القطة وايتامها الستة

, الجمعة، 23 أبريل 2010










دخل دم الغزال على والده وقال احكى ليا حدوتة

حدوتة هههههههههههههه

لا اعرف يا دم الغزال نسيت الحواديت من زمان

ياااااااااه يا بابا معقولة احكى بس انت احكى وانا اساعدك

ياااااااا عينى عليك يا دم الغزال يا مساعد

طيب انا هاقول جزء وانت تقول جزء اتفقنا ؟

اتفقنا يا بابا قوووووووووول

هبدء يا سيدى بأهم جزء كانت امى لما بتحكى لينا حدوتة تقوله !!!!

قول يا بابا

كانت بتقول كان يا ماكان

وما يحلى الكلام الا بالصلاة على النبى المختار

عليه الصلاة والسلام

جميل يا بابا جميل

كمل انت بقى يا امووووووووووور

هههههههههههههههه

كمل !!!

هو انت قولت حاجة لسه

انا قولت اهم جزء قول انت بقى

قال ماشى هااااااااااقول يا بابا ودى حدوته

ناوى اعملها مسرحية ان شاء الله و استحمل بقى ما جنته يداك

قول قول

وسمعنا نغم الحروف وتألف الكلمات وصدق المعنى يا دم الغزال يا قمر انت

حاضر يا بابا حاضر

كان يا بابا فى سالف العصر والاوان والحكم ليك يا زمان لان الكلام عليك الان

قطة بتسعى على اايتااااااام ستة

هههههههههههههههههههههههههههههههه

قطة بتسعى على الايتام !!!!! وستة

اه يا بابا ركز بقى وبلاش تقطع حبل الغسيل

حبل الغسيل ايه يا ابنى

يا بابا مهو ده فكر

بغسل فيه عصارة مخى وتفكيرى عيش انت بس يا بابا اللحظة

وكمان الواجدان بتاعك يعيش علشان شغل الاكشن

معلش معلش ابوك دقة قديمة

وحاليا بحاول احدث الموديل بتاعى و انزله سوفت وير جديد !!

كمل كمل

القطة راحت جمعية رعاية الايتام علشان تاخد اعانة تساعد فى تربية ايتامها

اه وبعدين

الجمعية قالت انى اسمك مش مسجل فى جمعية القطط

معقولة يا دم الغزال !!

هى مش قطة برضوا ولا انت كنت بتضحك عليا

يا بابا قطة قطة بس الزمان غدار

يمكن تقريبا كده لم تدفع اشتراك الجمعية يا دم الغزال

هههههههههههههههههههه

اه

يا عينى عليها يا بابا مشيت فى الشوراع والحارات

تدور على حد يعطف عليها ويرمى سندويتش كومبو مع الكانز ولم تجد

وبعدين

مشيت على رصيف كورنيش النيل

يمكن حد من اللى بيقعدوا على الكورينش يا بابا

زاى الاخوات دول

انت اكيد يا بابا عارفهم مش كده

اه يا ابنى اه عارفهم بس ان بعض الظن اثم يا دم الغزال

دول يابنى بيحلوا مشاكل الوطن والمواطن وبيناقشوها فى زمن المواطنة المتواطن

ايون يا بابا اه اه اه

قطعت حبل مشاعرى والله

المهم بقى وخلى بالك من اللى جاى

علشان هايكون مأساوى شوية وتنزل من عيونك قواقع دمعية تشبة بركان ايسلندا

قول يا عم خلينا نساهم فى الحفاظ على منابع النيل

وهى يا باب على الكورينش بتنظر نظرة خلفية تطمئن على ايتامها

لقيتهم خمسة بس

ليييييييييييييييييييييييييه كده يا دم الغزال ؟

عقلها يا بابا ناو ناو واطلقت انين نونوة رهيب

لانها لما رجعت تبحث عنه شافت ضناها امام عين قلبها

فى دهاليز بالوعة الصرف الصحى المجارى يعنى

اه اه يا دم الغزال ليه كده يا ابنى

واللى يا بابا خلاها تحزن اكتر

انها عرفت انى البالوعة اخذت كام واحد من اللى بيقولوا عليهم بنى البشر قبل كده

وطبعا مافيش مقارنة بين بنى البشر و هى اكيد

طب والعيال الحبيبة قصدى بتوع الكورنيش دول

اللى شايفين البالوعة ماكنتش ليهم دور

دور ايه بس يا بابا دول عندهم دوار

بعد لما رضيت بالامر الواقع

وسلمت امرها الى بارئها

قالت نعبر الشارع على الرصيف التانى يمكن يكون امان

واتفقت مع ايتامها على المرور جماعة

حتى تأخذ الرحمة راكبى السيارات ويرحمون قطة تمر بأيتامها الخمسة

وهمت بالعبور واذ بالسيارات فووووووه فووووووه فووووووه

واذ ب اثنين من الايتام يتعثرا بعد ان عبر باقى الاولاد

وترى الام امام عينها احدهم تلعب به السيارات التنس ويسقط لا تدرى اين معالمه

فتنظر الى السيارات تقول لهم اين ذهبت مبادىء رحمتكم

وترى كلب ينظر من احد نوافذ سيارات عليه القوم ويقول لها هاو هاو باو باو كاو كاو

يعنى بعد الترجمة قتلنا منكم واحد ولسه ولسه ولسه

والثانى يتألم فتجرى به مع باقى الايتام الى القصر العينى

فلا تجد الا طبيب امتياز فى يده كيس شبسى وكانز

فتقول له الحق يا بشرى ابنى فيقول الحالة دى لم تكن فى المقرر

فتحمل ابنها وهو يقول لها ناو ناو نو ماو ماو ماو ساو ساو ساو

وبعد الترجمة

دول يا ماما بشر ويلفظ انفاسه

ايه يا عم دم الغزال ده

دى ميلودراما يا ابنى مش حدوتة بلاش كده ابوك قلبه خفق ومحتاج يشرب عصير

اه يا بابا اه ولسه اللى جاى السخان شغال

بقى يا بابا معاها ثلاثة بس من اولادها الايتام

فى الطريق قابلهم القط الكبير كابوتش زعيم المنطقة

قالها رايحة فين كده بالعيال؟

حكت القصة

قالها قطعتى شراين قلبى والله

مافيش حل ليكى الا الهجرة لبلاد بره

هناك بيعرفوا قيمة الانسان مابالك بالحيوانات امثالنا

اوووووووووومال هو احنا مش كائنات برضوا

الاولاد يهجروا وانتى اجيب ليكى عقد عمل فى الخليج

اعرف هناك كفيل قطى محترم محترم

وبلاش الضنا والعذاب اللى انتى فيه

قالت عاوزنى اضحى باولادى زاى البشر

واهاجر هجرة غير شرعية فى مراكب بشرية

واشوف ضنايا يغرق فى البحر قصاد عينى ولا احرك ساكنا ويرثينى فاروق جويدة

وكمان شرفى ابيعه بالعقد فى الخليج واشتغل جارية

خسئت يا كبير الحتة

فعلا اذا الكبير فقد العقل فلا تسئلن عن ما يفعل الصغير فالكل سواء

على العموم قولت ليكى على المفيد وخلى بالك

منطقة كنتاكى ومؤمن وماكدولاند وبيتزا

وشارع البحر فى طنطا والحسين والمغربين وستى ستار وكارفو وكوستا

ومحطة الرمل وكمان رمسيس والحوارى اللى فى مارينا والساحل

والكازينوهات اللى فى طابا والغردقة ومنتجع شرم وخلى بالك من شرم دى

دول كلهم تبعى بالفروع بتاعتهم

هههههههههههههههههههههههههه

دى مش حدوته بقى دى سياسة يا دم الغزال

وكانت ام دم الغزال وزجزج وبجبج اذانهم دش مركزى عالعادة

وسامعين فقالوا من بعيد كمل كمل يا دم الغزال يا عمنا ده انت استاذذذذ

وعلى رغبة الجماهير التى تشابكت مشاعرها قال هاكمل هاكمل

بس لما اشرب العصير

كملللللللللللللللللللل

المهم اثناء حديث القائد كابوتش

يهب احد البشريين من بنى الانسان فيأخذ الزعيم كابوتش

ويقول فينك من بدرى يا مربرب

اللحمة غالية والطلب على الكباب زاد وانت كمان يا صغير تنفع مزة

ههههههههههههههههههههه يا عينى يا عينى

وتفر الام بباقى ايتامها مسرعة

الى ان تصل الى عامل نظافة مطعم

يلقى بالكثير والكثير من بقايا الطعام وتتعالى الضحكات من داخل المطعم

وتسمع احد البشرين

يتكلم فيما يسمى المحمول وبيكلم الجريل فريند ومندمج

فتنتظر لعله يتبرع لها برنة

ساعة ساعتين ولكن هيهات هيهات

فحاولت ان تقترب من الطعام الملقى

وكلما اقتربت يقول لها العامل بس بس يلا من هنا مليتو البلد يا سيس

وفى تلك الاثناء ترى مجموعة اطفال قادمين وطاقات الشرر تنفجر منهم

وتقول فى نفسها اكيد دول بتوع المدارس الخاصة

اللى متربين كويس وكلهم ذوق وادب وشهامة اهل البلد هايدفعوا عنها

ولكنهم

يبدؤن فى مطاردتها مع ايتامها وتنظرالام من خلفها

فتجد باقى ايتامها فى قبضة الاطفال يلهون بهم

مع اصوات خافتة ناو ناو ناو تدعوها للتدخل

وكلما اردت التدخل وعمل مظاهرة احتجاج

وجدت تلك االالفاظ والقنابل التى تحمل قساوة القلوب

فتبتعد وتبتعد وينزف منها الدم مختلطا بالدمع وتصل الى مجلس الشعب وتردد

ايها النائمون تحت القبة

سترون فى احلامكم

حسرة قلبً انفطر

سقط وليده فى بئرٍ

حفر لاحد من البشر

سترون بكاء انين

على ابن

هو لى

تلاعبت به سيارات البشر

سترون كوابيس قوادين

انتشروا حين غاب تطبيق

عدل العزيز المقتدر

سترون رحمة" من الاطفال

نزعت

حين سقطت التربية ولم ينجح احد

ايها النائمون تحت القبة

سترون بعثرة اخلاقاٍ اذا انتهت

فلن يبقى من بنى الانسان احد


و تبدء سيارات الامل المركزى فى محاصرتها

و وزيرة القوى العاملة تقول لها اطمئنى التعويضات فى الطريق واحمدى ربنا

ومن بعيد صورة قناص يضع اللمسات الاخيرة

فتراه القطة فتظن انها سيقتل معالى الوزيرة فتحميها

وتصاب برصاصة فى عمق ثنايا القلب

وترى فى مشهد سريع صورة لايتامها الستة فتنظر الى معالى الوزيرة

امتاااااااااااااااكدون انكم من جنس البشر



تمت يا بابا ايه رايك


يعم الصمت وتختنق الكلمات


ويظهر فى الكادر ببغاء دم الغزال ولبس ثواب الحكيم وقال

اطلق ابنك مسرحية واقعية

عكست حالة فساد عمت بدءت بالامبالاة تشعبت فى نزيف اخلاق انتشر

وخفوت اصوات الناصحين وتقوقعهم فتركوا الساحة لسفهاء البشر

ان الدين ليس طقوس يشار اليها بالرموز وظاهر الجسد

انما اثره يظهر فى اختلاف سلوك البشر

اوقفوا نزيف الخلق

باءن تقولوا نحن بشر

وان حذفت الباء فتذكروا انكم ستكونوا شر وقلوب من حجر


ويقول دم الغزال فرصة بقى استئذنكوا علشان العشا بحب اكله وهو سخن
وخلى بالكوا الصور اللى فوق دى بتقول ليكوا مين اليتيم الحقيقى


البوست القادم

بعد عامان تدوين

22 Response to "القطة وايتامها الستة"

عاشقه الرومانسيه Says:

رغم انى مش بحب السوياسه بس بحسها هنا لها طعم تانى وبتخلينى اقراها للنهايه
ربنا يخلى دم الغزال واخواته طالعين لابوهم
(:

yara Says:

دم الغزال ده طلع حكايه والله على العموم انا قررت امثل معاه فى المسرحيه دى ..خليه يحجزلى اى دور يا سيدى ما عدا القطه اللى العربيه لعبت بيها التنس دى علشان انا مش ناقصه انت عارف.
المهم اقول بقى رايى فيما سرده دم الغزال .
الحقيقه ان القصه التى سردها هذا الطفل المبجل توضح صور وحقائق مريره وكثيره فى المجتمع ..فنجد العشوائيه وانعدام الاخلاق هى السمه السائده فى افرادها سواء حكومه او شعب..لا يوجد التزام باى قوانين سواء اكانت قوانين الهيه او بشريه ..اصبح لكل انسان قانونه الخاص الذى يخدم مصلحته هو فقط دون النظر الى مصلحه الاخرين ...هذه الصور السلبيه لا تغيب عن نظر اى فرد فينا من اكبر شخص لاصغر شخص حتى الحيوانات اصبحت تعانى من هذه الهمجيه .ولكن هذه القطه التى تسعى على اولادها اليتامى وفقدت الكثير منهم نتيجه لهذه السلبيه اذا علمت ما يدور بين بنى البشر فلن تحزن كثيرا على ما اصابها لانها ستجد ان الانسان لا يهتم باخيه الانسان ولن يعد يتذكر حتى معنى الانسانيه واصبح الفاسد هو العضو النشط فى المجتمع الذى يحاول ان يجعل هذا الفساد سلعه رائجه ..بينما ذو القيم والانسانيه اسس لنفسه قوقع خاص به لينعزل عن هذا الفساد ونسى اننا كنا خير امه فقط بالامر بالمعروف والنهى عن المنكر ولم يكن فى الاسلام ابدا مكان للتقوقع والانعزال ..اعرف ان هذه القصه تحدث وحدثت بالفعل مرارا وتكرارا بل وحدث اسوا منها ولكن اذا لم يبدا كل انسان مسلم فينا ان يسعى لتحقيق رسالته واصلاح الوضع كما امره الله فسينتهى حقا كما قولت وجود بنى الانسان ولكن تحضرنى ايه فى القران الكريم
بسم الله الرحمن الرحيم

(وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاء وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لاَ تَعْلَمُونَ)
لذلك رغم كل هذا الفساد دائما يوجد الامل فى ان نكون مثل ما اراد خالقنا لنا ان نكون

اللهم اهدينا جميعا

بوست عبر بذكاء عن واقع يكاد يصل صوت صرخاته الى عنان السماء ولكن هل من مجيب؟

غير معرف Says:

لالالالالالالالا

ابنك كده خطر وشكله شعوعي على فكره :)

عموما ربنا يخليه ليك ... ويحمي البلد من اصحاب القلوب الغليظه

تحياتي

ستيتة Says:

يااااااااااااااااااه
يا وجع القلب
كل بشر تنزع منه الباء فعلا يصبح شر
تفتكر كام في المية نزعت منهم الباء؟
تسلم ايدك وربنا يعين كل قط وكل قطة مساكين على قسوة قلوب البشر

القدر و انا Says:

ابو على
بجد بوست يوجع القلب
يزود الحزن فى قلوبنا والحسرة اللى مالية نفوسنا
الفرق الكبير بين الانسان وابليس
بين البشر والشر بقى فرق بسيط جدا متمثل فى حرف يتشال
تنشال معاه الرحمة من القلوب
وليس للضعيف غير القوى الذى بزلزل السماوات والارض
وحسبنا الله ونعم الوكيل

صيدلانيه طالعه نازله Says:

للاسف انت وصفت حالنا بمنتهى الحياديه و الهدوء

مفيش حاجه اقدر اقولها بعد اللى قولته
و لا حول و لا قوه الا بالله

لــــ زهــــــراء ــــولا Says:

ابو على

-*-*-*
قبل البدء فى كتابة التعليق الذى لايجتاج لاى تعليق ...........
اقول لحضرتك ان لولا وزهراء هما شخصيتين انا زهراء وامضى تحت باسمى علشان بس البوست اللى فات حضرتك قولت لى يا لولا ان شاء الله لولا هتدخل تتابع شغل حضرتك بس هى عندها مشكله مع النت يعنى احنا الاتنين لو تسمح لنا هنكون ضيوف على حضرتك ...

الصور تحفه بجد اختيارها وترتيبها كله ذوق واهتمام وعنايه
اما القصه فهى تدل على ان الابن دم الغزال يفهم فى كل شئ بسم الله ما شاء الله عليه ربنا يحفظه

على فكره حال البنى ادم بقى اصعب من حال الحيوانات
من فتره عملت موضوع اسمه الدنيا دى غابه واكتشفت ان البشر فيهم اصناف مش موجوده فى عالم الحيوانات وفى الغابه نفسها ...

دم الغزال قام بجمع العديد من المشاهد التى تحاصرنا فى كل مكان وقد قام بتحويل قصتنا نحن البشر الى قصة قطط وما اشبه الحال ببعضه البعض
لا استطيع تكملة التعليق لان دموعى نزلت من تلك المشاعر التى تحملها القصه وقد قراتها عدة مرات لانها اكتر من رائعه

" اذا الكبير فقد العقل فلا تسئلن عن ما يفعل الصغير فالكل سواء "

جمله لا بد ان تكتب بماء الذهب
سيدى الفاضل لم يعد هناك كبير كى يتعلم منه الصغير
ولم يعد هناك صغير يدرك ويعرف اكتر مما يعرفه الكبير

عذرا فقد تاهت منى الحرووووف

زهــــــراء

ندا منير Says:

المشكلة ان مصر واصلة لحالة بجد صعب قوى قوى تغيرها
والكوارث اللى بتحصل دلوقتى لسة نتائجها هنحس بيها اكتر الفترات القادمة

ربنا يستر

كلمات من نور Says:

يا ربي ...إبن الوز عوام ...شوف دم الغزال بيجري في عروقه الكلام ازاي؟
والجدع أول ما نطق قال وقال وقال ...بس لي عنده نصيحة صغنونه هو كتب في كلامه :

سترون كوابيس قوادين
انتشروا حين غاب
عدل العزيز المقتدر..........والعدل لا يغيب أبدا بل نحن ال ب شر ...تحياتي

أمل حمدي Says:

ربنا يكفينا شر حذف الباء

ونعيش بشر ونموت بشر اللهم أمين

تسلم يارب يا ابو علي

ربنا يبارك فيك يارب

غير معرف Says:

السلام عليكم
مشاءالله البوست رائع وعندك ملكه فىى استرسال الاحداث قويه
فعلا الدنيا عم فيها الفساد وضعف
النفوس
القصه بجد قدرت توصل المعنى بشكل مؤثر
تقبل مرورى
تحياتى

SHAPE YOUR LIFE (ABOALI) Says:

الى عاشقة الرومانسية

يا فندم يا مرحبا يا مرحبا
عاشقى الرومانسية لا يحبون تلك السوياسة
ولكننا نحب عاشقى الرومانسية

تقديرى

SHAPE YOUR LIFE (ABOALI) Says:

الى يارا

جميل ان ننظر بذلك المنظور الراقى يا يارا
وعمل اسقاط حر على ما نحن فيه من مظاهر ابتعاد عن واقع لم يرده الله لنا

واحتياجنا الان الى محطات تقوية لتنير الحياه من جديد

الربط الذى نطقت به كلماتك بين واقعنا
وبين الوظيفة الاساسية لنا
هو ربط يقينى رائع
لانه بدون ذلك الربط سنصبح قطط ولكن فى هيئة بشرية


تقديرى لذلك الفكر الراقى

SHAPE YOUR LIFE (ABOALI) Says:

الى فتاه من الصعيد

دعواتك يا مؤمنة
ادعى كده بضمير
فدعوات الصعيد من تحت الجو الحار لابد يوما ان تاءتى بثمار

خالص تقديرى

SHAPE YOUR LIFE (ABOALI) Says:

الى الفاضلة دكتورة ستيته

ربنا يعنهم فعلا ولابد واصر واندد اننا يجب ان نعمل جمعية تحافظ على حقوق القطط المنونوة من ظلم البشر المتكلم

تقديرى العميق البالغ

SHAPE YOUR LIFE (ABOALI) Says:

الى القدر وانا

ولا يوجع ولا حاجة دى قطة وسط القطط
اظهرت غياب فينا وتدعونا فى همسة حنان
ان نصلح الكيان بوضع حرف الباء من جديد

اضحكى كده انا الله معنا

تقديرى

SHAPE YOUR LIFE (ABOALI) Says:

الى صيدلانية طالعها نازلة

يعنى يا دكتورة الدوا هايكون ايه
فتامين ولا باسط عضلات ولا مسكن للام ولا موسع للشعب ولامضاد ولا نشترى الصيدلية ونخلص

قوووووووووول بسرعة يا دكتور

تشريفك له بريقة

عميق شكرى

SHAPE YOUR LIFE (ABOALI) Says:

الى زهراء الى ان تاءتى لولا

اعتذر لم اقصد ان تدمع عين لكلماتى
ولكن فى طيات الموضوع بسمات تعطى فينا الامل والحنو الى اعادة تصحيح المسار
ان كان الكبير اليوم تائه فهم بالامس لم يكونوا كذلك
فلنا فيمن مضى الاسوة والقدوة والموعظة

ضعى على وجهك اغصان البسمات ونضرى وجهك بالصلاة على خير الانبياء واستعينى بخالق السموات ولا يغرنك كثرة السالكين الى المهالك والسالكات ف والله حفت الجنه بالمكاره وحفت النار بالشهوات

وهاقولك على نكتة يا ستى

قالوا للعسكرى لما الريس يعدى اضرب واحد وعشرين طلقة
قال ليه التبذير ده يا بووى
مادام اقدر اطخه بطلقة واحدة

هع هع هع

خالص التقدير يا انسانة

SHAPE YOUR LIFE (ABOALI) Says:

الى ندا منير

فعلا
ولكن ايد مع ايد نعمل اثنين ايد
وكمان واحد نبقى تلاتة
بدل ما نسمع كلام الوحشين ونبقى معاهم زودنا العدد

خالص تقديرى

SHAPE YOUR LIFE (ABOALI) Says:

الى كلمات من نور

هههههههههههههههه
ابن الوز عوام واللحمة غالية يا انسان

كان المقصود من كلام عم الغزال هو غياب تطبيق عدل العزيز المقتدر

ومادام الموضوع فيه قولان اضفت كلمة تطبيق يا فندم
حتى يستقيم المعنى فى حنو
ويدعو لك دائما بكل حلو

تقديرى العميق المتعمق

SHAPE YOUR LIFE (ABOALI) Says:

الى ماما امولة الغالية

ايون ايون

طب تدفعى كام ونؤجل الحذف ونعلن بدء عملية الترميم

هاااااااا قولى

تقديرى المستتمر

SHAPE YOUR LIFE (ABOALI) Says:

الشوكة الناعمة

يا فندم ان كان المعنى وصل فهذا يسعدنى
والمعنى يحتاج الان الى شوكة وناعمة
ليصل الى المضمون

همتك بقى معانا

تقديرى العميق