مُت صحيت

, الأحد، 14 فبراير 2010


ٌمُت صحيت


الله الله بنات امامير شباب صاعدين خضرة جميلة

هوانا فين فين فين

فى الجنة

تؤتؤ تؤتؤ

انت فى حديقة الازهر


مُت صحيت


دخان دخان تفاح تفاح اناناس اناناس ضباب ضباب ضباب ناس ناس

هو انا فين فين فين

فرن بهية

تؤتؤ تؤتؤ ده دخان الشيشة يا اهبل


مت صحيت


مخنوق حران متضايق

هو انا فين فين فين

مدفون

تؤتؤ تؤتؤ فى اتوبيس قطاع عام يا مغفل


مت صحيت


ام احمد ام جميل شلوت هنا هدوم بتطير


هو انا فين فين فين

فى القلعة

تؤتؤ تؤتؤ ده طابور العيش يا مكسر


مت صحيت


ضرب ضرب ضرب اصوات اصوات

هو انا فين فين فين

فى المعتقل

تؤتؤ تؤتؤ مراتك بتنادى عليك يا صُغير


مت صحيت


مش واحد ولا اتنين دول قوة ثلاثية حرام حرام حرام

هو انا فين فين فين

افغانستان

تؤتؤ تؤتؤ دول زجزج وبيج بيج ودم الغزال يا معلم


مت صحيت


قايم نايم مفقود تايه باسم حزين مربوط

هو انا فين فين فين

فى الثانوية العايمة

تؤتؤ تؤتؤ انت فى ستى ستارز يا مقشفر


مت صحيت


شوفت انسان معاه كيان
وكيان نفسه يبان
يصرخ يقول يتكلم
يعرف يتعلم ينادى
يتألم يفرح يقول
انا انسان معاه كيان
وكيانى ثانية لحظة دقيقة
ساعة يوم شهر سنة
ويمكن اكون فيها انسان


مت صحيت


ياااااااااااااه رحلة كل ده فى الاشارة وانا راكب العربية


هاكمل نوم بقى

41 Response to "مُت صحيت"

romansy Says:

واول حلم

ل


رومانسى

غير معرف Says:

كل ده فى الاشارة
المرور دايما مشكلة وبتضيع الوقت

بس وصف حلو

أمل حمدي Says:

تحفة وخفيفة يارب كل يوم الاشارة تتعطل

ونكسب كلام جميل


تقديري لصاحب الكلام الكبير

romansy Says:

فوق يا ابو على يا غالى
انت فى البيت فى وسط العيال
هو انت كنت راكب تاكس مبيجبش غير السلبيات بس لا يا ابو على لا
فيه يا سيدى كمان مت صحيت لقيت شوارعنا نظيفه لقييت مواصلاتنا خفيفه
ولقيت قلبين عازين يتصافوا
ولقيت الحب بقى شئئ خرافى
لقيت الخير مالى كل الكون
ولقيت الليل فيه هدوء وسكون
ولقيت لعيالى مكان فى الجامعه
ولقيت انبوبه غاز متواضعه

فاتيما Says:

طب و الله حلوة الخطروفات دى

الأوشارة دى لازم ف وسط البلد

اصل العادم بتاع العربيات مخليها أعلى نسبة تلوث ف الكاهرة الكبرى و ضواحيها

يعنى العادم بيعمل دماغ كويسة
و انت موقف العربية و لسه متحركتش من مكانك أساساً

و فعلا الوقفة فى الإشارات بتجيب الدنيا طولها و عرضها
بس اللى يركز
يوووه
قصدى اللى يتووووه

حلوة و يسلم كيبوردك

الشعب لابد له من حكومه تشكمه Says:

شوفت انسان معاه كيان
وكيان نفسه يبان
يصرخ يقول يتكلم
يعرف يتعلم ينادى
يتألم يفرح يقول
انا انسان معاه كيان
وكيانى ثانية لحظة دقيقة
ساعة يوم شهر سنة
ويمكن اكون فيها انسان


الله ,,البوست دا عجبنى اوى والكلمتين دول حلوين اوىىىىىىىىىى.

غير معرف Says:

هههههههههه

طيب أقولك تصبح ع خير بقي

وكمل نوم
ولو شوفت حاجة
في منامك
تعالا وفضفض

تحياتى ...

شموسة Says:

نسيت اقولك ان انا شموسة

ستيتة Says:

دي مؤكد اشارة جامع رابعة العدوية
الإشارة المزمنة
هي دي اللي استدعت لك شبح سيتي ستارز :)

حلوة

مت صحيت
مش واحد ولا اتنين دول قوة ثلاثية حرام حرام حرام هو انا فين فين فين افغانستان تؤتؤ تؤتؤ دول زجزج وبيج بيج ودم الغزال يا معلم

ههههههههههههههههههههههههه

hend mossallam Says:

حلو اووووووووووووووووووووووي
D :D:

MaNoOoSh Says:

اسلوبك خلاني احس انك بتفرجنا علي فيلم معاك

وكاني فعلا كنت شايفة كل حاجة
وبتخيل حاجة وادعك عنيا الاقيها غير


انا انسان
وليا كيان
ساعات بيتوه وسط الزحمة
ساعات عايز يبقى مع الموجة
ساعات عايز يتمرد
انا انسان
وكياني عمر وزمان
هعيشه ببسمة
وهزرعها

القدر و انا Says:

ابو على
حمدا لله على السلامة من الرحلة الطويلة دى
بجد رحلة طويلة بس جميلة
ساخرة باسلوب جديد
اكيد لو قرأها الساخر احمد رجب حيقتبسها منك
تحياتى

EMMY BABY Says:

ههههههههههههههههههههههههه

انت لسة عايش على قلبنا قاعد ومربع خلاص خنقتنا بقى

ياخرابى على التهييس كل ده من رحلة

بس ماشى ياعم عمال تتفسح فى حديقة الازهر وسيتى ستارز وخضرة ووجه حسن طبعا ده مش حسد ولا حقد ولا ضغينة ولا اى حاجة من دى خالص

وسايبنا احنا هنا فى مدونتك اعوذ بالله

صحيح هو انت جبت نونو تالت مش هما كانوا اتنين ؟


بس لذيذ والله البوست فعلا كنت محتاج تنام يا جدووووووو

غير معرف Says:

هههههههههه

لا اكيد نمت من غير غطا :)

حلو الكلام

تحياتي

محمد فؤاد (صاحب عمود النور) Says:

ههههههههههههههههههههههههه

يا صباح الاحلام الورديه
مش بقولك خيالك معدى السنين
هههههههههههههه
تسلم خيالاتك

أم بتول Says:

كل دة فى اشارة واحدة بس أبو على أمال لو كل يوم بتاخدها من الجيزة لمصر الجديدة و بتقف يجى فى 20 أشارة كنت كتبت أيه !!!!
تسلم الأيادى بجد بجد جميلة و أجمل ما فيها :
شوفت انسان معاه كيان
وكيان نفسه يبان
يصرخ يقول يتكلم
يعرف يتعلم ينادى
يتألم يفرح يقول
انا انسان معاه كيان
وكيانى ثانية لحظة دقيقة
ساعة يوم شهر سنة
ويمكن اكون فيها انسان

yara Says:

كتير بنموت ونصحى ونفوق كل يوم على واقع تراه اعيننا ونتعجب منه ..انقلاب فى امور كثيره وشتى حولنا تدعو لعلامات تعجب واستفهام ..واحيانا تضيف بسمه سخريه او بسمه اعجاب او بسمه امل او نظره يائسه .....لكن لا يكفى ان نكون فقط متاملين نموت ونصحى ...اتمنى ان يكون لنا يد كيف نفوق غيرنا على واقع افضل ونضيف لهم بسمه صفاء وامل ...واتمنى ان نفعل مثلك يا ابو على ونرى ونبحث عن الجوانب الجميله الاخرى والناس التى تبحث عن كيانها وكفااااااااااايا بقى تشاؤم.
المهم مش هطول عليك عارفه انك اصلا ذهقان منى
بس يلا
دنيااااااااا
سلااااااااااام يا ابو على

SHAPE YOUR LIFE (ABOALI) Says:

الى رومانسى

يا عينى يا عينى كمان اول تعليق لعمنا رومانسى
كده المدونة هاتنضم للمنوفية

وده بقى بقى بقى بقى على جثتى

وارك فى تعليق اخر

SHAPE YOUR LIFE (ABOALI) Says:

الى star in the sky
فعلا فى الاشارة نتاءمل قليلا فنحيا كثيرا
فمن لم يتاءمل ينظر اكيد اكيد سيستفيد


اشكر لك حضورك وبالغ تقديرى

SHAPE YOUR LIFE (ABOALI) Says:

الى الفاضلة امل حمدى

هههههههههههههه
بلاش علشان خاطرى الدعوة دى
يبقى هانقضى كده عمرنا تاءملات
كفاااااااااااااااايه الوقت اللى بنضيعه فى عمرنا فى الاشارات المتوالية اللى الحكومة متعمدة انها تجعلنا نعيش فى طاحونة منهااااااااااااا لله

علشااااااااان خاطرى ادعى عليها ادعى
اشوووووووووووف فيها يوم يا اختى

وربنا يجعله عااااااااامر ومشرفانى يا انسانة

SHAPE YOUR LIFE (ABOALI) Says:

الى عمنا رومانسى

هههههههههههههههههه
ابقى قابلنى طول ما المنافية فى جتتنا بتراعى الدودة هاتفضل تاءكل وهاتخليها مرعى
وعجبى

بس ايه الكلام الحلو ده
بجد بجد تفوقت على المناااااااااافيه
نصحية
اتبرى منهم

تقديرى

SHAPE YOUR LIFE (ABOALI) Says:

الى فاتيما

ماشى يا انسان
تسلم الانامل اللى كتبت الحروف الواعية دى

فعلا العادم رفع المعدل التهديفى وخلى جدو بقى هداف البطولة الافريقية واحنا بقينا العيال اللى بتهتف ورا جدو

والمعنى كبير فى بطن الشاعر ان لم تصلى اليه
اتصلى على 0900 والدقيقة 5 جينه
اتبرعى وانتى بيتك مصر محتاجة ليكى

تقديرى

SHAPE YOUR LIFE (ABOALI) Says:

الى الشعب محتاجة شيما تشكمه

منورة يا فندم
ماشية انتى معايا فى التعليق مقطعة
بوست اه وبوست لاء

ماشى يا ستى هاسيبك للزمن بكرة يعضك
ونترحم ونقول سبحان سبحان

يا فندم مبسوووووووووووووووط جدا
انى الكلام عجبك والبوست
ودايما كده رافعة من روحى السفن اب

تقديرى يا انسانة

SHAPE YOUR LIFE (ABOALI) Says:

الى شموسة

ماشى يا انسانة نفضفض معاكى حلة تيفال علشان تاخدى فيها حبة فضفضة


بسسسسسسسسسسسسسسسسسسسسسرعة عاوزة حلة

مشرفااااااااااانى فعلا

SHAPE YOUR LIFE (ABOALI) Says:

الى الدكتورة ستيته

الله الله يا انسانة
هى مش رابعة عدوية
دى نبيلة عبيد كااااااااانت معدية


واه منك يا زمن الاشارة عيب عليك تعلق الشارة وانت بدون حتى علامة


وعجبى

يا فندم تعليقك سبب من اسباب سعادتى

تقديرى

SHAPE YOUR LIFE (ABOALI) Says:

الى am the crazy on e

يا فندم زرونا وتبرعوا تجدوا ما يسركم

سندوتش حتى برجر ينبكوا ثواب

تقديرى

SHAPE YOUR LIFE (ABOALI) Says:

الى مااااااانوش
عبقرية فى الاداء يا مانوش والله

كلام جمييييييييييييييييل جدا ودخل دماغى

يا متفائلة

خااااااااااااااالص تقديرى

SHAPE YOUR LIFE (ABOALI) Says:

الى عايش ولكن

فى اول ظهور للعايشين يجب ان نوجه لهم التحية

لك كل التحية على الحضور

SHAPE YOUR LIFE (ABOALI) Says:

الى القدر وانا

الله الله الله
اعتمد على الله ثم عليكى بقى فى موضوع احمد رجب ده

علشان كده المجارى تسير وتتحسن الاحوال ونقب على الاخبار ومنها الى الاهرام ومنها الى الفراعنة

يافندم خالص تقديرى لكم على رفع معنوياتى النفسوية

تحياتى

SHAPE YOUR LIFE (ABOALI) Says:

الى ايمى ستو وتاج راسى

عاااااااااملة ايه يا فندم ان شاء الله تكونى فى صحة وعافية

وبتاكلى كويس وعال العال

يا باشا انت تشرف اى مكان بس معلش المرة الجاية هابقى لما اروح كوكى بارك هابقى اخدك
علشان فى لعب يا ستو كتير ومراجيح وكده
(وش بيغمز)
وكمان انتوا فى المدونة هنا علشان انتو سبب سعادتى فى الحياه
وبسمة كبيييييييييرة فيها

وفعلا الواحد محتاج يناااااااام قهوة شاى ببس

تقديرى لشخصكم الكريم

SHAPE YOUR LIFE (ABOALI) Says:

الى فتاه من الصعيد

فعلا مع انى الدنيا شتا

فين راحت الشمس فين راح القمر
يمكن فى الصعيد كان هناك كل البشر

تقديرى يا فندم

SHAPE YOUR LIFE (ABOALI) Says:

الى محمد عمود نور مستمر
كيفك يا انسان

طب ماتقول قرون يمكن ربنا يبارك

كلنا انسان يا محمد باشا نجتهد لعل وعسى وعسى لعل

ولالالالالالالالالالالالالالاايه

خالص تقديرى

SHAPE YOUR LIFE (ABOALI) Says:

الى ام بتول
اجمل مافيها انك قرئتيها بعيون روحك وقلبك الصافى

على فكرة انا من ساكنى الهرم يعنى زودى كمان خمسين اشارة وكمان باروح مصر الجديدة يوميا

انا خايف احسن يكون متعلم علينا ولابسين شارة فعلا

هههههههههههه

تحياتى يا راقية

SHAPE YOUR LIFE (ABOALI) Says:

الى يارا

جميل تحليك الرائع للموضوع
فعلا رد مناسب للاحوال التى نعيشها فى واقعنا

وكلمة مت صحيت تدل على اننا نكرر نفس الاشياء بدون وعى واعادة ترتيب لها
وده ما نحتاج اليه كما فهمت من فحوى تعليقك المميز
ادام الله عليكى رجاحة العقل ووهبك فهم الاتقياء الاطهار

واوعى تفكرى فى يوم انى ممكن ازهق من كلامك

المدونة هى انتم فاءنتم انسان قلبى
والانسان لا يستغنى عن قلبه مهما حدث

تقديرى لتواجدك المميز

ندا منير Says:

احيانا الانسان بيستنى اى فرصة ينسى فيها الحياة ويحاول يحلم او يفكر فى اى جديد او اى احلام
وجزء كبير من احلامنا وتفكيرنا بيكون مشارك فيه اللى بنفكر فيه على طول والى بنحلم بيه

mohamed ghalia Says:

أبو على انت لسه برده بتقف فى الإشارة دى
خير الشارع بقى ياعمنا ههههههههههههه

مليكة الطهر Says:

السلام عليكم ورحمة الله وبركاته

سلاماً على زمنٍ مَر

وآه من زمن شربت فيه الناس المُر

وياخوفى من زمن اللى جاى فيه أمرّ



تعليق بسيط حبيت أمر بيه من هنا مع أول زياره

وإن شاء ربى لن يكون الأخير

أخى الكريم
فى الحياة الكثير ما يحتاج إلى نقطة نور ونقطة حبر تُغرقاه لكى يتضح وإن كان واضحاً كما المرور
ولا تغيير فى الأمور نقول" يلا السلامه"

المرور من هنا يسير
لذا سآخذ الفاره وآمر من هنا

بس إن شاء الله مفيش فارات تزنق ولا حاجه




لاول مره أعلق بالعاميه وأمزح هكذا ولكن سخريتك سيدى أجبرتنى

فتقب مرورى الأول على طريقك

أخى الكريم وفقكم الله

SHAPE YOUR LIFE (ABOALI) Says:

الى ندا منير
فعلا ما يحدث لنا جزء من احلامنا وفكرنا

اشكرك على ذلك التعليق الفاهم الواثق

منورانى

SHAPE YOUR LIFE (ABOALI) Says:

الى محمد الغالية
هههههههههههه
نغير يا عمنا ومالوا بس انت قولى الاشارة بتاعتك فين

ولالالالالالالالالالالالا ايه

SHAPE YOUR LIFE (ABOALI) Says:

الى مليكة الطهر
تعليق مميز لها ابعاد ومعانى حمل الكثير من النداءت الخفية

اسعدتنيى بالزيارة وعذرى الوحيد انك ستاءتين يوما للزيارة من جديد

تقديرى ومودتى