مداعبات زوجية

, الثلاثاء، 30 يونيو 2009





قالتلى شايفة


اخلاقك اتـغيرت


مفيش كلمة بحبك


مافيش كلام هيام


هو انا مش قدامك


ولا انت نسيت الغرام


ابتسمت وانفرجت اساريرى


وقلت كده هايحلى الكلام

(وش بيغمز)


قالت وعينها مليانه شرر


والله هاجبلك التهاب فى قلبك


ومش هاينفع معاك مسكن


وهاتفضل تعانى من الالام


قولت وهاهون عليكى


وانتى فى القلب ساكنة


بس انتى ساعات بتنسى العنوان


وانا عمرى ما ادرى حبك


وانتى عايشة معايا فى كل لحظة


وفى كل مدار كمان


حتى اسئلى خط الاستواء يقولك


اد ايه الروح بتحبك


قالتلى شكلك حافظ كلمتين


وكمان بتقول مدار


هو البيه مذاكر جغرافيا


قولت سبحان الله دا انا هاشوف الامرين


قالتلى طب خلى بالك انا حبى سرطان


وهاتعانى من حموضة فى صدرك


والدوا هنا فى قلبى


وهاخليك دايما " حيران


قولتلها ماتيجى نعمل معاهدة


ونكتب مع بعض شروطها


يمكن يسوووووود الوئام


بصت كده بأستغراب


قالتلى فاكرنى غزة ولا عايشة فى الضفة


انا صاحبة وطن يا واد


وانت وطنى وقلبى


وان كان الكلام مش عجبك


هاحلف عليك ومعدتك قدام عينك


هاتلف وتدور فى السما والبحور


لقمة عيش يا جدعان


قولت هو مافيش فى الحب سلام


ليه الكلام كله نواشف


ومكتوب عليه قابل للكسر والجنان


انا عارف انى انا حبك


بس الكلام محتاج طشة حنان


بلاش جبروت حوا


ده احنا الاتنين نحمل لقب انسان


قالتلى انت نهارك مش معدى


ومش عارف تعامل شريكة الايام


قولت بصى هى دايما معادلة


حب فيه طراوة


وكلام نقاوة


ويقين لرب البرايا


هاتكون حياتنا سعادة


وانتى كل انا وكل منايا


قالت ماشى يا مهذب


بس خلى بالك


الحياه من غير توابل


اللى بيقولوا عليها مشاكل


هاتكون من غير طعم ولون


مش عاوزك فى يوم تكون مجنون


وساعة لما احتاجلك


افتحلى بس باب صدرك


وهاكون انا كل نبضك


وبحبك ليا وعطفك


هاتخلينى اكون عبدك


قولت انتى ملكيتى


والحارس مستنى همسك


قالتلى مش قولتك

اخلاقك اتغيرت


45 Response to "مداعبات زوجية"

من غير عنـــوان Says:

صورة واقعيه كتبت برقه وحرفيه

الله ينور يا أبو علي

استمتعت


أمنياتي

ABOALI Says:

الى من غير عنوان

يا هلا يا هلا بالناس الكمل

المدونة نورت
هو العنوان تاه شوية
بس ومالوا بكرة تعرف ان شرفها من غير عنوان


لك تحيتى

احساس طفلة محبة للرومانسية بس واقعية Says:

جميل الدمج الرهيب دا
بين الكوميدية فى العلاقة الزوجية والرومانسية الطبيعية بين كل شريكين

الحوار حسة انه تلقائى وطبيعي
تسلم ايدك بجد جميل وحقيقى

تقبل مرورى

MaNoOoSh Says:

تعرف احلي حاجة بين الزوجين المناغشة دي


هو يعني الست صحيح بتحب تتقل شويتين
بس لما تعبر عن حبها بيبقي بحر مليان حنان

شموسة Says:

هههههه
حلوة المداعبات الزوجية دى يا أبو علي
شموسة...

mohamed ghalia Says:

روعة يا أبو على
دايما بتبهرنى بأسلوبك الرائع
ربنا يسعدك دايما

ABOALI Says:

الى احساس طفلة تعشق الرومانسية

فينك
متغيبة عن مدونتك ليه
وبعدين
هاعمل فيكى شكوى

واشكرك
على رايك الرافع للمعنويات

ABOALI Says:

الى مانوش

يااااااااااواد انت يا فاهم

صح والله الكلام
وده جزء من هدف البوست فعلا

باحييكى
وعاوز الربع جنية بتاعى

ABOALI Says:

الى شموسة

والاحلى ان نستمتع بها

ولالالالالالالالالالالالالالا ايه

ABOALI Says:

الى محمد الغالية

يا عم اسلوب اية بس
واحنا نيجى فى اسلوبك ايه

دايما سعيد ان شاء الله

واللى ليه نبى يصلى عليه

يا عم صلى

aidy Says:

الله بجد

انتزعت منى ابتسامة وضحكة

بشكر حضرتك عليها

اسلوب حضرتك حلو جدااااااااااااااا

حساه زى الشعر الساخر

يمتعنا ويضحكنا

تحياتى

yara Says:

هههههههههههههههههههههه
(لا جميله بجد)
بتقولك اخلاقك اتغيرت وشكلك بتقول كلمتين ومذاكر جغرافياااااا؟؟؟
صحححححح انا معاها لو كنت قولتلها الكلام الحلو ده من غير متفكرك كان هيبقى ردها تانى .
وبعدين غريبه قوى يعنى عاده الرجل بيكون متفهم جدا لطبيعه زوجته وعارف ايه اللى ممكن يسعدها ومش بيعملوا (مش عارفه بيتقل يعنى ولا ايه؟)
بس كويس يا ابو على انك بتعرف تتعامل مع الموقف بشكل لذيذ وذكى وطبعا غالبا المراه بتكون طيبه وبتصدق يا عينى الكلام مع انه بيكون(مذااااااكره)

بس بوست جميل ومختلف يا روميوووووو
سلام

ghorBty Says:

السلامـ عليكمـ

وصدق من قال ويكفرن العشير

انا جايه اهدي النفوس

ماما أمولة Says:

هههههههههههههههه

روعة

تسلم ايدك بجد

تقديري

شمس النهار Says:

ايه الكوميديا الزوجيه اللطيفه دي
بجد ضحكتني اوي

وخصوصا طشت حنان:)

المتبهـدلـون فـي الأرض Says:

جميييليه جمييليه (بالفلاحي)

EMMY BABY Says:

هههههههههههههههههههههههههههههههههه

لا بجد والله ضحكتنى اووووووووووووووووووووووى

ههههههههههههههههههه

اصلى تخيلتهم هى بتقعد تتقل عليه علشان تسمع كلام حلو اكتر مش كلمتين وخلاص

فعلا الست ممكن الراجل يشوفها ناشفة ونكدية لكن هى بتحب تغلس كدة على الراجل علشان خاطر يصالحها ويقلها كلمتين حلوين

وهى ياعينى من طيبتها بتهدى وتنسى اى حاجة وحشة عملها

ااااااااه منكم يا بنات حوا

بجد اسلوبك جميل اوى يا ابو على

بس يا بت انتى بتقولى ايه جديد يعنى

اهو اى حاجة ترفع من روحه المعدنية وخلاص p:

تحياتى

ايمى

كيــــــــــــارا Says:

هههههههههههههههههههه عثثثثثثثثثل

الكلام لذيذ اوي ووصل للهدف المنشوووووووود

سكينة Says:

طششششششششة حناااااااان
النبي اعملوا حسابي معاكم أنا كمان
:)
وبرافوا أنك ما اعترفتش انك مذاكر هو أكل وبحلقة
ثم المذاكرة مش غلط تكونش بقت غلط ومحدش قالي
:(

جنّي Says:

السلام عليكم

ابو علي كيف حالك سيدي ..

الله الله .. قولي بقى بتجيب الكلام الحلو دا منين .. اوعى تقولي باكل حلاوة كتير !!

وهو دا الحب عذاب ولوعة وشجن وفراق وبكا وانين وكل المصطلحات الشقية دي .. بس يا ريت تتغير اخلاقنا ونخلي الحب فرح وسعادة وهناء وسرور ..

مش كدا ولا ايه

سلام

ABOALI Says:

الى ايدى

يااااااااااااااه جميل جميل


ان كده كسبت كتير

البسمة بتكيف
والضحكة شقة تمليك

ههههههههه
انا سعيد انى البسمة نورت وجهك
وان شاء الله دايما


اشكرك

ABOALI Says:

الى يارا

هى الحياه كوكتيل
لازم فيه نستحمل بعض
واللى فرحان يعطى الفرحة لغيره
واللى زعلان يحاول يقلل من زعله

الحياه بين ادم وحوا تحوى الكثير من المناغشات
ولكنها تتطلب عقول متفتحة حتى تستمر

احييكى دائما على ارئك الصائبة

وعاوز حلاوة البحث
ولا الفوووووووووووووووول مارك
مالهاش حلاوة الا الطعمية


مستنى


تحياتى

ABOALI Says:

الى غربتى

اه يا سيدى اه

نهدى النفوس طبعا
مال ايه

احنا غرضنا شريف

معظم اهل النار من النساء

اهو علشان نهدى النفوس برضوا
هههههههههههه

اشكرك

ABOALI Says:

الى ماما امولة الفاضلة

ازيك يا ست الحبابيب عاملة ايه

وكيف حال ست البنات

معلش انا مقصر ظروف الشغل

تحياتى لك الراقية
واكيد انتى اكبر من المداعبات دى

ولالالالالالالالالالالالالالالالالا ايه

ABOALI Says:

الى الحاجة شمس النهار


اخبارك ايه يا فندم
عسى ان تكونى فى خير حالى

اشكرك على رايك ومنكم نتعلم


ورحلة موفقة

ABOALI Says:

الى المتبهدلون فى الارض

اسكرك اسكرك اسكرك


وكفاية كده علشان البهدلة

ABOALI Says:

الى ستو ايمى

يا جميل انت يا جميل

الحياه الزوجية مبينة على الاكتمال والتوافق

وحبة عليك حبة عليا

يعنى من الاصل مافيش داعى لجعلها كلها ضرب

ممكن تحصل شوية مناغشات زوجية بس فى الاخر احنا من بعض والبعض هو احنا

طبعا يا ستو منكى نتعلم البيان والحكمة

ومن اجلكم سنستمر على الدرب

دعواتك يا ستو

يا منور النت

ABOALI Says:

الى كيارا

يعنى يا كيارا نقدر نروح كاس العالم

والنبى قولى لى علشان انا زعلان


ولالالالالالالالالالا ايه

ABOALI Says:

الى ساعات سكينة

انتى تحاولى تعملى ايام سكينة
بفتح السين بدل من كسرها
وانتى تلاقى طشات حنان مش حنان وبس

فينك وليه الغيبة دى كلها

ABOALI Says:

الى جنى

ياااااااااااا سلام عليك ولد
هو ده الكلام

والكلام الحلو ده من الناس الحلوة

حاسب بقى على نفسك

مشرفنى بالتاءكيد

كيــــــــــــارا Says:

ههههههههههههههههههههههههه

لسه شويه شد حيلك انت بث وانت هتروح لكاس الكواكب الشمسية كيكيكيكيكيكيكيك

غروب Says:

حلوه اوى المداعبه دى يا ابو على

ربنا يديم عليك السعاده

الازهرى Says:

حب فسيولوجى

ادينى رجعتلك يا عمنا
وتحلى الايام من تانى
بلقاء الاحباب

تحياتى وخالص مودتى

micheal Says:

متميز أوي بالشعر السياسي

dalia Says:

أبو على الفنان
كيف حالك يادوب لسه راجعه الى حياتي الطبيعية في مصر التغيير جميل بحد ذاته شكرا على سؤالك
أما بخصوص اخلاقك اتغيرت طبعا كل واحد ادرى باخلاقه:)
بس فعلا البوست بتاعك بيجسد حاجات كتير بتحصل بنسمعها من الاصدقاء عن تغيير غريب بيحصل بعد الزواج بالنسبة للزوج أو الزوجه ياليته قاصر فقط على المشاعر ولكن في الاخلاق كمان والمعاملة وده قد يكون طبيعي لان الاتنين تقريبا ميعرفوش الا الحاجات الجميلة سواء في المنظر أو الابتسامة ومع مرور الوقت والمعايشة الحقيقية بيحصل صدمة كتير بتبقى صدمة غير متوقعة وغير مقبولة أو محتملة فيحدث الانفصال لكن أجمل ما في موضوعك انه جاء على شكل مداعبة جميلة تعني الاستمرار في العلاقة وليس هدمها
تحياتي لك وشكرا مرة تانية على سؤالك
داليا

سندس وأمل Says:

ايه الشعر الى مليان امراض ده:)

بس حلو اوى حلو جدا....

ماشاء الله عاشت ابداعتك وعاش قلمك

سندس

كلمات من نور Says:

هههههههههههه مداعبات زوجية حقيقية واقعية ميه ميه......

تحياتي

ABOALI Says:

الى كيارا

الكواكب الشمسية

هو ده الكلام

هى الشمسية بكام دلوقتى يا طنط

ههههههههههه

ABOALI Says:

الى غروب

ازيك يا غروب وعاملة ايه


مش عارف ليه

حروف كلماتك دايما بتحمل فى طياتها لمحات من الحزن


ياااااااااارب يفتح عليك الله بالخير والبسمات من عنده


شكرى وخالص تقديرى

ABOALI Says:

الى الازهرى


حبيبى

ازيك يا باشا

منور ونورك زيادة

والتوت عمل المفعول

وكلك بهجة وسرور


مشرفنى

ABOALI Says:

الى ميشل

سياسى ايه يا باشا

ده دبلوماسى تحرورى ثورى معتدل
دافىء ممطر شتاء"



مشرفنى دايما

ABOALI Says:

الى داليا


عودا احمدا

اوعى تكونى اخلاقك اتغيرت

تعليق مباشر وفى الصميم

بس انتى اخلاقك اتغيرت

ولالالالالالالالالالالالا ايه

ABOALI Says:

الى سندس وامل


يا مرحب بالسندس يا مرحب بالامل

اشكرك

ABOALI Says:

الى كلمات من النور


صح الكلام
مية مية

معك ريال سلف



اشكرك

ryry Says:

كلامك جميل يابوعلي بس في ايه بتقول وخلقنالكم من انفسكم ازواجا لتسكنوا اليها0 حواء خلقت من ضلع ادم0 يعني لو كانت المراة نكديه فالرجل ايضا نكدي ولكن فيهما من يتحكم في نفسه او كليهما0 في موضوعك الرجل هنا هو المتحكم طبعا بما ان الكاتب راجل يمكن اكون خرجت عن الموضوع شويه بس خدني علي قد عقلي النسائي ياابوعلي 0