فعلا اتعلمت

, الخميس، 21 يناير، 2010


جدى كان راجل جدع كان دايما يناكف فيا

وكان دايما يقول يا ابنى اتقى الله فيا اروح ارد واقول اللهم اجعلنا من المتقين

وكان ردى ده جدى يستمخ منه اقوى وكان يقول ليا بتفهم يا واد

اقول له بلاش واد يقولى انت مش عاوز تهاجر وتسيب البلد اقوله اه

يقولى بس يا ولدى حب الوطن من الايمان زاى ماقال المصطفى صلى الله عليه وسلم

اقوله بس لو الرسول شاف اللى بيتعمل فينا دلوقتى كان قال غير كده

فيقول سبحان سبحان

يا ابنى متقولش كده روح ازرع قصرية زرع وتعالى

اقول قصرية زرع ايه يا جدى اسمها اصيص يقول معلش على قد علامى

فى الحقيقة كنت باطنش

وهو كل شوية يقول زرعت اشير بوجهى لاء

فى يوم حسيت انه زعل

قولت ازرع ومالوا بس ازرع ايه قولت هازرع فول مانا باكله كل يوم

المهم احضرت الطين ووضعت الفول فى القصرية على راى جدى

كل يوم اسقى القصرية وانتظر ظهور اى حاجة تتدل على عمليه الزراعة

كل يوم اشوف واى حاجة حول القصرية انضفها يعنى واخد بالى منها تمام اعمل ايه بقى جدى وحبيبى

المهم فى يوم فرحت جدا

الله الله الفولة بداءت تتطلع قولت بقى اروح لجدى

اقوله انا زرعت بس قولت فى نفسى اصبر كام يوم تكبر شوية

وكنت حريص انى كمان اخد القصرية فى اوضة النوم وابص قبل ما انام ليها واقول يلا بقى اكبرى

بس عجبنى المنظر اووى لانى انا اللى زرعت الزرع ده والفول كبر

المهم بعد ما كبر الفول روحت لجدى افرحه ولا انكر انى كمان فرحان نى فلحت فى حاجة

فرح جدا جدا جدى وقال هايل يا ابنى كده بقيت راجل

ضحكت وقال ليا تعرف لو انا بقى جيت وكسرت القصرية دى

قولت لاء ليه كده بعد لما تعبت فيها وعلمت خطة حراسة ليها وسقتها وكبرت

جاى دلوقتى وتقولى اكسرها ده حرام عليا ان عملت كده

قال شكلك بقى عندك ولاء للقصرية يا واد قولت ومالوا مش انا اللى زرعت اكيد ولائى للقصرية

قالى شوف يا ابنى دلوقتى بقى عندك حاجات كتير

عندك نجاح تقدر تبنى عليه زرعت وخططت ونجحت

عندك ولاء لحاجة تعبت فيها وشوفت نتيجة سهرك عليها واهتمامك بيها

خلى عندك بقى ولاء لوطنك وابنى فيه سلمة ورا سلمة فى سلم النجاح

ساعد غيرك وشارك فى الخير ومالكش دعوة باللى عاوزك يكون اليأس عنوانك دول هما اعدائك

باهتمامك ورعيتك هاتشوف نتيجة تعبك ويكون ليك بصمة فى بلدك ووطنك

وربنا لا يضيع تعب حد هو مطلع وعارف

وسكت ومشى

وانا فضلت حاضن القصرية

قلت الراجل العجوز ده لعب فى دماغى وغير خريطة عقلى

اه منك يا جدى يا ارعوبة

28 Response to "فعلا اتعلمت"

ستيته حسب الله الحمش Says:

طبعا انا سعيدة جداااااااااااا إن ولائك للقصرية
وأحيي جدك رحمه الله رحمة واسعة

بس مسألتش جدك لو جه حار لك والقصرية بتتشمس وبتعمل البناء الضوئي على سور البلكونة وراح واكل الفول كله سرقة وغصم وإتدار يا ترى شعورك ها يكون ايه؟
والا لو اخوك "ابن جلدتك" خد القصرية كلها بالتزوير ياترى
ها تسيب لأخوك القصرية
والا ها ترفع قضية
والا ها تأجر بلطجية
والا ها تقرأ العدية :)

yara Says:

جميله جدا فكره جدك دى يا ابو على لانه علمك الانتماء بصوره عمليه وكمان عرفت ان الانتماء نحن من نصنعه بايدينا وبمجهودنا ..يعنى مثلما انت لم تنتمى الا بعد جهد وعناء ومراقبه حتى وجدت ثمره زراعتك كذلك الوطن يحتاج هذا البذل حتى يتضح فى قلوبنا معنى الانتماء.

ليك حق تتعلم يا كبير
وواضح ان العيله وطنيه ابا عن جد عن جده .

بس اشمعنا الفول يعنى يا مصراوى؟

طوبه فضه وطوبه دهب Says:

بجد ربنا يرحمه الحكمه بتيجى من الناس دى بيقولوا اصدق واعقل كلام فى الدنيا رحمه الله رحمه واسعه هو واموات المسلمين جميعا فقد رحل ولكن بعد ان ترك فيك اجمل واقوى مثال وحكمه تقتدى بيها فى حياتك

موناليزا Says:

:) يعنى ماشاء الله الحكمة عندكم بالوراثة
متفقة مع جدك تماما وضد مبدأ الهجرة
وعجبنى أسلوبه العملى
موضوع هادف أحييك عليه

المعتصم Says:

اقولك انا بقى على حاجه ماتعرفهاش ياعمنا
الخبر المهم واللى انت ماتعرفوش
ان ولاء اتجوزت وسافرت مع جوزها السعوديه وعايشه مبسوطه هناك وزى الفل ومش ناويه ترجع تانى ياعم
لاتقولى قصريه ولا غيط
القصريه وقعت من الدور الرابع واتفشفشت
والزرعه دبلت وماتت من العطش
ســـلام ياابوعلى
(على فكرة انا بحب مصر جدا ورفضت كتير انى اسافر واسيبها لسه اخر مرة الشهر اللى فات فى وظيفه كويسه وبمرتب ممتاز بس للاسف انا عبيط ومستنى ولاء ترجع تانى)

أمل حمدي Says:

بغرس الانتماء للاشياء وولادة الحب مع هذا الانتماء

قد يهون علينا أشياء كثيرة رغم مرارتها

مبدع يا ابو على في توضيح معاني كلامك

دمت متميزا بقلمك الهادف

ولا إيه ياابو علي

سلام

ABOALI Says:

الى ستيته

ايه بس يا ست الكل لزمته ايه كرسى الكلوب ده
نعمل اللى علينا واجرنا على الله
مع حبة مهارات فى اخذ الحقوق والتعامل مع بنى الانسان
كله هايبقى تمام
تخيلى لو كل حى الدقى مثلا كل واحد ساكن فيه لم يرمى ورقة فى الشارع وراح ينتخب
مش هايبقى المنظر حلو
تخيلى عائلتك الكريمة اللى بتربيها على الفضيلة
كانت نموذج لكل خير بدون ماتتكلم مش هايشجع غيرهم

احنا محناجين شوية حماس فى قلوبنا مع تشغيل الجمجمة علشان نعامل البشر التانين

ويا باشا القصرية لا تدوم
عمل الانسان وسيرته الطيبة هى اللى بتنفعه اولا حتى لو كنا فى زمن الهشك بيشك والاهتمام بالكوسة على حساب الملوخية

منوارنى والله يا فندم
كفايه عليكى صورة القمر اللى بيظهر تعريف ليكى ده ماشاء الله فيه منه تفصيل

ABOALI Says:

الى يارا

فعلا الافذاذ اللى كانوا زمان كان عندهم راحة بال ويقين
علشان كده كانوا هاديين ومش شالين للدنيا مشكلة
ان ماتوا يبقى هى دى اخرتهم
وان عاشوا هو ده نصيبهم
اهم حاجة يعملوا الل عليهم

ام عن الفول واختياره

بينى وبينك فكرت فى الكوسة علشان اغيظ جدى
قولت حرام خليك فى الفول علشان مش لقين غيروا
قولت اعذب جدى بيه علشان هو ده اللى بياكلوا كل يوم فقولت الراجل هايزهق
شوية يا اختى طلع اروعوب

وباع ليا القضية

اه منه اه منه
اشوووووووووووووووف فيه يوم
خير ان شاء الله

ههههههههههههههه

منورانى يا انسانة رائعة بجد

ABOALI Says:

الى طوبة من ذهب واخرى من الفضة

فعلا فعلا انسان انسان
وساعات لما افكر هو احنا انسان زيه كده
احس انى لاء مش انسان
يا ترى فعلا كده

سؤال فعلا
معاكيش طوبة اعدل بيها دماغى الله يخليكى ويبارك فيكى يا ست الكل

يااااااااارب تساعدى اخوكى
اتبرعى ولو ب كيلو ذهب

ههههههههههههه

منورانى بوجودك هنا وهناك برضوا

ABOALI Says:

الى موناليزا

يا قهلا يا قهلا
كيفك يا فندم

والله يعنى يا اختى انا فاتح محل صغير كده
للحكمة
شوفى كده عاوزه كام كيلو وانا اجهزهم ليكى
وهنيالك يا فاعل الخير
ههههههههههههههه

منوارنى يا موناليزا

ABOALI Says:

الى مش عارف

اه
اقولك بقى على اللى انت متعرفوهوش
باعتبارك مش عارف

انا بقى جوز ولاء فى السعودية
كنت بطهر نفسى مع ولاء فى مكة اووووووومال

علشان كده تبقى نيتى صافية وارجع ولى من اولياء الله
واعمل مقام يا اخويا
والعملية تشتغل بقى والمصارى تهب علينا

هههههههههههههه

حب ما تعمل لكى يحبك العمل

منوارنى يا انسان

ABOALI Says:

الى الفاضلة امل حمدى

حلو امل حمدى دى حاسس انه اسمه موسيقى كده
فيه انتماء ربانى
امل وكمان حمدى يعنى دنيا بالامل وحمد للاخرة

فعلا اسم متظبط على انسان يستحق كل الخير


ولالالالالالالالالالالالالالالالا ايه
شكرا على حسن تفاعلك

منورانى

MaNoOoSh Says:

بيعجبني دايما روح التفاؤل اللى عندك يا أبو على

رغم ان الوضع صعب وأصحب من قدرة تحمل كتيييييييير من المصريين


مش هتكلم عن الولاء بس ممكن اقول عندك حق فعلا اننا لازم نعمل اللى علينا ومنستسلمش لليأس أبدا

شمس النهار Says:

عجبتني اوي طريقة جدك في الحوار
طول عمري اقول ان التجربه خير وسيلة للأقناع

بس يعني لما جيت تزرع مالقيتش غير فول
ياابو علي

طيب ازرع ورد ياسمين
نعناع

ياله فول فول

سلامي

كلمات من نور Says:

الله يا أبوعلي على أجدادنا و عمق معرفتهم وحبهم لينا ..حب لن تجده أبدا فدوما أغلى الولد ولد الولد ...حب حتحسه لما تبقى جد ...ربي يرحم موتانا ويخلي لينا حبايبنا ...انت مع الفول اللي جدك خلاك تزرعه يا أبوعلي زرعت في قلبك مثل و حكمة و حب و انتماء والحمدلله فعلا مش زرعت كوسة ألا كانت حتبقى مهزلة وكما قال شاعرنا العظيم: يا بلدنا يا جميلة فيكي حاجة محيراني ...نزرع القمح في سنين نحصد الكوسة في ثواني .
ابعتلي اربعه كيلو حكمة اوزعها على أبنائي الأربع..مش انت حتبعت لموناليزتي؟
ربي يلهمك دوما نور البصيرة وحبه

saragebaly Says:

جميل اسلوب جدك الحواري العقلاني الاقناعي

الانتماء شئ جميل

ياريت الحكومة اول حد يكون عندها انتماء

mohamed ghalia Says:

راجل حكيم
أكيد كان اصله منووووووووفى هههههههههههه

إيمان Says:

لما بنزرع شئ بايدينا ونصبر عليه ونتحمل رعايته بيتغير شئ جوانا معرفش ايه هو
يمكن بنصبح ايجابين اكتر يمكن بنحس بالمسأولية أكتر
لكن الاكيد اننا بنتغير للأحسن جميل جدك وجميله حكمته

The Queen Says:

ابو علي
جميل أوي البوست ده
شدني اني اقراه للآخر لأن الاسلوب اشبه بحكاوي الأطفال شيق جداا يجبرك انك تكمل للآخر ويخليك تفكر وان بتسمع أو بتقرأ المغزى من القصة .. لدرجة اني لما انتهيت من القراءة اصبت ببعض الحيرة من فرط اعجابي بحكمة الجد .. وتساءلت يا ترى فعلا جدك هو اللي عمل معاك كده واللا دي قصه من وحي خيالك علشان تضرب مثل للإنتماء ؟
أيّا كان فأنا بأحييك جدا على ابداعك
سلمت يداك

القدر و انا Says:

ابو على
دائما اذا اردت ان تثبت مبدأ وتعلم شخص عليك ان تجعل المتلقى يمارس التجربة او شبيهتها بنفسه
فلن ينسى التجربة وسيقتنع بكل النتائج المترتبة عليها
وتلك حكمة جدك الجميلة التى جعلتك تقتنع بالزرع فى بلدك مهما كان التعب
والحصاد منها مهما قل الانتاج
تحياتى لكتابتك الجميلة

ABOALI Says:

الى ماااااااااانوش

الغائبة الحاضرة

بيعجبنى فيكى انك متوزانه يا مانوش
ودى عظمة خلق الانسان انه فيه كل شيىء
وباحس فى كلامك بالادراك لما حولنا
ونسبة الوعى عندك راقية جدا

احييكى على جمال ورونق كلماتك
ليس لانك احسستى فى كلامى بالتفاؤل
ولكن لادراكك العالى بقيمة ذلك الامل الذى نتمنى نحيا فيه


لك عميق تقديرى بجد يا مانوش

ABOALI Says:

الى الجاجة الراقية شمس النهار

الجد يتكلم على لسان الحفيد الذى تخيل جده ينادى فينا ببذل مزيد من حبات العرق مثله
حتى يتكون له كيانه

اما عن الفول فملناش غيره ايه احنا من غيره
هو الطعمية هو الاساس من غيره المصرى يحتاس
وعجبى

وبالغ تقديرى

ABOALI Says:

الى كلمات من نور

كل مرة تحرجينى كده من عذوبة وادء كلماتك
بجد بقيت احب تعليقك جدا
فيه اولا بركة من عند ربنا وباحس انه فيه دعوة صادقة احتاج اليها انا

ربنا يبارك ليكى فى حياتك ويجعلك من السعداء فى الدنيا والاخرة

واما عن الجد اقول لك انه كلام الحفيد الذى جرى على لسان الجد
فالجد هنا هو ابوعلى والحفيد ابوعلى برضوا الذى اراد ان يسمع هذا الكلام

شكر خاص لك يا انسانة

ABOALI Says:

الى سارة الجبالى

فعلا جميل شعورنا بالولاء
والاجمل يا سارة الا ننتظر الى حكومة او غيره

لانها فى نظرى ليست قدوة

ولا يعجبك كثرة الهالكين اصنع طريقك وضعى فى قلبك بذرة اليفين
ستكونين يوما قدوة لملايين

اشكرك على تشريفك لى

ABOALI Says:

الى محمد الغالى

اخس عليك اخس
جدى يبقى منوفى
ده يبقى خلاص الحكمة طلعت من عمر مكرم

تهيئات دى يا غالى

هههههههههههه

ABOALI Says:

الى ايمان

ماشاء الله ايمان عندنا بعد غياب يالها من طله رائعة

حكمة الجد يجب ان يعلمها الحفيد ليعمل ويجتهد يا ايمان

رزقك الله بكل خير

تحياتى الراقية لانسان راقى

ABOALI Says:

الى كوين

الحفيد تخيل الحكمة وصاغها على لسان الجد
ليتعلم الحفيد ويدرك ويذكر نفسه

يا ترى الحفيد نجح فى رايك ؟

ان كان قد نجح قولى له انه ينقصك الكثير
وان كان قد فشل فقولى له حاول مرة تانية فلازال امامك طريق ذو مسير

اشكرك على تعليقك الواثق

ABOALI Says:

الى القدر وانا

نعم اتفق معاكى ولك فى القراءن المثل

وسبحان من ضرب لنا الامثال لنتعلم هو القادر العالم بصنعته وكيف يجعل اوصالها تتكامل فجعل لنا الحكمة لنسمو

جزاكى الله كل الخير على حضورك ها هنا