عُض نفسك
, الأحد، 7 فبراير 2010
المشهد الاول
هو انت فين طول النهار وسيب ليا عيالك دول مش تقوم بمسئولياتك شوية
قولت حاضر من عيونى وكيانى
قالت اه اه ابدء بقى وقول كلمتين لزوم الاستهلاك المحلى
قلت يا ستى نخليهم مستوردين علشان خاطر عيون ام زجزج وبيج بيج
العيال ماسكين فى بعض طول النهار انا زهقت
المشهد التانى
ايه يا زجزج وانت يا بيج بيج حد يزعل ماما ست الكل نور عيونا كلنا
قال زجزج مهو يا بابا بيج بيج عمل حملة مضادة
قولت ايه ايه حملة مضادة اعوذ بالله
ليه يا بيج بيج تعمل حملة مضادة وتزعل اخوك خليها حملة قومية
قام زجزج قال يا بابا الموضوع جد
المشهد الثالت
يابابا انا عملت نشاط اجتماعى فى المدرسة وعملت مجلة تحت عنوان نظف نفسك
قولت الله الله الله هو ده الكلام احنا فعلا نسينا النظافة وطريقة التنظيف كمان
علشان كده نتعرض لهجوم من الامراض الوحشة
صح يابابا
لكن بيج بيج عمل حملة مضادة وقال ليا انه هايعمل مجلة بعنوان عض نفسك
يرضيك كده يا بابا
امممممممممممممم مجلة عض نفسك صعبة اووووووى دى يا بيج بيج
شوفت يا بابا كده بيج بيج هايهد اللى بعمله
قولت طب ايه وجهة نظرك يا بيج بيج فى مجلة عض نفسك
قال يا بابا هو لو سئلنى كنت قولت ليه
قلت فعلا لما نريد الاستعلام عن شيىء محيرنا نسئل وبلاش نجتهد
ايه بقى وجهة نظرك
قال عُض نفسك دى كناية يا بابا عن لوم النفس وتاءنيب ضميرها
يعنى لما نتعرض للمرض ويكون نتيجة تقصير منا يبقى نعض نفسنا
ولما نرمى مثلا قشر موز واحنا نتكعبل فيه يبقى نعض نفسنا
قوووووووووولت ماشاء الله ايه الفكر الجميل ده يا واد
زجزج قال
بس ده يا بابا هايخلى الناس يقرؤا مجلة بيج بيج
قولت مش شرط يا زجزج فيه ناس بتحب الاسلوب الكلاسيكى او المعتاد فى النصح
وناس تحب الاكشن وكده
يبقى الفريقين كل واحد يختار اللى يريح فكره
المشهد الثالث
تعرفوا يا اولاد
كنت زمان امضغ لبان وشافنى واحد زميلى وقال ايه اللى بتعمله ده مش عيب عليك كده
وانت كبير تمضغ لبان وتبقى شبه الستات
كده انت متشبه بهم و ربنا هايكون غضبان عليك
وده اسلوب مش كويس
وانا طول الوقت ده ساكت
وبعدين قولت
خلصت كلامك قال هو الكلام هايخلص مادام فيه ناس زيك
قولت يا صديقى
قبل ان تجهد نفسك فى الحيرة واطلاق الشتائم
اسئلنى وانا اعرفك ليه
الدكتور قال لما تحس بحبة حموضة فى معدتك امضغ لبانه هاتقلل شوية من نسبة الحموضة
وبعدين تتحسن
ده السبب
قالى مش تقول
قولت ومش تسئل
علشان كده يا زجزج اسئل اخوك بهدوء واعرف وجهة نظرة واحترمها يمكن يكون عنده فكره
او وجهة نظر مش واضحة بدل ما نتخانق ونتضايق ماما حبنا الكبير
المشهد الرابع
ايه ايه ده انت لميت العيال وعملت حزب بدل ما تيدى كل واحد على دماغة من الدوشة اللى عملينها طول النهار
سئلتها طب كانت الدوشة دى سببها ايه
قالت معرفش يا مدلعهم
قاااااااااام زجزج وبيج بيج فى نفس واحد
اسئلى تعرفى ياااااااااااااااااااااااااااا ماما
المشهد الاخير
عض نفسك
جبااااااااااااااااااااااار الواد ده ابن مين ؟
بعد ان تقرء اول مرة اقرء مرة كمان
صدقنى مش هاتندم
وبعدين ان كان هناك درجة من عشرة
اعطى درجة يا استاذ وليك دعوة هدية اسبوعية
:))
مين زجزج وبيج بيج دول ياابو على
ايه اسامى الكفار دى حرام عليك ده دلع ولا توبيخ للعيال؟ ههههههه
شوف ياسيدى اولا ماشاء الله تفكير اولادك الاتنين جميل ربنا يخليهملك
بس على فكره احنا فعلا مفتقدين لحتة اننا نسمع قبل مانتكلم دى
كلنا كده او معظمنا
بنتسحب من لساننا ونقوم نازلين على دماغ اللى قدامنا زى ماصاحبك عمل من غير مانديله حقه فى الدفاع
وتقول ايه بقى فى ناس من غير ما تسأل ولا حتى تكلف خاطرها انها تنصح فى شكل توبيخ وتروح من وراك تتكلم وهى معتبراك مخطئ وهى اساسا ماسمعتكش ولو كانت سمعتك يمكن كانت دافعت عنك كمان
ملحوظه: لا بس حضرتك بتعرف تثبت ام العيال جامد بتاكل عقلها بكلمتين من الاخر:) والله لو كل رجاله مصر بتعمل كده مع مداماتها ماكان حد اتطلق اصلنا هبل والله وبيتضحك علينا بكلمتين :)
على الهامش
اسفه ياابو على على انى مكنتش بعلق عندك بس انا بتابعك اول باول من الريدر وكان عندى حالة زهق نادر لما كنت بكتب كومنت عند اى حد
على اى حال مدونتك من المدونات اللى لازم الواحد يشهدلها بالاحترام
وياريت ماتزعلش ادينى رجعت اقرفك بتعليقى اهو :)