تدوينة بدون طعم

, الخميس، 14 يناير 2010


بلدى

يا بلد المساجد

والكنايس والمعابد

ليه بقيتى بلاد اسوار

هان عليكى دمك

وعرفتى طريق الاخيار

اصبحتى سيف عدوك

وقولتى نبنى ونعلى جدار

احمد

طفل مصرى سيناوى كان عايش

بيلعب برضوا

مع

احمد طفل فلسطينى

فى غزة كان عايش

قاله ليه يا مصرى تعملوا الجدار

قاله معلش يا صاحبى

ابويا بيقول امان

قاله وانت رايك ايه

قاله انا قلت حصار

انت اخويا ورسمى

فيك تقسيمات وشى

ابص فى عينك الاقى نفسى

واقول واتنهد فى سرى

سبحان سبحان

قاله وانت يا مصرى

نبض عمرى من زمان

عمرى ما هايكون

ليك من عندى ابدا دمار

يمكن تفرقنا السنين

بس انت كل رسمى واكتر كمان

مسك ايده وقال

احنا سوا مهما كان

فى لحظة

كانت قذيفة

الرسم بقى الوان

عليه لون كاسى

لون احمر قان

اتجمع المصرى والفلسطينى

عاوزين اشلاء احمد

فين ابننا السيناوى فين راح الغزاوى

الايد واحد والرسم كمان

قالوا نسئل مين ونحكم

يهودى ولا امريكان

يا يهودى

القذيفة كانت لمين

ضحك وقال

معلش انتوا الاتنين اخوان

والامريكى هناك ناظر

دول ارهابين وانا قلقان

الاب المصرى قال ابنى

االفلسطينى قال ولدى

لملموا بقايا راس ابنى

هاتوه هنا فى حضنى

راح فين قلب ابنى

فين راح اللسان

يا ترى انت احمد؟

ابنى المصرى

ولا انت احمد صديق الايام

قالوا ادفن ابنك

لقيت اسوار اسوار

وهناك كان العجب

مين قال دى اشلاء ابنك؟

بصيت لفوق

وقلت سبحان سبحان

ليك انا بشتكى

والدموع انهار

دمى ابنى سال

وانت ياربى ذو السلطان

اكيد ليك حكمتك

سبحان سبحان

27 Response to "تدوينة بدون طعم"

romansy Says:

ليا حظ انى اكون عندك اول تعليق
بس لما فكرت شويه قولت اعلق اقول ايه

romansy Says:

اقول على الفسطينى اللى نفسه يكون حر نفسه يتعالج نفسه يلاقى الحب من كل البشر
الفتنه فى بلده الفتنه فى جيرانه الفتنه بقت فى كل مكان
مش عارف امان
ولا ايه
احمد المصرى والغزاوى دايما هيكونوا اخوات

ستيتة Says:

شوف انا مش عارفة اكتب شيء
منقسمة بين عدة اشياء متتالية متوالية

الانفاق دي كانت مش صناعة غزواية؟
ها تقول لي أه
ها اقول لك بس مصر تعرف
مفيش شيء اسمه البلد ومخابرتها وجيشها ميعرفش مكان نفق وبيتهرب منه ايه بالتفصيل الممل

طيب ليه دلوقت جدار؟

طيب لمصلحة مين؟
بيقولوا مصلحة قومية
طيب ما تشرحولنا مصلحة قومية ازاي

يعني لو الصبح شمال وجنوب السودان انفصلوا
ودخلنا متاهة تانية
ها تعملوا سور تحت

طيب لو مجنون ليبيا اتهطل اكتر ما هو اهطل
ها تعمل سور غرب؟

السور ده لمصلحة اسرائيل؟
بضغط امريكي؟
يعني السيادة المفتعلة دي مع مين وضد مين
مع فتح وضد حماس؟
طب ما حماس جت بانتخابات حرة
ليه لم تحترموا الانتخابات دي زي ما بتحترموا انتخابات اسرائيل

الفلسطنين منقسمين
ومصر ضايعة مع حاكمها المزمن
والحالة فعلا وحشة قوي قوي قوي

وبما اني مش عارفة الأسباب
وخايفة على مصر برضه

صدقني مش عارفة احكم ع السور
هو مصلحة
ولا وكسة سودة

شعب لا يوضح له احد البشر اي شيء
شعب يُحكم بمبدأ ها تعملوا ايه عرفتوا او معرفتوش

اللي انت كاتبه وجع قلبي
وايه النهاردة يا سيدي الفاضل مش بيوجع قلوبنا
ربنا يصلح الحال

طوبه فضه وطوبه دهب Says:

سلمت يداك وحسبنا الله ونعم الوكيل فكلها اشلاء المسلمين فى كل مكان ان كان سيناوى او غزاوى فهو فى النهايه طفل مسلم لم يبقى منه سوى اشلاء

yara Says:

كلمات مليئه بالاحساس وتجعلنا ينتابنا مشاعر كثيره مختلطه من تحسر على وضعنا العربى الحالى وحنين لمعنى الانتماء للوطن العربى وتذكره لمعنى الانسانيه وتنبيه للعدو الحقيقى ويقظه من غفلتنا ووووووووكثير وكثير منالاشياء التى تناولتها بين سطور كلماتك يا ابو على.
بجد الوضع اللى احنا وصلنا ليه انا بصمت امامه ولا استطيع التعبير عما يجول بخاطرى وخصوصا بقى لوواحده لسه راجعه من السفر مهنجه وتعبانه ومش مركزه ذيى.

انتظر تعليق على روقان غدا يا مصراوى

دومت انسان يا ابو على.

dalia Says:

ليه الجرح مفتوح حسبي الله ونعم الوكيل انا مبقتش اعرف يا ابو على احنا مصريين ولا لأ ولا المفروض اننا لا نفتخر بمصريتنا بجد تعبت
تحياتي لطرح مثل هذا الموضوع

أمل حمدي Says:

:(

:(

:(


تقديري لابو علي

شموسة Says:

أحييك يا ابو علي
علي الاحساس الكبير ده

وانضم ليك

تحياتي
شموسه

SHAPE YOUR LIFE (ABOALI) Says:

الى رومانسى

ههههههههههههه
بتنقى يا رومانسى جاى فى البوست اللى اساسا واجع قلبى وبتعلق
انت من القلوب الرقيقة التى اعتز بها
ولكنها الحياه يا صديقى نتعارك فيها ونحلم ونتسامر وتمر بنا بقطار احيانا بسمات واحيانا وجه نحب ان لا نراه

على العموم اسعدتنى
والخير والبسمة عنوان ان شاء الله

SHAPE YOUR LIFE (ABOALI) Says:

الى ستيته

تعرفى وانا بقرء تعليقك قولت لو انسانة
فاضلة مثل حضرتك واخرون حكمونا مش افضل من الغوغائين الذين يحكمون الان
ولا يعرفون ان نملة تمشى فى عرض الطريق تفكر افضل منهم

مثلما اطلقت سهام الاسئلة
مثلك اعرف الطريق الواضح ولكن البعض لا يعجبه هذا الطريق
يريد ان نظل هكذا نتلاطم مع بعض
وقد توافرت للاسف لهم الادوات المناسبة

ولكن هناك مقولة اؤمن بها

as u knocking the door the door will open
اتمنى ن يفتح الباب قريبا لاعادة البسمات

اشكر لك تواجدك هنا بهذا الفهم المميز

SHAPE YOUR LIFE (ABOALI) Says:

الى طوبة من فضة واخرى ذهب

نعم لا فرق بين الاشلاء هناك طفل عربى محزون

ان شاء الله القادم خير مادمنا نغير انفسنا الى الافضل


تحياتى الراقية لرقى قلمك

SHAPE YOUR LIFE (ABOALI) Says:

الى يارا

فعلا هناك لحظات تمر علينا نبقى فيها صماتين
كاءن حروف الهجاء ولت بعيدا لا تحب ان تقترب ثانيا منا فقد شبعت من تكوينات الحروف والكلمات وتعبت منا

ان شاء الله القادم خير سيدتى
مادمنا ندق ابواب النجاح ونعمل بما نتكلم

حمدا لله على السلامة من السفر

ومنتظرك على روقان

تحياتى

SHAPE YOUR LIFE (ABOALI) Says:

الى داليا الاصيلة

كلنا تعبنا يا داليا
ولكننا سنظل نتكلم حتى نفعل وننجح
ولن نياءس ابدا


تحياتى الراقية لشخصك الكريم

SHAPE YOUR LIFE (ABOALI) Says:

الفاضلة امل حمدى


التقدير لمن كان قلبه ذهب ولؤلؤ مثل سيادتك
انار الله لك الحياه وجعلك نورا لغيرا

عظيم تقديرى

SHAPE YOUR LIFE (ABOALI) Says:

الى شموسة

يا فندم وجودكم تشريف لنا وانضمامكم

شيىء نسعد به

ارجوا ان يتم الله عليكى فيوضات رحمته وفضله

قولى اميييييييييييين

هي وظروفها Says:

يا أخي والله جسمي قشعر من كلامك

الله يلعن اللي كان السبب

الدم المسلم مش محتاج لون علم الدم المسلم خانوه ولاد الكلب

حسبي الله ونعم الوكيل

قال تأمين قال كلها مصالح يا صاحبي

وسأبقي معكم مادام في القلب نبض

يا أخي الله يوقف نبضه عشان نخلص

شمس النهار Says:

مين قال انها تدوينه بدون طعم

دي لها طعم جدا

سلامي

yara Says:

اممممممممم
كنت قولت انى هعلق على روقان بس لما قرات البوست تانى حسيت ان احساسى ذى احساسى الاول برضوا الصمت امام الكلمات وعدم القدره على التعبير .
ومش قادره افسر سبب الحاله دى ايه ...هل هو ياس؟او ملل من كثره ما يحدث بدون حلول اوتقدم من سنوات وسنوات..اواحساس بالعجز امام الاحداث...او استصغار اى تعليق اوكلمه امام كلماتك والموقف والاحاسيس التى عبرت عنها.
الله اعلم
المهم

اخبارك ايه يا مصراوى واخبار التبرع للريس ايه معاك؟؟؟؟؟؟؟؟

اتمنى يكون كل شىء تومام وعلى ما يرام
واتمنى الا ننسى فلسطين من دعاءنا ولا تنساها قلوبنا.
اتمنى ان تكون محفوره ومكتوبه بداخلنا وبقلوبنا من قبل سطور كلماتنا.
اتمنى ان يعود لنا الاخلاص والانسانيه والحكمه فى التصرف.
اتمنى ان يكون العدل والحق هو الاساس فى عالمنا .
اتمنى ان نحاول بالقول والفعل نصنع ما بامكاننا .

اتمنى لك دوام التوفيق يا ابوعلى .
تحياتى لك

Unknown Says:

قالوها الاطفال
وفهموها الأطفال
لكن الكبار بأديهم
القـــــــــــرار
(انت اخويا ورسمى

فيك تقسيمات وشى

ابص فى عينك الاقى نفسى

واقول واتنهد فى سرى

سبحان سبحان

قاله وانت يا مصرى

نبض عمرى من زمان

عمرى ما هايكون

ليك من عندى ابدا دمار)

كلمات من نور Says:

ياه يا أبو علي

كلامك وجع قلبي وبشدة علشان أنا بنات خالاتي غزاوية كما يقولون و أبوهم غزاوي أينعم عايشين في شتى بقاع الأرض الأجنبية ..معلش أصل بقاع الأرض العربية ترفضهم وتلفظهم دوما ...أما أهله فكثير منهم هناك .؟..كل ما حدث زي الحدث المصيبة داه يحصل ببقى مش عارفه أقولهم إيه وهما لما يتكلموا مش بيبقوا عارفين يقولوا إيه .وداه دليل فعلا إن دمنا واحد ولا هي تقدر تقول يا مصريين انتم واحنا منقدرش نقول غير : يا أهل غزة عذرا فمصابكم مصاب البعض منا ..دمكم دمانا و الطعنات التي تصيبكم تأتي في ظهورنا وحسبي الله ونعم الوكيل

blue-wave Says:

كلامك على طرف لسانى يابوعلى والله

SHAPE YOUR LIFE (ABOALI) Says:

الى نورحياتى

فعلا الصغار يدركون الان اعمق وانقى من الكبار

ربنا يوفق للخير ان شاء الله

يسعدنى وجودك هنا

SHAPE YOUR LIFE (ABOALI) Says:

الى كلمات من نور

وهانعمل ايه يا ست الحبايب
ان غدا اكيد به الفرج لو اجتمعنا وغيرنا انفسنا بالشكل الذى يقربنا من الله
النصر من عند الله لمن احب لقاء الله


تحياتى الراقية الراقية لشخصك الكريم

SHAPE YOUR LIFE (ABOALI) Says:

الى بلو ويف
الكلام ده كلنا بنقوله يا دكترة لعل وعسى
نجد قلب قد وعى يعرف من العدو الحقيقى


مشرفانى والله يا دكترة

SHAPE YOUR LIFE (ABOALI) Says:

الى هى وظروفها

انها الحياه واكيد هناك حكمة لا نعرفها

شرفتنى برايك ووجودك المميز

SHAPE YOUR LIFE (ABOALI) Says:

الى الحاجة شمس النهار

بدون طعم لاننا نعرف الطريق الواضح
ولا نذهب اليه

مشرفانى يا انسانة يا راقية

SHAPE YOUR LIFE (ABOALI) Says:

الى يارا

دايما لك طله رائعة فى تعليقك

بحضر للريس محطة بنزين كاملة تحبى تشاركى

اتصلى على الرقم التالى للمشاركة

صفر صفر صفر اربع اصفار

مشرفانى يا انسانة