دعارة العقول ( اعادة نشر )

, الأربعاء، 20 مايو، 2009


انظر حولك بكام يا بيه تشترى؟

كله موجود صغير وكبير وفيه كمان مثقف وفيه موزون وكمان مجنون كل طلباتك موجودة

يااااااااااااااا

فعلا عقول للبيع

تجاره رائجة هذا الايام

وصلنا فعلا الى مستوى الكل اتجه الى اعطاء عقله خمرا

حتى لا يشعر به او حتى يفكر به وان فكر يكون لحساب احد غيره

حتى يشكلها له كما يشاء

تجارة العقول اصبحت تجاره مربحة لمن يعرف ان يستخدمها

تخيلوا اصبحت العقول عقول مهاجره لمن يدفع اكثر

عقول على النواصى والشوارع تباع المهم تعرف تقدر الثمن

الناظر الى حياتنا اليوميه يجد ان حياته تكاد تكون فيها الايام نسخ كربونية

من اليوم السابق له بدون تغير لم نستطع ان نقف للحظات نسأل انفسنا

هو احنا رايحين فين ؟

هو اللى احنا فيه دة هايوصلنا فين ؟

هو احنا فى الطريق السليم؟
......................؟
اسئلة عديدة يمكن طرحها لو احنا عملنا وقفة منطقيه تم فيها تشغيل الهبة التى اعطاها لنا الله ليتم التميز بها من بين مخلوقاته


طيب ليه وصلنا لهذا الحد من الدعارة العقلية ومنطق نشتغل ليه بعقولنا ونخلى غيرنا يشغلنا بعقله ؟

يا ترى علشان

-- مش عارفين نفكر ازى

-- ولا نتيجة غياب المنهج وعدم معرفة معالم الطريق فى الدنيا

-- وممكن كمان اننا مش عارفين هدفنا فين

-- ولا تتطرق اليأس فى انفسنا من صعوبة التغير

-- ولا مقولة الموت وسط الجماعة رحمة اصبحت هى الشعار ( اهى ماشية ) احنا هانغير الكون
-- ولا ..............

العقول كنز من الكنوز هى الفارق بين الانسان والكثير من مخلوقات الخالق

بدون البدء فى استثمار قيمة العقل والبدء فى التفكير سنظل كما نقول محلك سرك وندور فى حلقه مفرغة وسترتفع الكثير من الكلمات

والعبارات التى توهمك انها عقول مفكرة ولكنها فى الحقيقه عقول مساقة تفكيرها لا يقدم ولا يؤخر

ابدء واكتشف ربوع حياتك واصنعها من تلابيب فهمك وتفكيرك





بدون العقل قيمتك
ايه يا انسان
اوعى تخونك نفسك
وتنسى تكريم الرحمن
ولا يغرك عمرك
وتقول احنا عايشين تمام
والدنيا اهى ماشيه
ومش عاوزين دماغ
وتقولك نفسك اللى مشى بعقله نهايته وجع الدماغ
تبقى خسران يا صاحبى ان كان دة هو العنوان
وافتكر يوم هاتقف فيه امام الواحد الدايان
هاتكون فيه مصحصح
علشان تقدر تعرف طريق الجنان
وافتكر فى اليوم دة
ان العنوان كان موجود معاك
كرمك بيه ربك وكان هبه ليك من الرحمن
حط عقلك فى راسك وابدء يوم جديد
كل يوم تفكر فيه هايتولد ليك عمر جديد
تعرف بيه عنوانك
ودة شيىء اكيد
جرب والنجاح هايكون العنوان بالتأكيد


ومش عجبى

26 Response to "دعارة العقول ( اعادة نشر )"

hager Says:

فعلاااا ومش عجبي

تقريباا احنا وصلنا للحد ده عشان احنا اتعودنا اننا نتقاد
عقول تانيه تقودنا ونسينا اننا زمان قدنا العالم

مشكلتنا اننا ناسين احنا ميين واولاد مين ولازم نبقي ميين

هنغير الواقع ده يوم ما نعرف انه لازم يتغير
بس هل من مستمع او هل من مجيب !!!

شمس النهار Says:

اللي احنا فيه ده مش هيتغير في يوم وليله ده عايز سنين
نبتدي احنا التغيير علي اقل مع بعض نحترم عقول بعض
نحاول مع اللي حوالين نرجع القطر القضبان
مهما قلت انت كتبت كل حاجه

mahasen saber Says:

صدقت يا ابو على

بس دى عادتنا ولاا هنشتريها

ربنا يهديلنا نفوسنا وعقولنااليى يأقل تقديرممكن تدوينافى كارئه ما

mahasen saber Says:

انا كنت بقول ايه امبارح
تخيل كتبت التعليق وانا نايمه هههههههه

بس ده لانى مقدرش اشوف ابو على نزل حاجه جديده ودخلش ااقراها وااقول رايى كمان فيها

يعنى تقدر تقول كتابات ابو على مش هتقدر تقفل عنيك

اخبارك ايه يا رب تكون بافضل حال

MaNoOoSh Says:

مع انه سبحان الله زين أجسادنا بوجود العقل فى الراس على قمتها.. بس الانسان وصل عقله لمكانة منحطة قزى بأفاعالة.

وحتى العقول العالية الباقية.. أصبحت تشك فى نفسها وفى مبادئها فى زمن أصبحت العقول تباع فيه ومع ذلك تباع بلا قيمة حقيقية.

وأرجع أقول ان عقل الانسان لا يباع الا اذا هو نفسة قرر انه عايز يبيع عقله ويبدله بعقل "ماشية" علشان تكون حياته أسهل فى الانقياد.

وحياتنا مش هتتغير للأحسن الا اذا احنا قررنا اننا نصلح نفسنا.. كل واحد يبدأ بنفسه.. وهو دة الحل من وجهة نظري حتى لو أخد وقت طويل ومجهود كبير.

aidy Says:

للأسف مش اول تعليق :(

عشان جيت متأخر اووووى

بجد مواضيع حضرتك بتكون متميزة دايما

للأسف معظم الجيل الجديد اللى هما أمل الشعب أساسا معندهمش هدف

بالعكس كلهم مجموعتين اللى شايفين الدنيا سودا اوى وعايزين يموتوا

واللى مش شايفنها اساسا

كلهم مستنين حد يفكرلهم ويخططلهم وياريت ينفذلهم

Sometimes Says:

السلام عليكم

هو انا ليه اكون مفعول به وليس فاااااااااعل؟؟؟

Don't stand still

لازم ابدأ

اللهم ارزقنا عقل حكيم يارب العالمين

اقصوصه Says:

الله يعيننا ع هالزمن

تقبل مروري

ايوشة Says:

حضرتك قولت كل حاجة احنا فى زمن اللى بيمشى بعقله بيتعب واللى بيمشى بقلبه بيتعب برضو الحل انه يعيش شبه ميت

MaNoOoSh Says:

فينك يا ابو علي؟؟؟
شكلك مشغول وللا ايه؟

ghorBty Says:

يا الله

ودا لاننا اتعودنا علي السلبيه او يمكن بنحب نريح دماغنا لحد ما نسينا ازاي نفكر وازي نستخدمها

ربنا يعين

ABOALI Says:

الى هاجر
صح الكلام يا هاجر
نجحوا يجعلونا فى غيبوبه وحلقة مفرغة
بس احنا قادرين على النمو من جديد

احييكى على رايك الفاهم


تحياتى

ABOALI Says:

الى الحاجة شمس النهار

معاكى كل الحق

البدايه احترام تفكير الاخر
والاخر هم نحن
ومحاولة تنمية ذلك الفكر والاستفادة بخبرات البعض فى النهوض من جديد


تحية على رايك الثاقب

ABOALI Says:

الى ام بيرو
الغائبة الحاضرة

اتمنى ان تكونى فى افضل حال وانا شاكر جدا على السؤال وربنا ان شاء الله يغير الحال


اشكرك على رايك يا غالى

ABOALI Says:

الى مانوش

يا باشا باشا

رايك صائب طبعا" واتفق معك بشدة وعمق

العقل هو زينة الانسان
فهل يا ترى اختفى الانسان ام لازال حى

بس مادام فى عقول مثلك وغيرك يفكرون ويحافظون على المبادىء

سيكونون يوما ما هم الفائزون


اشكرك على التعليق والسؤال

ABOALI Says:

الى ايدى

الشباب معذور طرق التعليم والتربيه طرق صماء تعتمد على التلقين والحفظ
وعدم استعمال العقول

بس لو فى ناس قربت شوية منهم ووضحت الطريق
انا واثق انهم سيبدؤن الحياه من جديد

تعليقك كاءنه اول تعليق

اشكرك

ABOALI Says:

الى بعض الوقت

والله ليكى وحشة

اتفق معكى بعمق
احنا دلوقتى حرف جر


تحياتى المتجدده

ABOALI Says:

الى اقصوصه

الله يعين المفكرون فى كونه القائمين على تطبيق منهجه


ولالالالالالالالالالالالالالالالالالالا ايه


اشكرك

ABOALI Says:

الى ايوشه

وهل ده يرضيكى انك تعيشى اشباه الاموات

لم نخلق كهذا

الكيس من عرف الطريق وصمم على ان يخوضه بكل تحدياته طالما انه ايقن انه الطريق الصحيح
ومن يتخلى عن عقله
عليه بالذهاب الى حديقة الحيوانات

ولالالالالالالالالالالالا ايه


اشكرك وعودا حميدا

ABOALI Says:

الى مانوش مرة اخرى

اشكرك من الاعماق على السؤال على
فعلا انشغلت خلال الايام السابقة

ولكنى معكم بكل كيانى
فكل من قرء لى كان كيانى


تحياتى

ABOALI Says:

الى غربتى

لم تخلق الدماغ للراحة
ولكنها هى اساس الانسان
فمن استغنى عنها استغنى عن نفسه
راحة العقول فى استخدامها
واهمالها هو قمة الاذى والحمق


اشكرك على مرورك من هنا

مخنوق كيك Says:

يا كبير هي الدماغ ايه غير طاسة .؟

انا عن نفسي بشرب كباية شاي يليها طبق من الجبنة الرومي وكل شئ بيكون عااال العال

ربنا يوفقنا جميعا
صحيح : عملت ايه في اللاب توب

Sonnet Says:

فكرة هذه المدونة جميلة جدا
تقبل مرورى

ABOALI Says:

الى مخنوق كيك

كيفك يا مان كله تمام
عساك تكون بخير ومروق الانانى فينك مش ظاهر

هى الحلة احسن من الطاسة
بس لازم تكون تيفال
ولالالالالالالالا ايه

ABOALI Says:

الى sonenet


اشكرك على الزيارة
مع تمنياتى بتكرارها

mahasen saber Says:

الفلوس والوصول للهدف بسرعه وبدون وجه حق

وايقاع الحياه السريع خلى كل انسان يلغى عقله وبالتالى يدى قرار فصل لضميره

فبتالى بئى التجاره دى رائجه قوى قوى الايام دى

وربنا يعافينا من ما ابتلى به غيرنا