هو انت جاى معانا ؟

, الجمعة، 12 فبراير 2010



دخل دم الغزال على ابوه ( اخو زجزج وبجبج فى البوست الماضى )

وقال له

ها يا بابا هاتجيب ايه لماما فى عيد الحب ؟

دبدوب احمر ولا وردة حمراء

ضحكت وفى سرور واخذت دم الغزال لصدرى

وقولت انت رايك ايه ؟

قال والله يا بابا ماما تستحق كتير

كفاية انها بتستحملنا كلنا وساعات باشيل الغطا من عليا علشان اخليها تغطينى تانى وباكون مبسوط اوى

قلت يا سلام عليك يا واد

طب وتفتكر فيه يوم واحد يعوض ماما عن كل ده

قال هو اليوم يعتبر رمز بس للحب يعنى كلنا نهتم بيها ونخليها فى اليوم ده لا تعمل اى شيىء وكلنا نخدمها

قلت وجهة نظر برضوا

بس ليا وجهة نظر تانية

قال احكى يا بابا

قلت فى اعياد كتيرة ظهرت فى بلدنا متنوعة منها اللى اقره الدين زاى عيد الفطر وعيد الاضحى

واعياد تانية مستحدثة ودى بعضها يتعلق بالوطن وذكرياته زاى حرب 73 19 وعيد تحرير طابا وعيد الشرطة

واعياد تتعلق بالوحدة الوطنية زاى عيد ميلاد السيد المسيح للاخوة الاقباط

وعيد ميلاد الرسول صلى الله عليه وسلم

وعيد هجرة الرسول صلى الله عليه وسلم

يعنى قصدى يا دم الغزال انى بقى فيه اعياد كتيرة متنوعة ومناسبات مستحدثة كتير

قال فعلا يا بابا كتير فعلا وبقت الدنيا زحمة حتى بقينا بناخد اجازات كتيرة فى المدرسة

قلت طب لو كل مناسبة يا دم الغزال عملنا ليها عيد هاتختلط الاعياد

طب يا دم الغزال شوفت مرة عيد للمجهود عيد للعمل عيد للنشاط

قال ساعات بيكون اه فيه بس التركيز عليه من الاعلام بيكون ضعيف جدا

قلت يا سلام عليك فعلا

قال يعنى انت من رايك يا بابا لا نحتفل بعيد الحب ونعمل مناسبات كتيرة

قلت عيد الحب من الاساس

هو مش محتاج يوم لاننا يا دم الغزال بنعيش قصة حب من يوم ماتولدنا

انت مثلا بتحب نفسك وتحب تكون شخص راقى وتخدم بلدك

وكمان بتحب ماما وبابا واخواتك وبلدك واصحابك وكده

يعنى الحب ده مستمر

علشان كده حبنا لماما ده قصة نمو مستمرة

طب ليه يا بابا عيد الحب ده كان موجود؟

قلت من زمان فى التاريخ كان فيه اساطير كتيرة وانت تعرف انى فى ايطاليا

كان هناك الروم اللى كان بينهم صراع مع الفرس وذكر القراءن قصتهم

قال ايوه يا بابا

كان زمان بقى فيه عندهم صراعات كتيرة وكان فيه الهة كتيرة مش الة واحد

قال فعلا درسنا ده فى التاريخ

قلت صح لما الناس بتتعدد عندهم الالهة بيكون فيه اساطير وحكايات

منها بقى اسطورة بتحكى ان ملك من ملوك الروم منع الجنود انهم يتزوجوا حرص منه على

تركيز الجنود فى الحر ب

فكان فيه راهب اسمه فالنتين كان يتم عملية الزواج فى السر فلما عرف الملك قبض عليه

واعدمه

ومع مرور الزمن احتفل الناس به على اساس انه رمز للتضحية عن طريق فالنتين

وكمان شعار للحب

قال دم الغزال

يااااااااااااااااه يا بابا ده الموضوع كبير جدا وبعيد عنا

طب ليه يا بابا

الناس استمرت عليه كده فى مصر

قلت والله يا دم الغزال

احنا شعب عاطفى يحب الحب والكلام والضحك والمداعبات

بس نتيجة البحث عن الفلوس والجانب المادى افتقدنا احساس الحب وكلماته

واصبح عندنا فجوة وحالة جفاء طوال السنة

اسئل نفسك كده يا دم الغزال

كام مرة قولت لماما انا بحبك وبقدرك يا ماما مش عاوزانى اساعدك فى حاجة

كام مرة روحت طبطبت على ماما وقلت ليها انتى نهر وفيضان عطاء ليا ربنا ما يحرمنا منك

كام مرة روحت قلت لكتابك الله عليك انا بحبك اقوى بتفتح عقلى وذهنى وتخلينى احلم

كام مرة روحت لاخوك زجزج وقلت انا سعيد انكوا اخواتى وبحبكم اقوى

قال فعلا يا بابا مافكرتش بكده خالص

قلت ايه رايك نبدء من دلوقتى

نغير بوصلة حياتنا ونقول ونشجع بعضنا ونحب اللى بنعمله ونجتهد ونكبر ونتفوق وننجح

والوقت ده فعلا

يبقى عيد حب مستمر طول عمرنا

قال تعرف يا بابا

قلت ايه

قال انا سعيد انك بابا وبحبك كتيييييييييير

تبسمت وقلت

السعادة والحب ده انت اللى بوجودك دلوقتى معايا صنعته يا دم العزال

لاءن حوارك كان راقى راقى

قال

انا رايح اقول لكل الناس بحبكم وطول عمرى هاحبكم وهاقولها ليكم على طول

مش فى يوم واحد بس

أُم دم الغزال دخلت انت قاعد والواد بتعمل ايه؟

بدل ماتشوف هاتجيب ايه فى عيد الحب؟

ضحك دم الغزال وانا معاااااااه فطسان

وقلنا

انتى يا ماما كل كيانا وكل يوم بيعدى علينا

وانتى معانا عيد حب

قالت اه اه هو ده الكلام الدبلوماسى طب وعيد ميلادى اللى نستيه

قلت تؤتؤ عيب عليا فعلا

بس لعلمك كنت فاكرعيد ميلادك بس لما بصيت لوجهك ا لقمر ده حسيت انك لسه صغيرة وشمسك دايما" عطاء ولو جبت ليكى هدية ابقى باكبرك

لقيت دم الغزال بيقول انا ماشى يا بابا

قلت استنى استنى قال ايه

انا جاى معااااااااااااااااااااااااااااااااااااااااااااااك اغير من نفسى شوية

44 Response to "هو انت جاى معانا ؟"

غير معرف Says:

يا عينى عليك يا ابو دم الغزال :)

بجد بوست حلو أوى أوى أوى
أول مرة أشوف حد بينتقد عيد الحب بالاسلوب ده :)

Baskouta Says:

بوست جميل جدا
والحب فعلا موجود في كل حاجة في حياتنا
واصلا بالحب بننجح
يعني بحب نفسي هحافظ عليها بحب شغلي هنجح فيه
بحب اهلي هودهم واسال عليهم
بحب ربنا هطيعه واعمل كل اللى يرضيه
متفقة معاك ان الحب طول الوقت بس مختلفة في نقطة واحدة
انا عاوزة الحب اللى موجود طول الوقت واللى هو سر سعادة الانسان في كل جوانب حياته يكون ليه يوم واحد نحتفل بيه
نفتكر اللى بننساهم واللى مش بنقولهم بنحبكم طول السنة
يوم واحد نجيب فيه وردة لحد ونقوله بنحبك
يوم العالم كله يجتمع فيه على الحب
وزي ما ممكن كل العالم يجتمع على معنى السلام ... ممكن كلنا نجتمع على يوم للحب
انا بحب عيد الحب حتى من غير ما يكون ليا حبيب وحتى لو مش بيجيلي فيه هدية بس بحبه
ده انا حتى عملاله احتفال في مدونتي
ومن موقعي هذا احب اهتف واقول
يحيا عيد الحب
وكل سنة وانت ودم الغزال وزجزج وبجبج ومامتهم عايشين في حب
تحياتي البسكوتية الفلانتينية

yara Says:

هههههههههههههههههههه
والله دم الغزال ده طيب واميييييير وبينضحك عليه ميعرفش ان باباه بيقول ده كله علشان يهرب من الهديه بتاعه المدام
اممممممممممم
هو كلام صح ومظبوط طبعا ان الحب بينمو ويستمر من يوم متولدنا وان كل يوم بيعدى يجب ان نتعامل من خلاله كانه عيد حب لكل من يستحقون هذا الحب ..ولكن بالنسبه لى ان لا مانع اطلاقا من ان يكون هناك يوم يذكرنا بهذا المعنى لاننااحيانا نتغافل عنه ...لا مانع من ان يكون هناك يوم يسمى( عيد الحب)فهذا قد يجعلنانعيد حسابتنا ونتذكر اين هو الحب فى حياتنا؟ما هى اثاره علينا؟من هم الذين يحبوننا بصدق ومقصرين تجاههم؟من هؤلاء الذين قدموا لنا تضحيات فى حياتهم وغفلت عنهم عقولنا لفترات طويله؟
ولكن ليس بالمعنى المتداول لعيدالحب انه ورد او دبدوب احمر بين الشباب الحبيبه وهكذا ولكن فلنجعله عنوان لمشاعر اسمى من ذلك ونعطى هدايا لمن نتيقن انه يكن لنا داخل قلبه حب حقيقى .
ومش شرط هديه ماديه قد تكون كلمه معبره اغلى من اى هديه.

دومتتتتتتت محب يا مصراوى وبطل بقى تاكل عقل العيال بكلامك وبدل مترووووووووووح مع دم الغزال ...رووووووح اشترى هديه ...ولا اييييييييييه؟

غير معرف Says:

بجبج وزجزج ودم الغزال .... ههههههه

ربنا يخليهوملك ويخليك ليهم

انا سمعت في مسلسل او فيلم موش فاكراه بيقول اننا موش بنربي ولادنا احنا بنتربى معاهم

الحديث الهادي بيفتح مجال للحوار والنقاش والاكتشاف معاني تانيه حلوه

فعلا احنا محتاجين نخلي كل يوم عيد حب

تحياتي

romansy Says:

يا سلام عليك يا واد يا دم الغزال
لازم تطلع لمين يعنى
اكيد لبابا متفتح ولماح واخد بالك من كل كبيره وصغيره وبتناقش فيها
عيد الحب فعلا هو رمز بس كل يوم بيعدى علينا حب كل ثانيه حب بس لاسف مبقاش عندنا وقت نقول بحبك
نقولها تيك اوى مش عارف بقى الوقت اتغير بينا ولا ايه بس يا ابو دم الغزال جاه اليوم اللى لازم تقولها ام دم الغزال مش هتسيبك وهتاخد بدل الهديه اتنين هديه عيد ميلادها وهديه عيد الحب
يلا كل سنه وانت فى حب مستمر

ستيتة Says:

الله الله
نقدر نقول على البوست ده شهد الكلمات
اه والله
ربنا يخلي بجبج وزجزج ودم الغزال وابوهم وطبعا طبعا أمهم
هو حلو اننا نخلي كل يوم في حياتنا عيد
والقصة مش حصر اي احتفال في يوم واحد
بس كل حد بيشقى ويتعب بيتمنى ولو يوم في السنة التركيز يكون عليه هو
يعني هو عارف انه محبوب
واللي حواليه بيعشقوه
لكن يوم بتاعي ده حاجة تانية خالص

بس انا بكره الفلانتين
بكرهه بشكل غير طبيعي

عامل زي بطاطساية شكلها جميل وطعمها حلو
ودي ايامنا المصرية الجميلة
وجه طلع لها طلوع في نفوخها مصطنع
طلوع ملوش لزمة ولا ليه معنى

يوم أحمر
وأحمر منه ما شفتش

المهم لحقت دم الغزال
ولا ملحقتش تغير نفسك؟ :)

EMMY BABY Says:

هههههههههههههههههه ال قمر ال ومبحبش اكبرك علشان كدة مجبتلكيش هدية

ربنا يكون فى عونها بجد واقعة فى راجل اعوذ بالله منه بيعرف يخرج من اى ورطة بالكلام

مش هغير رايى ياعمو الدبلوماسى

والله انا لو هعلم ولادى مش هقلهم اكتر من اللى قلته فعلا الشعب المصرى بيضحك عليه وبيمشى ورا الحاجة من غير عقل ال فلانتين ال

يعنى احنا فى اليوم ده بنحتفل بذكرى قصيص اصلا مش بنحتفل بالحب

وكمان زى مانت قلت الحب مش ممكن نعبر عنه فى يوم... الحب موجود دايما فى قلوبنا وكل يوم بنرويه بالمشاعر لحد ما يكبر وتفضل جذوره فى قلوبنا ومن الصعب اى حد يقتلعها

انا مش معترفة بالفالنتين بصراحة بس مش هتنازل عن هدية عيد ميلادى بعد الفالنتين ب3 ايام فاهم ولا لا وعلى فكرة مش هتعرف تضحك عليا بالدبلوماسية بتاعتك انت حر انا حذرتك

بس على فكرة انا كل يوم تقريبا بقول لماما بحبك وببوسها وببوس ايدها وانام فى حضنها كمان وبقول لصحابى بحبك ههههههههههههههه يعنى انفع اكون بنتك اهو مطيعة خالص صح

بوست جميل وسلملى على دم الغزال ابو قلب رقيق ده

تحياتى

ايمى

MaNoOoSh Says:

عارف يا ابو على

رغم انه بيقال اننا شعوب عاطفية وكل الكلام دة

بس احنا أكتر الشعوب خوف من التعبير عن مشاعرنا
ويمكن علشان كدة بنتلكك في أي مناسبة
وكمان بنعبر عن احتفالاتنا بالأكل
لأن الأكلة دي لمة للأسرة أو العيلة كلها وزريارات رحم مش مجرد أكله والسلام

احنا محتاجين نحس بالحب جوة بيوتنا فعلا كل يوم
محتاجين الدفا اللي جوة البيت في اللمة والحضن
محتاجين حتى مجرد اننا نعرف اننا لو وقعنا في حد بيحبنا هيمسك ايدنا ويساعدنا نقف
ولو ملقيناش محتاجين على أقل تقدير نحب نفسنا بجد علشان نعرف نقف لوحدنا
لا محتاجين الدنيا تبقى أحمر في أحمر ولا محتاجين أعياد كل يومين تلاتة

إيمان Says:

بجد بوست ولا أروع ربنا يبارك فى دم الغزال ويحقق هو أخواته اللى مقدرناش احنا نحققه
لكن حقيقى من احمر الاشياء اللى ظهرت فى مصر هو الفلانتين ده
شئ مستفز جدا ومحمر جداا ربنا يهدى عبيده

قلم رصاص Says:

الله ينور عليكوا زي مانورتوا علي

بوست جمييييييييييل جدا يا أستاذنا
حوار مثمر جدا ورائع ومختلف
تحليلك لفكرة الاحتفال بالحب مختلفه وعجبتني جداااااااااااااا

ربنا يخليكوا كلكم لبعض

تقبل مروري وجزيل شكري واحترامي

mohamed ghalia Says:

الله عليك ياغزال
بتقول كلام عال العال
مع تحيات منوفى

SHAPE YOUR LIFE (ABOALI) Says:

الى انا ودماغى

يا قهلا يا قهلا
وجاء اليوم اللى اكتسبتى فيه الثقة ولحقتى التعليق الاول

امممممممممممممممم
ماشى يا انسان ربنا يزود ثقتك دايما

واسعدنى اعجابك بالبوست يا انسانة يا واثقة

لك كل تقديرى

SHAPE YOUR LIFE (ABOALI) Says:

الى بسكوتة

امممممممممممممم
الحياه وجهات نظر اكيد اهم شيىء انه يكون عندنا وعى عندما نحب ونرفع رايات القرب من الله فى افعالنا
وعجبنى رايك وحبك لكل حياتك
وده شيىء ايجابى ومشجع ادمه الله عليكى دايما

ومشرفانى برايك وتعليقك
وان كان تعليقك بالتحليل والرقى ده
ساءكون حزين ان لم اره دائما

احيى الله قلبك بنور يقينه ومتعك بصحتك الى يوم الدين

تقديرى

Cute Kitty **sookra Says:

سمعت او قريت قبل كدا تعبير حلو
اننا بنتلكك للفرحه
كتير بيقعد مستنيها على الباب وناس تانيه تجرى تقابلها فى الشارع وهى جايه وناس تانيه تروح تستناها على المحطه وناس تانيه تركب القطر وتروح للفرحه بس تفضل قاعده فى القطر مستنيه الفرحه تمد ايديها وتطلعها من القطر وناس تانيه تنزل م القطر وتروحلها بيتها وتخبط على الباب وتاخدها فى حضنها
انت بقى مين فى الناس دى
ويسلموا الاولاد وابوهم ومامتهم كمان
ربنا يحميهم ويحفظهم يارب
مساك شيكولاته بلون الحب

نـــــور Says:

مش بقولك بتعرف تاكل دماغها بكلمتين؟

:)
الله ينور ;)

كلمات من نور Says:

الله عليك الله يا أبو علي انت ودم الغزال ( إسم دموي قوي والجدع طيب وابن حلال زي الغزال)تصدق يا أبوعلي احنا محتاجين ألف واحد أبو علي يقنع الناس بأسلوبك الحلو داه .بعض رجال الدين مع الأسف الشديد بيتكلموا بلهجة تخلي الشباب يعمل عكس ما بيقولوا وبدل ما ينفرهم من شيء بينفرهم من أسلوبه ويخليهم يعاندوا ..إنت بقى أسلوب سلس وهادي وقوي ممكن تخلي الكل يتنازل عن جعل يوم 14 فبراير يوم أحمررررررررررر..حتى الحمير والحنطور بيبقى أحمر لما كرهت اللون الأحمر ...تحياتي يا أبوعلي لك وللعائلة المصونة

SHAPE YOUR LIFE (ABOALI) Says:

الى يارا

هههههههههههههه
يا ظالمه يا مفترية يا يارا
قولى بقى انك طماعنه فى دوبدوب ومش عاوزة تقولى
على العموم يا ستى بلاش نق فى نق
وخلى قلبك ابيض وانا اجيب ليكى بستان ورد احمر فى احمر

فى الحقيقة يا يارا
بوست لا يوجد تعليق لك فيه
سيكون بدون رائحة ذكية مثل قلمك الرائع المميز
وادام الله عليكى الفهم والرقى

تقديرى

SHAPE YOUR LIFE (ABOALI) Says:

الى فتاه من الصعيد

ههههههههههههه
جميل تعليقك يا انسانة
بالحوار والهدوء والحب نخلى حياتنا نور
وضياء لينا

ربنا يبارك لك ويبارك لكل الناس فى الفهم والارتقاء والسماء فى كل خير

تقديرى لشخصكم الكريم

SHAPE YOUR LIFE (ABOALI) Says:

الى رومانسى

جميل فهمك المتميز يا رومنسى باحييك على كده

فعلا الوقت متسارع ونسينا حاجات حلوة كتير يا رومانسى
بس ربنا ييسر الحال ونقدر نساهم فى ارجاع البسمة مرة تانية ونذكر بيها الناس

ونحب تانى

تقديرى يا انسان متميز

SHAPE YOUR LIFE (ABOALI) Says:

الى الدكتورة ستيته

ست الحبايب عاملة ايه اتمنى ليكى الصحة والعافية دايما وحشانا والله

رايك فى محلة اعياد مستورة هلت علينا صينى فى صينى
وللاسف شباب ارتمى فى حضنها فاصبح لا يعرف عيد بلده علشان ايه

بس احنا وراهم والود دم الغزال ناوى على وضع حملة اعرف نفسك يا واد

وان شاء الله نعرف ونتعلم ومازال فينا الخير والله

مشرفانى بذلك الفهم الراقى الرائع

واتمنى لك كل الصلاح فى حياتك
وسعيد انى مدونتى المتواضعة بها قلم مثل قلمك

تقديرى

SHAPE YOUR LIFE (ABOALI) Says:

الى ايمى

بقى كل يوم بتبوسى ماما وتقولى بحبك
يا بكاشة
ده انتى طوب الارض بيشتكى منك يا ستو
وحتى مدونتك غلطة
هههههههههههههه

والله يا ايمى كلامك مشجع جدا وراقى
وتحليل فى محله
ولينا اعياد جميلة نقدر نفتخر بيها
بس مين بقى اللى يفهم

وعلى فكرة عيد ميلادى يوم 26 فبراير
هااااا فهمان ولا موفهمان
والعنوان معروف

بدل مااسلط عليكى زجزج يكهرب كل كلية الطب البيطرى

مشرفانى بروعة قلمك

SHAPE YOUR LIFE (ABOALI) Says:

الى مانوش

لمستى نقطة هامة جدا يا مانوش
وفعلا محتاجين النقطة دى
حتى وان عبرنا عن مشاعرنا بتكون مش بالطريقة الصحيحة

ربنا يكرمك بالفهم الجميل ده
وتصدقى بالله انتى انسانة رائعة جدا
اكن لها كل احترام وتقدير لعقلها

واتمنى ان يديم الله عليكى نعمة الامل والتفاؤل

كل التقدير لك

SHAPE YOUR LIFE (ABOALI) Says:

الى ايمان

ياااااااااااااه المدونة منورة والله يا ايمان

ومفتقدة تعليق انسانة راقية زايك

عزائى الوحيد انى بتمنى انك تكونى فى اسعد حال ياااااااااارب

ورايك فى محله
احمر فى احمر وبقينا مستحمرين اووووووووى

تقديرى لشخصك الكريم

SHAPE YOUR LIFE (ABOALI) Says:

الى قلم رصاص

كلنا نجتهد ونحاول ان نغير ما حولنا
وحتى ان كانت حروف صغيرة نستخدمها اتمنى ان تفيد من يقرئها ويستفيد منها

لك كل تقديرى فنحن كلنا انسان نستفيد من خبرات الجميع

ادام الله عليك ذلك القلم المميز الراقى


خالص تحياتى

SHAPE YOUR LIFE (ABOALI) Says:

الى محمد الغالية

كيفك يا انسان مختفى كده ومستكين
مش عادة المنافية

ربنا يبارك ليكى يا انسان
وبلاش نقول منوفى علشان الدعوة تستجاب
هههههههههه

تقديرى

SHAPE YOUR LIFE (ABOALI) Says:

الى سكرة

ايه التعليق الجميل المسكر ده

جميييييييييييييل جميييييييييل
ومعبر عن كل الناس
انا مين فى كل دول احنا كل دول يا انسانة
واحد من الشعب
هههههههههه

ادام الله عليك ذلك النقاء الذى اشعر به من كلماتك

تحية خاصة جدا لكى يا سكر

SHAPE YOUR LIFE (ABOALI) Says:

الى نور

اعمل ايه بس يا نور الحياه بتحكم يا اختى

تقديرى لك

SHAPE YOUR LIFE (ABOALI) Says:

الى كلمات من نور

محتاجين نور فعلا ينور حياتنا من الكل
الكل يساهم فيه بما يستطيع ان يعطى

ولو صدقت النوايا لنصلح الحال
كل ينقصنا اننا نسهل على نفسنا حياتنا بس بشكل يتوافق مع الدين علشان ربنا يساعد ويهدى لينا نفوسنا


كل لما اشوف تعليقك احس اننا بخير والله
واحسن انى اكتسبت بالفعل نور وهدى من ربنا


ياااااااااااارب يسعد كل ايامك

دى كانت دعوة امى وانا اقولها لك لانك تستحقى كل خير

تقديرى

سواحة Says:

كاتالوج كيفية الهروب من هدايا المناسبات :-)))))))))))))))))))))
ابوعلى انت مخلف فلاسفة :-)))
الله يعين ام على :-))))

حرقتلى قصة فالنتين باشا ماشى
بس
اسمحلى
ممكن الحب يظهر فى شوية كلمات و تصرفات تغنى عن قصائد الحب
و انا بحبك يا ماما و يا اخواتى و يابلادى و حبيبى و المجتمع و الناس

كفاية لما ماما تدى زجزج سندوتشه يقول متشكر تسلم ايديك
لما يخلص طبقه بج بج يرجعه المطبخ و يغسله
دم غزال يفتكر ان ماما وقفت و عجبتهاالشنطة ديه و اتفرجت عليها بس ماشترتهاش علشان طلبات البيت اهم
يحوش و يشتريلها و لو حتى ميكونش عيد ميلاد و لا عيد حب
الافعال اعلى صوتا من الاقوال هكذا تقول حكمة الصباح :-)) الى عندى

أم بتول Says:

تصدق أنا فعلا مش بحب اليوم دة ابدا ، لو أولادى قالوا لى فيه بنحبك ياماما ها ضربهم ، أنا مش محتاجة منهم يوم لا نعرف أصله ولا فاصلة ولا عاوزين نعرف علشان يقولوا لى بحبك ، احلى شيئ أنت قلته ان أعيادنا تاهت وسط كم اعياد لا تعرف لها أصل ، يوم بيفكرنا بأننا فى جهنم الحمرا كل شيئ فى الدنيا اتصبغ بلون الدم ، طيب ليه مش أختاروا لون تانى غير لون الدم دة مثلا السماوى الجميل بلون السما الصافية يدل فعلا على القلب الصافى الحنين بدل اللون المستفز دة ، ولا اللون الأبيض لون الطيبة و النقاء .
مش هاقول لك كل سنة و انت طيب .

لــــ زهــــــراء ــــولا Says:

حلو الكلام والتعبير حلو اوى واكتر من رائع بجد

بصراحه يعنى ان شوفت ناس كتير اتكلمت عن عيد الحب سواء بالسلب او الايجاب بكن بصراحه اول مره اشوف حد بيتكمل عنه بالطريقه دى

تسلم الايادى اسلوب حلو اوى

ENG./ELSAYED,PMP Says:

اخويا الكبير ابو على ... انا بحبك ف الله

SHAPE YOUR LIFE (ABOALI) Says:

الى WANDA
يا فندم مشرفة مدونتى المتواضعة
هى مش فلسفة اووى نقدر نسميها حسن التعامل بدون زعل

اكيد لمس الحروف غير تعبير الكلمات غير احساس المعنى
علشان كده الفعل هو اللى بيخلى الدنيا احلى
ومتفق معاكى
واكيد لما ننمى فينا كده هانعرف نتعامل صح

وتعليق مميز اكيد من انسان فوق المميز

تقديرى

SHAPE YOUR LIFE (ABOALI) Says:

الى ام بتول

والله يا ست الكل الواحد احتار
من انسياق الشباب الى كل شيىء تافة بدون تفكير واصبح طعم الشاب ماسخ بدون رائحة الرجولة والبنت ميصعة بدون نكهة الانثى


بس بمزيد من الجهد والقرب من كل اللى حوالينا هانقدر نغير كتييييييييييير اوووووووووى

تحياتى لرايك الصائب
وكل لحظة تعيشها يااااااااارب تكون سعيدة


تقديرى

SHAPE YOUR LIFE (ABOALI) Says:

الى لولا وزهراء

شرفتما المدونة يا فندم
ومبسوط ان الموضوع عجبك
وان شاء الله تكونى اخذتى مابين السطور فيه


وكلنا نجتهد نصيب احيانا ونخطىء كثيرا
الاهم ان نتذكر اننا لا فضل لنا على بعض الا بالتقوى

مشاركتك ووجودك هنا اتمنى استمراره
ولك كل التقدير

SHAPE YOUR LIFE (ABOALI) Says:

الى مهندس سيد

احبك الله الذى احبتنى فيه

وفتح الله عليك الخير الوفير والرزق الغير قليل
وعيشت عيشة الاتقياء

اللهم امين

خالص تقديرى

أمل حمدي Says:

ابو علي الغالي

ازيك

أي كلام لمدح البوست ها يظلمك

بجد يا ابو علي أسلوبك كبير الأثر

وقد يفهمه الصفير والكبير ويقتنع به تمام الاقتناع

تسلم يارب ويسلم أولادك وأمهم

ربنا يصلح حالك يا انسان

مش كدا ولا إيييييييه

غير معرف Says:

ما شاء الله عليه
فعلا الحوار راقى
والحب حقيقى طول السنة مش يوم ولا اتنين

ربنا يخليهملك ووالدتهم معاهم طبعا ويخليك ليهم

Unknown Says:

ياسلام عليك
ياأبو دم شربات
ياوووه قصدى يا
أبو دم الغزال
لو كل الباباهات
كده ..مش حاقولك
بقى كانت الدنيا
بقت زمانها(مسكرررة)

محمد فؤاد (صاحب عمود النور) Says:

احب اسلوبك فى عرض الموضوع
احسنت يا استاذ ابو على (حبيبى وجارى فى المنطقه ههههه)

الناس لو تعرف الكلام دا ماكنش حد تعب بس هى دى الدنيا والحمد لله

اسلوبك فى العرض مبسط ومفهوم وجديد جداااا وانا اقترح انك تراسل جرنال وتكتب فيه بالاسلوب دا بجد هتبقى حاجه جديده

SHAPE YOUR LIFE (ABOALI) Says:

الى الفاضلة امل حمدى

كيفك يا انسانة يا فاضلة
كلنا بنجتهد يا ست الكل
اهم شيىء تكون الرسالة وصلت فى سلاسة
وما بين الحروف فهم

دايما بترفعى روحى المعدنية
وبالفعل نحتاج احيانا لكده
بس جماااااايالك بقت كبيرة يا فندم

ولالالالالالالالالالالالا ايه

منورانى وتقديرى العميق

SHAPE YOUR LIFE (ABOALI) Says:

to star in the sky

اشكر لك رايك الجميل
وكلنا نجتهد
ووهبك الله كل السعادة فى دنياكى واخرتك

تقديرى لوجودك المثمر

SHAPE YOUR LIFE (ABOALI) Says:

الى نورحاتى


جميلة كلمة الباباهات
ههههههههههههه
لذيذه كده

ويا ستى نعمل مليار كوبى من ابو زجزج

مشرفانى بتعليقك السكر ده

SHAPE YOUR LIFE (ABOALI) Says:

الى المنور صاحب عمود النور

يا فندم ايه الكلام الجميل ده

مشكور يا فندم على رايك

وان شاء الله اراسل مجلة كوكو واوا عن قريب

انتظرنى ولالالالالالالالالالالاايه

ومنورانى يا جارى القريب الحبيب