جيد للكتب بكل انواعها 
باحس انها شبه بعض والحياه ابسط من كده
الاعتراف السادس عشر
ان اردت ان احب شخص افتح له عدد  2 اذن  فيتكلم مع مشاركة منى بسيطة
فى اول المعرفة ثم مشاركة اكبر وهكذا
فلكى تجعل اى انسان يحبك اتركه يتكلم واستمع له ولا تصادر رأيه
الاعتراف السابع عشر
فكرت فى اغلاق التعليقات فى المدونة
فأنا لست من مدوامى قراءة المدونات
والمدونة عندى طاقة اتخيل نفسى فيها 
ولا اكتب شيىء الا لكى يكون لى دافع
الاعتراف الثامن عشر
كتير باشعر بالالم اثناء قراءة بعض المدونات
 واحاسيس وصوت الكلمات اللى بتكون فيها
وكنت اتمنى اكون جنب الشخص
اللى بيكتب عن مشكلة فى حياته واطبطب عليه
واقوله انت ليس عندك مشكلة
انت سبب المشكلة بس بهدوء وفكر وحب
الاعتراف التاسع عشر
اهرب كثيرا من الحديث عن احوال بلدنا وما يحدث فيها
لاننا جمعيا نعرفة ونغرق فيه يوميا فلا مجال للتكرار
بل البحث عن تحويل ما نتكلم فيه الى افعال حتى نغير كثيرا لا نتكلم كثيرا
الاعتراف العشرين
تعرفت على اناس فى التدوين اعتبرهم درر من الذهب المصفى
اقتربوا منى واقتربت منهم اتمنى ان لا افقدهم
الاعتراف الحادى والعشرين
احلم بأنشاء جمعية اهلية تحت اسم (شاب)
تعلم وتشكل حياه البشر
تدلهم على الطريق الواضح
فى سهولة ويسر تلملم تلك الانفس التى تبعثرت
تطبق الصحيح من الفعل 
وتجعل غيرها يدرك الحياه فى اسلوب يسير
عملت بالفعل جروب على الفيس بوك باسم (شاب)
اتمنى ان يشترك فيها الجميع
الاعتراف الثانى والعشرين
عصبى احيانا بس قادر فى نفس اللحظة ابتسم
 واقول لنفسى على ايه تتعصب يا حمار
مستفز احيانا بس بافسر ده انى محتاج اعرف اللى قدامى بسرعة
 علشان نعرف هايكمل معايا  ولا
استحملووووووووونى بقى 
بارد احيانا  وامضغ اللبان 
علشان اطهر لسانى  احسن لو اتكلمت هاعيط من نفسى
الاعتراف الثالث و عشرين
دموعى احب ان لا يراها احد ولكن هيهات هيهات
راى الجميع دموعى تنهمر وقت وفاة الشيخ محمد متولى الشعراوى
فهذا الرجل كان لى ضياء ونور اتحسس خطاه بذلك الوعى والادراك
ربنا يرحمه
الاعتراف الرابع والعشرين
لا احب رؤية حواء تقود السيارات
الاعتراف الخامس والعشرين
سأكتب بوست قريبا ان شاء الله  ان كان فى العمر بواقى تصدير
عنوانه 
صراع الفرسان وصراع الخرفان
فكروا بقى انتوا فين من الصراعين
علشان كل واحد يعرف مقامه وتفكيره
ههههههههههههههه
الاعتراف السادس والعشرين
اشكر دكتورة ولاء انها اصرت انى اجاوب على الواجب ده
الاعتراف السابع والعشرين
من سيقرء بين السطور
 سيعرف انى سأمضى
الى  اين ؟ الله اعلم
الاعتراف الثامن والعشرين
الحياه وقت
لا نعرف متى نهايته
ولكننا نعرف
تلك الاوقات التى نحياها الان
فأن كنت تريد تأجيل عمل ما
الى الغد فالابد من سبب وجيه لذلك
واسئل نفسك
لما اجلت ؟
كسل
ملل
زهق
غباء
هروب
اهمال
وعندها ستعرف مكانك الصحيح
الاعتراف التاسع والعشرين
احبكم جميعا فى الله 
الحياه صغيرة جدا جدا جدا 
بلاش نضيع اعمارنا فى كره او حقد او بعد
نحاول نبنى فى نفسنا ونفتح لغيرنا ابواب الامل 
مهما كانت اضاءة الطريق
الاعتراف الثلاثين
المدونة وما اكتبه فيها
ان كان فيها شيىء صحيح
احمد الله عليه
وان كان فيها شيىء اجتهدت فيه
وكان خطأ
فعذرا
انى انسان

28 Response to "واجب تدوينى ولائى"

yara Says:

مهمه الاعترافات ومفيده ...وكان برضوا واجب تعليقى نعترف بده واقولك كل سنه وانت طيب يا ابو على واتمنى تكون بخير وفى احسن حال ..وتحقق كل ما تتمنى فى حياتك وتنل سعاده القلب وراحه البال.

بلاش تغيب عننا وخليك دايما صاحب واجب ومتواجد ومتالق انت تعلم ان وجودك له بريق خاص .

تحياتى لك ولمروان ومهد

SHAPE YOUR LIFE (ABOALI) Says:

الى يارا
كل سنة وانتى فى طاعة وقرب يا انسانه
انتى من الدرر اللى اعرفهم فى حياتى
ربنا ينور بصيرتك دايما
ودعواتك ليا
علشان اكون قريب بالفعل
لعل وعسى اكووووووووون

تقديرى لانسان قدير قدير

SHAPE YOUR LIFE (ABOALI) Says:

الى ولاء
تشكرات يا فندم بجد على اتاحة الفرصة دى ليا
اقرب من الكل

مهد اسم بنت جميل ورقيق مش كده؟

فعلا زميل وهذا شرف لى يا انسان
وقاااااااااعدين على النت نصلح والله
ولالالالالالالالالالالالالاايه
ماجستير ادارة الاعمال MBA علشان نعرف الدنيا ماشية ازاى ونستفيد يا فندم

اكيد اصرح طبعا بحبى للتعدد انكر ولا انكر
حتى الكل هايبقى سعيد
وان كان على المدام مسيرها ترضخ لواقع الحياه ولالالالالالالالالالالاايه (وش بيغمز)

فعلا الجدال بعلم مش مهلبيه

ارغى يا فندم ارغى الكلام بيفتح كلام
ويعمل اثراء للفكر

الشاى حبى محبوبى
وحياتك كله من العقل والخبرات بين الناس
مع انى ده مش صح اوووووووووى
بس ده انا اقر واعترف انى لست قارىء جيد

ياريت تشتركى فى الجروب وتدعى كل اصحابك
فقط اكتبى كلمة شاب وابحثى
الجروب فيه تقريبا 51 واحد

الستات دول الحنان كله علشان كده السواقة مش محتاجة الحنان ده اوووى

عصبى فعلا
بس اقدر اسيطر عليها علشان اختلاف الفكر مع البعض بعنف شوية لميل البعض الى الاستسهال والرجوع للخلف تحت عنوان احنا هانصلح الكون


ربنا يهب لك الاصلح دائما يا انسانه
وعند مشرفانى دايما هاهنا

مدونة رحلة حياه Says:

السلام عليكم
كل سنة وحضرتك طيب ويارب دايما من احسن لاحسن
كنت بسأل بس حضرتك بتقول بتحب الهدوء وفى نفس الوقت بتقول نفسك تتجوز تانى يا راجل هو ساعتها هتلاقى ريحة الهدوء
عموما انت كتبت مواصفات العروسة واللى متاحة هتسيب لك عنوانها فى التعليقات
ابقى بخير

موناليزا Says:

بغض النظر على انك مش بتحب التعليقات القصيرة وانا اغلبية تعليقاتى قصيرة
بس ماكنش ينفع ماشكركش على انك عرفتنا عليك بشكل بسيط وواضح

على فكرة انا كنت مفكرة ان عندك 3 أبناء ذكور
أومال بجبج وزجزج ودم الغزال دول ولاد مين:)

لــــ زهــــــراء ــــولا Says:

ابوعلى
******
مجرد ما شوفت عنوان البوست قعدت اضحك مش عارفه سبب طبعا لكده بس تخيلت المنظر وانت بتعمل واجب بقى " وش بيغمز "

الصور حلوه اوى اوى اوى
اما الاعترافات امممممممممم

بمناسبة انك مش بتحب التعليقات القصيره اعترف لك اعتراف انى احياانا باكتب الكومنت عندك بيكون اطول مما يكون عليه واختصر فيه كثيرا لانى باحس انى بارغى ربما احيانا خارج الموضوع وفى احيان اخرى ربما فى الموضوع ولكن اعترف لك انى باحاول اختصر ومش باعرف بجد ..


ربنا يجعلك مبتسم على طووووووول ويبعد عنك السحابه السودا الوحشه اللى ساعات ترمى بظلالها على البشر الحلوين وتخليهم مش تماموزز واسالنى يا صديقى على السحابه كفانا الله شرها واياك ...

حلوه اوى التحذير ان فى مدونات مثل افلام المقاولات بس واخطر منها لان الاخيره تؤثر فينا عن بعد اما المدونات المقاولات فاننا نجد اصحابها يتغلغلوا فى اعماقنا ويحاولوا بشتى الطرق ان يبهرونااااااا ومنا الضعيف الذى ينبهر ومنا القوى الذى قد يصدق ولا حول ولا قوة الا بالله ...

اوعى تفكر تغلق تعليق مدونتك ولما انت تعمل كده اعمل قلق فين ومين يبلغ عنى والامل العام يقدر يتابعنى من فين !!

احب اضم صوتى الى صوتك ورغم انى من بنات حواء لكن مش باحب حواء تقود سياره وباخاف امر من امام اى امراه تقود سياره ويوم ما افكر امتلك سياره هاكون اخترت من يقودها قبل اختيارها لو كان الامر بيدى لسحبت كل رخص السيدات وماحدش يقول انى جاهله او ضد حقوق المراه وفكرتنى ناويه كده ابقى اعمل بوست فى القريب ان شاء الله عن الحاجات اللى مش باحبها فى حواء وربنا يستر احتمال بعدها مدونتى تغلق فى وشى ههههههههههههههههههههه


كل فرد منا يحاول ان يبحث عن الهدوء الداخلى حتى يحيا فى هدوء نفسى خارجى
حكاية العصبيه اممممممممم كنت حاسه بكده مجرد احساس ومش تقولى جه ازاى يعنى تقدر تقول من بين السطور ...

سيدى .. استمعت بكل حرف كتبته سواء فى تلك الاعترافات التى تسمح لى ان اطلق عليها بطاقة تعارف لانسان وكذلك استمتعت بكل ما قراته هنا رغم انه فى كثير من الاحيان اشعر بمدى تفاهتى واننى لا افهم ولا اعى الكثير والكثير من الامور ولكن احاول جاهده ان اقرا مره واثنين وثلاثه حتى افهم ....


الاعتراف العشرين
***************

تعرفت على اناس فى التدوين اعتبرهم درر من الذهب المصفى
اقتربوا منى واقتربت منهم اتمنى ان لا افقدهم

ان كانوا هم من الدهب المصفى فلتسمح لى سيدى ان تكون انت الماسه تلك الحجر الغالى فى قيمته وفى معدنه وفى اصله ..

اذا كان القدر فى بعض الاحيان يهب لنا اشخاص يكونوا مثل القناديل فى حياتنا فانت سيدى منهم ....

ادعو الله ان يهب لك صحه وسعاده وان يقر عيونك بابنائك ويحفظهم لك ويبارك لك فى كل احبابك ويكتب لك الخير فى كل خطوه ويحقق كل احلامك



زهراء

صيدلانيه طالعه نازله Says:

كلام حضرتك مقنع جدا
عارف ليه بقى ؟؟
عشان شبهك اوووى
كلامك فى الحقيقه زى الكلام فى المدونه
بعض البشر عندهم القدره الفائقه على التلون
ابعدنا و ابعدك عنهم الله
كل النقط اللى حضرتك اتكلمت فيه جميله
و ان كنت اعجبت جدا ببعض النقاط اهمها
***********
يوجد افلام مقاولات وكذلك توجد مدونات مقاولات تصطاد القلوب المفتوحة
وتتغلل فى كيانات اصحابها( حذارى )

و ايضا
*********

ان اردت ان احب شخص افتح له عدد 2 اذن فيتكلم مع مشاركة منى بسيطة
فى اول المعرفة ثم مشاركة اكبر وهكذا
فلكى تجعل اى انسان يحبك اتركه يتكلم واستمع له ولا تصادر رأيه

اتفق معك و بشده
بس حختلف فى النقطه دى و بشده برضه

من انصار التعدد فى الزواج وناوى ان شاء الله
والاسباب كتيرة لا حصر لها
اهم شيىء العروسة الجديدة عندها شقة
وترغب فى الاستقرار المحلى نظرا لتذبذب
السوق العالمى
ودائما اردد
الراجل مش شقة تمليك
الراجل ايجار جديد


و ربنا يقدرنى وابعت البوست ده للمداااااااااااااام

سلامى لمهد و مروان

لــــ زهــــــراء ــــولا Says:

للتواصل وليس المضايقة 0184080070


" هههه مصر كلها بقى معاها الرقم ..."


الاعتراف الثانى والعشرين
عصبى احيانا بس قادر فى نفس اللحظة ابتسم
واقول لنفسى على ايه تتعصب يا حمار

" هههههههههههههه موتتني م الضحك سخرية فظييعة "


مستفز احيانا بس بافسر ده انى محتاج اعرف اللى قدامى بسرعة

" استفزتني قبل كدة فاكر.. كرس في الكلوب بس على مين هههههههه شوريرة انا شوريرة "



علشان نعرف هايكمل معايا ولا
استحملووووووووونى بقى
بارد احيانا


" ههههه... امال انا ابقى ايه "
" بخصوص الكومنتات القصيرة اللي مش بتحبها انا اسفة جداً انا ساعات مبعرفش اختصر وكتير مبعرفش ارغي ياعني حتى عندنا لما برد على الكومنتات فاطمة تقعد تزق فيا يابنتي طولي الكلام شوية يابنتي ردي باستفاضة ..بجد مبعرفش ... دي طبيعة مش قصد"

لولا

لــــ زهــــــراء ــــولا Says:

بالنسبة للسيدة التي تقود السيارة وانت تكره تشوفها احب اطمنك دا قصر ديل هاهاهاااااااااا ( اوعى تزعل هزار )... لا يوجد سبب مقنع لكرهها .

لولا

كلمات من نور Says:

يالها من إعترافات خطيرة ولكنها قوية أمتعتنا و أظهرت لنا أبو علي في ثوب جديد ........ جزاك الله خيرا يا أبو علي والحمدلله أنا اتعلمت السواقه زمان ولقيت نفسي حروح القسم كل كام يوم قلت لا شكل جوزي حيبقى وحش قوي كده فقطعت الرخصه وقلت ماله التاكسي؟ ههههههههههه

أنا - الريس Says:

بعد السلام والتحية
أما بعد
من رئيس الجمهورية
احييك لا معلم أبو علي صراحتك الجدية
خصوصا موضوع تعدد الأزواج دا لو كاتبة بجد .. لان كتير بيتهرب مننا من الحقيقة .
ثانيا موضوع انك بتجيب أمثلة مخفية شوية عشان تشغل العقل أرجوك لما تعمل امتحان هات سؤال للطالب المتميز و 3 أسئلة متوسط وسؤال للي زي حلاتي .
حبك لعلم الكلام شيء حلو وخصوصا لما متكونش فرقعة بومب .
ثانيا مرة تانية بوستاتك حلو مش بتخابث بس لما بفهم منها بس .. أحيانا انا بقرا بوستاتك ومش بعلق نتيجة إن مش فاهم وإلا هكون زي اخونا البعد .
وحاضر يعم هبقي اعلق بتعليق طويل مش تيك أواي .
ليس أخيرا أحبك الله احببتنا فيه .. ورضي عنك إن شاء الله .

شمس النهار Says:

الكلمات الاولي للبوست رائعه
عجبتني علشان هي جميلة
وكمان علشان انا في مودها الان

الاعترافات خطيره لصراحتها
نادرا مانقابل رجل صريح الان

بس ليه ماكملتش الدكتوراه

هو التعدد بقا له انصار واعداء :))
بس ماقلتش اسبابك

اماموضوع العروسه ومواصفتها دي مشكله علشان العروسه اللي عندها شقه مش هتحب تكون نمرة اتنين ابدا :))

طبعا ماينفعش اعلق علي اي شئ تاني علشان دي شخصيتك
ودي قناعاتك في الحياة

بس لي تعليق علي موضوع التعليقات القصيرة مش مهم التعليق يكون قصير المهم انه يدل علي الاستفاده
وكمان كتير بتكتب بوستات ماينفعش الواحد يعلق عليها مابيبقاش في كلام بعدها بتكون غطيت جوانب الموضوع كله ببراعه

:)
في النهايه مدونتك من المدونات التي احرص وبشده علي متابعتها

غير معرف Says:

ازيك ايو على .
يارب تكون كتابتك لالاعترافات دى خير مش عارفه مش مرتحالك.
يااااااااااه كل دى اعترافات يا ابو على بس تصدق جميله جدا انا اراهنك لو كل اللى بيتابعوك قدروا يكتبوا نصفهااو علشان مظامش الناس انا بتكلم عن نفسى ولو ان حاسه انى صريحه اوى مع نفسى بس برده انا البوست ده استوقفنى جامد انا قريته اربع مرات ايه ده يا جدع ايه الجماااااال ده.
اعترافات جميله بس مش عارفه حاسه ان ف اعتراف انت نسيته .
مش عارفه ليه يا ابو على حاسه انك ومن غير زعل وطبعا انت هتقولى ليه (ده انا لسمع لكا الناس) مش عارفه حاسه انك ديكتاتورى ده مجرد احساس بس مش اكتر .
وبعدين ايه الصراحه الكتيره دى ف الاعترافات حد برده يعترف انه بيحب التعدادوانه عصبى واحيانا باردومش عايز كمان حوا تقود العربيه هو انت بطفش زباينك ولا ايه هههههه
ربنا يخليك يا سيدى لينا ودايما كده بنستفيد منك .
تحباتى ليك

brightlyanny Says:

يووووووووه انانسيت ونشرت الكومنت يدون اسم

noorelmalak Says:

اكتر اعترف عجبنى
لثامن عشركتير باشعر بالالم اثناء قراءة بعض المدونات واحاسيس وصوت الكلمات اللى بتكون فيهاوكنت اتمنى اكون جنب الشخص اللى بيكتب عن مشكلة فى حياته واطبطب عليهواقوله انت ليس عندك مشكلة انت سبب المشكلة بس بهدوء وفكر
والحادى والعشريناحلم بأنشاء جمعية اهلية تحت اسم (شاب) تعلم وتشكل حياه البشرتدلهم على الطريق الواضح فى سهولة ويسر تلملم تلك الانفس التى تبعثرتتطبق الصحيح من الفعل وتجعل غيرها يدرك الحياه فى اسلوب يسير
ربنا يذيدك كمان وكمان

SHAPE YOUR LIFE (ABOALI) Says:

الى مدونة رحلة الحياه

اينعم اينعم
حواء هى كل ادم ان عرفت بعض اسرارها كانت لك السماء الحاضنا

وعلى العموم الحال لا يدوم
ساءذهب وارى يا سيدى المواصفات
بس انت ادعى لينااااا

تقديرى

SHAPE YOUR LIFE (ABOALI) Says:

الى موناليزا

يا مراحب بعد غياب متعمد ؟؟

زج زج و بج بج ودم الغزال شخصيات افتراضية
اضع من خلالها ما يقربنى الى نفسى والى غيرى

مشكككككككككككورة بجد على كل تعليقاتك
سواء اكانت قصيرة المدى ام بعيدة المدى

ربنا يهبك كل السعاده

تقديرى

SHAPE YOUR LIFE (ABOALI) Says:

الى زهراء
اغمز يا باشا اغمز الله يسامحك

الصورة كيان عبر عن كيان فكان انسان

كلامك فى باقى التعليق اد ايه كان مشجع ليا وباسم فى نفس الوقت
واد ايه القرب من ناس تفكر وتفهم وتدرك وعندها ملكة الحب وانتقاء معانى الكلمات بتسعد وتفرح
كنت مبسوط بالدعوات والتمنيات
وما بين السطور
واعجبنى تاءكيدك على وجود بعض اقلام المقاولات
واستشعارك هذا
كثير من الكلمات والعبارات والمعانى
لا تعبر عن التقدير لشخصك الكريم
وهبك الله الاستمرار فى فيضان الحياه
تركبين سفينة تكون فنار لغيرك ودليل ثقة لك دائما

خالص التقدير

SHAPE YOUR LIFE (ABOALI) Says:

الى صيدلانية

يااااااااااافندم يا مراحب
اذا لم يعبر الكلام عنى وعن شكلى فاعلمى يا سيدتى ان الكلمات لن نصل الى اى قلب
فعند خروج الكلمة يكون لها مقويات تتزين بها لتصل الى احساس وقلب وعقل من يقرئها
فاءن فقدت تلك المقويات فقدت الطريق وتاهت
تلك المقويات هى الصدق والنقاء والاخلاص
والتوكل على الله
اسعدنى اتفاقك معى فى النقاط
ولكن موضوع التعدد بالتاكيد لن ترضى عنه نون النسوة
فهناك جين تكون لدى حواء العربية ان الرجل ان زاغ عن زوجته الاولى كان خارج عن النص
لهذا
كله بالهدوء
واللى جاى هايخلى الكل يسلم

اسعدنى عبير حروفك التى قالت وعبرت فكانت لغيرها حوار ونقاش

تقديرى

SHAPE YOUR LIFE (ABOALI) Says:

الى لولا
ياااااااااااااامرحى بالناس اللى كانت عبير احساس
كانت تصول وتجول والان بحر الحياه عميق
اخذ كل الناس يارب نكون دايما فى حب وجمال احساس
ياااااااااااارب

منوارنى يا فندم
علقى كما شئتى
مدونتك
تعليق طويل قصير
قراءة كلماتى من احد غيرى وسام لى

خااااااااالص التقدير

SHAPE YOUR LIFE (ABOALI) Says:

الى لولا مرة ثانية

ليس تحيز لقيادة حواء
ولكنه طبطه عليها لتعرف ان السيارة
ليست غسيل اطباق
ان وقع طبق القته بعيدا
فمن يقع وهو تقود يذهب الى الجنان مرحبا مرحبا


تقديرى

SHAPE YOUR LIFE (ABOALI) Says:

الى كلمات من نور
دائما تحملى معاكى اعمدة انارة وانتى تاءتين الى هنا
اسرتينى بحسن اخلاقك واصطفائك للمعانى
ربنا يجازيكى خيرا

وبلاشششششششش سواقة
خلينا فى المدونات نسوقها احسن

SHAPE YOUR LIFE (ABOALI) Says:

الى الريس
اكتر تعليق قعدت اضحك منه
زرعت البسمة على وشى
فلك الشكر يا باشا
وطلباتك اووووووووومر
اذكر بل علل
لما حال البلد متدهور ؟
اختر من الاجابات التالية
1- العلم فى الراس مش فى الفشه
2- الرجالة فى المنزل مش العشه
3- الستات فى الشارع مش فى الفرن


تحيااااااااااااتى يا رائع

SHAPE YOUR LIFE (ABOALI) Says:

الى الحاجة شمس النهار

يااااااااااااافندم كلك ذوق والله

علقى كما تشائين وارتحقى من العبير ما تتنسم به حياتك ان شاء الله

جميل ان الكلمات الاولى عجبتك
لانها فى رايى اهم من الاعترافات ولم يلتفت اليها احد

اما عن التعدد موضوعه يطول شرحه
ولكن اذا قل من يتحمل المسئولية
لابد من ظهور التعدد

الصراحة هى اقرب الطرق الى قلوب من يستحقونها

جميل ان ارى كلماتك سيدتى ها هنا
لك كل الشكر والتقدير

SHAPE YOUR LIFE (ABOALI) Says:

الى برتلى

وعوووووووووودة من جديد الى المدونة المتواضعة

اسعدنى جدا روحك التى قرائتى بها البوست
بالفعل لمستى نقطة جيدة
انا ديكتاتورى بالفعل
المس العبير واتمناه لى
فاءن ملكته اطلقت سراحه لكل الناس
املك الحرف واتسابق معه
فاءن اصبح كلمة كان لكل الناس


سعييييييييييييييد جدا بوجودك
ومافيش اجمل من الصراحة يا معنمى
واللى مش بيحب التعدد فيه غيره يحب
واللى مش بيحب قيادة السيارات
يبقى حبيبى وابن حبيبى

والله اكبر فوق كل معتدى

وسسسسسسسسسسسسسسسسسسسسسسسلامى للناس الرائعين

SHAPE YOUR LIFE (ABOALI) Says:

الى نور

يا هلا يا هلا
ربنا ينور بصيرتك يا انسانه
ويهبك السعادة والخير دائما

تقديرى لوجودك هاهنا

لــــ زهــــــراء ــــولا Says:

ابو علي..حسن افهم من كدا انك مش عايز الناس تروح الجنة !!!
اسفة والله كان غصب عني اني مش بتابع بأنتظام ومش انت اللي خسرت تعليقاتي انا اللي خسرت التزود من افكارك وموضوعاتك متتخيلش قد ايه انا زعلت قوي من زعلك مني من فضلك متزعلش ... انا كمان نفسياص مش متظبطة وباكل كتير وبنام كتير ودايماً عندي صداع وشكلي مكتئبة

لولا

Unknown Says:

السلام عليكم

هذه زيارتي الأولى يا أبو علي رغم أنك زرتني مرة زمان :) يعني أنا اللي مقصر..!

المهم الواجب التدويني مريح جدا.. لأني كنت أحب في بداية تعرفي على مدون جديد أن أتعرف عليه أولا عبر تدويناته.. أما هذا الواجب الذي انتشر كالنار في الهشيم فقد لخص لي الموضوع تلخيصا...

فيكفي أن تخل على تدوينة الواجب بتاعة المدون من دول وتجيب آخره... هههه

طبعا عجبني شوية حاجات في شخصيتك، لكن الأهم إعجابي بتعبيرك عن شخصيتك في حد ذاته بما فيه من تلقائية وصراحة...

كفاية رغي كده... أنا حبيت بس ألبي طلبك..

تحياتي أخي الكريم..
------------

على فكرة: أنا برضه 37 سنة- خريج علوم القاهرة - بس قسم حيوان.. المدرج اللي جنبك على طول :)