العجل ابن الفرسة !

, الأربعاء، 11 فبراير 2009


يحكى ان
كان لأحد الاغيناء فرسة وكان لأحد الفقراء بقرة
فولدت البقرة عجلا" فراءه الغنى فأعجب به
فذهب الى الفقير وقال له سوف اخذ العجل
فقال له الفقير لماذا؟
فقال لأن العجل ابن الفرسة!
فتعجب الفقير واصر الغنى على اخذ العجل
فذهب الفقير الى القضاء ولكن الغنى قام برشوة القاضى فحكم له القضاء ان العجل ابن الفرسة
فذهب الفقير الى القضاء مرة اخرى فقام الغنى برشوة القاضى الثانى فحكم ثانيا" للغنى فقال الفقير كيف هذا؟
فتعجب القاضى من مقولة الفقير وقال له
كم رجلا" للعجل فقال اربعة وكم رجلا" للفرسة فقال اربعة
وكم عين للعجل فقال اثنان وكم عين للفرسة فقال اثنان
فقال اذن العجل ابن الفرسة
فذهب الفقير الى القضاء مرة اخرى
وفعل الغنى ما فعله مع القضاه السابقين ولكن القاضى الثالث قال له معذرة لن اقبل منك الرشوة اليوم فأنا عندى اليوم عمل فاليوم عندى طور سأحلبه فتعجب الغنى فقال وهل يحلب
الطور
فقال له القاضى وهل تلد الفرسة عجل

اذا نظرنا بعمق الى تلك القصة يمكن ان نستنبط الكثير من المعانى منها


-- عدم اليأس من الفقير ومثابرته لأخذ حقه
-- مهما طال الوقت فالابد ان يرجع الحق لأن وراءه من يبحث عنه
-- ليس بالضرورة فساد بعض الاشخاص ان يفسد الجميع
-- هناك مهارات تستخدم فى الشر للاقناع مثلما قال القاضى الثانى وهناك مهارات تستخدم للخير كما استخدمها القاضى الثالث


وهناك الكثير من الاستنباطات الاخرى

لذا جاءت مقولة ان المسلم كيس فطن
هناك شيئان متلازمان يجب الحرص دائما على تنميتهما

هما المعرفة والمهارات
مع وجود العامل الاساسى هو نية الشخص ودوافعه
فاءن كان ينظر لاءى تحديدات تقابله على انها تزيد خبرته وثقته وتقربه من ربه
كانت تلك هى النية الصادقة السليمة المتصالحة مع الحياه
وإن كان ينظر التى التحديات على انها إنكسار له وسوء بخت وضنك وظل يبكى على ليلاه
كانت تلك هى النية الشاردة البعيده عن منهج الحياه السليم

فليكن لنا طريق نرسمه ونخط فيه الحروف ونعطى الرونق للكلمات لتغدو مبتسمة متلالئه بما تراه جهد وعرق


واخيرا"
هناك من يغوص فى البحر
فيستخرج منه اللؤلؤ والياقوت والمرجان
وهناك من يغوص
فيستخرج اسماك القرش والثعابين



وعجبى

74 Response to "العجل ابن الفرسة !"

كيــــــــــــارا Says:

انا اخدت الاول

كيكيكيكيكيكيك

كيــــــــــــارا Says:

لالالالالالالالالالا جامده

ومش المفروض اننا نياس

لا حياه مع الياس ولا يأس مع الحياه

لازم نؤمن ان ربنا اسمه الحق

ABOALI Says:

الى كيارا

لالالالالالالالالالالالالالا
كمان اول تعليق
يلا قهلا يا قهلا

فعلا الله هو الحق
بس مع من يرفع راياته
ويبذل حبات العرق

ولالالالالالالالالالالا ايه

ABOALI Says:

الى كيارا

اى خدعة
هههههههههههههه

EMMY BABY Says:

لا بقى

الله

الله

مليش دعوة

هقرا وارجع تانى

موناليزا Says:

الله
ما اجمل هذا الموضوع
وحقا لايضيع حق وراءه مطالب به

hager Says:

قصه راائعه كالعاده :D
والدروس المستفاده كمان جميله اوووي :)

EMMY BABY Says:

هههههههههههههههههههههههههههههههههههه

بجد والله جميلة اوى

ضحكتنى اوى بتاعت ليه عنين واربع رجلين دى

بجد عمق القصة جميل والهدف منها اجمل

تحيااااااااااااااااااااااااااتى يا ابو عللللللللى

ندا منير Says:

رائعة قوى القصة دى

واكيد وسط كل ميت شخص لازم يطلع نسبة كويسة من اشخاص بينصروا الحق ومش بيضيعوا حق اى شخص مهما كان

ABOALI Says:

الى ايمى بيبى
كيف حالك ؟

اليس لديكى رجلان وعينان وشفتان واذنان
وذراعان

يبقى بالتاءكيد انتى انسان جميل

تحياتى

ABOALI Says:

الى موناليزا
اهلا بيكى يا فندم
الاجمل وجودك ومتابعتك بصفة مستمرة
فاءنتى بالفعل ممن يستخرج اللؤلؤ من البحر

تحياتى

ABOALI Says:

الى هاجر
ياهلا يا هلا
بالناس اللى خارج حدود الوطن

كان نفسى تستنبطى انتى كمان درس ولا درسين
وتقوليهم

دايما زاى ما انتى عارفة يعجبنى تفكيرك المنظم الراقى


تحياتى مع شكرى

ABOALI Says:

الى ندا منير
مرحبا" بك بعد غياب
وليه كل مائة شخص تحديدا"
ممكن من كل 3 او 2 او 4
اهم شيىء هو الاصرار على اخذ الحق

اشكرك واتمنى ان تكونى موفقه دائما

EMMY BABY Says:

ههههههههههههههههههههههه

ياااااااااه انت وصفتنى وصف دقيق

عرفت كل ده منين

انت الحاسة السادسة عندك قوية

(وش بيطلع لسانه )

princess Says:

البوست حلو اوى واكتر حاجة عجبتنى"ان البحر فيه الحاجتين"
تحياتى:))

انا ودماغي Says:

الله القصة حلوة اوى بجد
و كمان الإستفادة بتاعتها تحفة

و الله أنت دايما كدة بوستاتك بتوزنلى دماغى





بس يعنى البوستات دى مش لاقية غيرك أنت اللى يكتبها

حاجة غريبة أوى

ضــى القمــر Says:

قصه روووعه بجد ..
لكن الاجمل منها الحكم والدروس المستفاده من القصه .
لقد كتبت يا اخى موجز مفصل عما قصدته معانى القصه .
وختمت موضوعك بكلمات أكثر حكمه لمعايشة الحياة .
عن جد اشكرك يا اخى على حسن اختيارك لنا .
وتقبل تحيتى لشخصك دائما .

mahasen saber Says:

اهه الموضوع ده بالذات انا حاسه بكل حرف فيه

فعلا لا ضاع حق ورائه مطالب

بس بالنسبه لاسماك القرش هيا مش هتدى حد وقت انه يستخرجها اصلا
هيا اليى هتستخرجه من الدنيا الى فكها فالأخره علطول

الحياه صعبه عشان كده لازم نقابل صعوبتها بالتفائل وبروح صافيه فتقبل بحب اى شخبطه تيجى عليها

مبدع دايما يا ابو العقل كله
يا اخونا العزيز ابو على برضه

mohamed ghalia Says:

بيعجبنى فيك أستاذى استنباطك للحكم والمواعظ من كل قصة ومن كل موقف
دمت بكل الود

yara Says:

مش عارفه يا ابوعلى
الراجل الفقير ده مش عاجبنى
يعنى ايه اللى خلاه يلجا للقضاء اصلا
لو كان اذكى من كده مكنش لجا للمرتشين
وكان هو قدر يجادل بطريق منطقيه الرجل الغنى ذى ما القاضى التالت عمل,الموضوع مش صعب يعنى,مش اى مشكله نقع فيها نجرى نشوف حد يخرجنا منها طالما فى ايدينا الحل.
وبعدين يعنى هى الكحكه فى ايد اليتيم عجبه يعنى الرجل الغنى ده معندوش دم والله مننننه لله بهدل الراجل معاه فى المحاكم.
يلا يا ابوعلى ربنا على القوى والمفترى هنعمل ايه.

تحياتى ليك ايها المفكر........

ABOALI Says:

الى ايمى
علشان تعرفى بس انتى بتتعاملى مع مين
احنا اللى عملنا الجستابو
ذكااااااااااااوه
والله ذكاااااااااوه

ههههههههههههههههه

ABOALI Says:

الى برنسيس
اشكرك وسعيد ان البحر عجبك وعلى فكرة البحر فيه وشوش لما نبص ليها ندارى عليها بالرموش

تحياتى

ABOALI Says:

الى انا ودماغى
حيرتينى معاكى يا انا ودماغى
كل ما اوزن دماغك بالجرامات ارجع اوزنها بالكيلوهات وبعدين اراجع نفسى واقول ليه مافكرش اوزن بالاطنان
وبعدين تراجعنى نفسى وتقول عيب عليك
دى انا ودماغى جميلة الجميلات
واللى حاول يوزنها وقعت عليه فمات

لله الامر من قبل ومن بعد
(وش فيه لسانين)

ABOALI Says:

الى ضى القمر

المدونه الغائبة الحاضرة
بكل صفائها ونقائها و اناقة قلمها
لكم اعجب لما لا تكتبين باءستمرار
ولا ادرى اعالمك ازدحم بالاسرار


اسعد دوما بوجودك ها هنا

تحيتى

ABOALI Says:

الى ام عبد الرحمن الاخت محاسن

والله تعليقك شخبطلى دماغى وفضلت اغنى مع نانسى شخبط شخابيط

بس تصدقى انه كلمة شخبطة دى لذيذه
و يا حبذا بقى لو معاكى استيكه علشان تظبطى اللى اتشخبط وكمان علبة الوان وتلونى القلوب بقى بالصفاء والسمو اللى انتى بتمتعى بيه
واه ياااااااااا عينى
لو تفكرى تفتحى مكتب اسمه
(قبل ما تفكرى تتطلقى )

وتعطى فيه من بريق ما واجهتيه طوال حياتك

لاءن عمر الانسان لا يقاس بالسنين
وانما بالخبرات التى يكتسبها

فكرى كده

وليه عمولة


صدقا" بتكلم جد


تحياتى الراقيه

ABOALI Says:

الى محمد الغاليا

استاذ ايه بس يا محمد
كلنااااااااااا انسان
ولو كنت انت مكانى لاءستنبط الكثير والكثير
فاءنت من الشخصيات النقية التى احب ان تتكرر فى عالمى

وفقك الله دائما

ABOALI Says:

الى يارا

ههههههههههههههه
حتى الفقير يا يارا مش عجبك
حتى تصميمه مثل يدرس
انا معاكى انه كان ممكن يتكلم بالحسنى
بس الحياه ليس فيها هذا

فهناك جبروت الغنى وسطوته
ولما لم تقولى ان ادعاء الغنى ضرب من الجنون
ولكنه استمر فيه

وكم من الاراضى التى وضع البعض يده عليها واصحابها موجودين

مش بالسهولة دى المواضيع بتمشى

والا كنتى رايتى بلابل من المتزوجين
وعباقرة من الطلبه عارفين طريقهم لوحدهم

علشان كده
وجود المهارات والمعرفه هو الذى يحمى من الوقوع بهذا الشكل فى الخديعه

ولالالالالالالالالالا ايه

ارحمى بقى الفقير
ولا علشان انتو الاغنيا وطماعننين فى عجل الراجل الغلبان

سلوى Says:

جميله فعلا
وفعلا لا يضيه حق وراءه مطالب

وأولا وأخيرا الثقه بالله

اسماء واحلام فى وجدانى Says:

التعليق الثانى

وربنا يستر عليا

ملحوظة: الحكاية جميلة ودى حاجة على اد ما اعرف مش جديدة عليك

ولحد كده وكفاية علشان الحق انفد منك

احمد

إيمان Says:

لا يضيع حق وراءه مطالب
بجد موضوع جميل ومهم جدا
اليأس دايما ممكن يخسرنا كتير
تحياتى

شمس النهار Says:

عندك حق في ناس بتستخدم الذكاء في الشر وناس بتستخدمه في الخير
بس الاول بيحصد شر والاخير بيحصد خير
البوست جميل وكله عظه

رندا Says:

ابو على

توقفت هنا حقاً توقف امام كلماتك
ورائها كل الموعظة لعلنا ناخذ بها

صديقى
حامل الكنوز وواضعه امامنا كى نلتقط كل ماهو ثمين

اسلوبكـ راقى فى سرد الكلمات وبساطة كلماتك تدل على قوتها فى المعنى وهذا معناةان ليس كل من كتب كاتب
ولا كل من نقل معلومة غلفها مثلك بشريط ذهبى لامع كى تلفت الانتباة وناخذ منها مانشاء

دمت بكل الخير يارب يارب يارب

الازهرى Says:

فليكن لنا طريق نرسمه ونخط فيه الحروف ونعطى الرونق للكلمات لتغدو مبتسمة متلالئه بما تراه جهد وعرق

ليتنا نعمل على ذلك بدلا من تشرذمنا متخاذلين مقبلين على ايدى اعدائنا تاركين المطالبة بحقوقنا ومنتظرين لفرسان مجهولين يرسمون لنا طريقا خطأ ولا يعصوننا من حقوقنا شيئا

تحياتى دوما

dalia Says:

أبو على الفنان

شكرا على التذكره فعلا ما ضاع حق وراءه مطالب الاصرار على تحقيق الاهداف سر النجاح في الحياه وأجمل حاجه شدتني ان الفقير لم يبكي على حال الدنيا واتهم الناس بفساد الذمم
كمان البوست رائع جدا
تحياتي الراقية

حبيبه Says:

قصة جميلة اوي
لايضيع حق وراءه مطالب
تحياتي لك

Sometimes Says:

افتكرت حدوته لابله فضيلة كنت سمعتها مره
قريبه منها جدا

وافتكرت كمان وانا فى حصه مرة والعيال كانوا عاملين دوشه جامده اوى قامت بنت وقالت كفايه حرام عليكم كده ... ده ربنا خلق لنا لسان واحد وودنين علشان نسمع اكتر ما بنتكلم.. اييييييييييييه ايام

فعلا فن الحوار بقى صعب اوى نتقنه
موضوع يلا بينا نسمع بعض جمييييييييييييييييل بجد
جزاك الله خيرا على كل كلمة بتكتبها

fashkool Says:

ابو على .. تحياتى
اول مره فى مدونتك
كل شيئ فى الحياه له وجهان
وجه الحق .. ووجه الباطل
احيانا يلبس الباطل الحق
ولكن الحق لا يلبس الباطل
لانه حق
تحياتى

عاشقه الرومانسيه Says:

لا جامده صحيح الحدوته دى
اول مره اسمعها
وكمان الدروس اللى فيها هايله
اشكرك بشده والحاح

Heba Sayed Says:

اللى عند الله عمره ما بيضيع

ربنا اسمه الحق


تدوينة رائعة يا ابو على

ABOALI Says:

الى سلوى
فعلا الحق واضح ويتطلب من يبحث عنه
اشكرك

ABOALI Says:

الى اسماء واحلام فى وجدانى

تعليق ذكى وعجبنى
ماشى يا احمد باشا
الله المستعان على الجميع

تحياتى

ABOALI Says:

الى ايمان
فعلا الياءس يخسرنا كتير جدا كمان

وان شاء الله الحقوق دايما ترد

اشكرك على المتابعة

ABOALI Says:

الى الحاجة شمس
هى دى الخلاصة
كيف تستخدم المهارة فى الحق لاءن هناك من يستخدمها فى الباطل

تحياتى لك دوما"

ABOALI Says:

الى رندا
الله الله عليك يا راندا
يا حاملة المسك
ماشاء الله عليك
ربنا يجعل حياتك كلها زهور ومعانى نبيلة
لكم اسعد بك

تحياتى

ABOALI Says:

الى ابويا الحاج ازهرى
عامل ايه يا جميل

فعلا" اوجزت يا ازهرى

لك كل تحية

ABOALI Says:

الى داليا
يااااااااااه يا داليا ضاعت الحقوق لعدم الدق والطلب عليها

نحتاج الى كثير من التغير
همتك يا صحافيه يا ناقلة الحقوق
واصدق من يعبر عنها


اشكرك على ادراك وفهمك

ABOALI Says:

الى حبيبة

لكم احب ذلك الاسم ويسعدنى رؤيته
وارجو الله ان يجعل لك نصيب منه دائما

بدون طلب الحق لاءن ياءتى الحق

ولا ايه

ABOALI Says:

الى SOMETIME
هههههههههه
ابله فضيلة ابلة فضيلة
يلا تعالوا ابلة فضيلة


والله كانت ست هايلة ورائعة
ربنا يجازيها كل خير
كان الساعة 10 الواحد ينتظرها بفارغ الصبر


مافيش حاجة صعبة اصعب شيىء هو البدايه والارادة

تحياتى لك دوما

ABOALI Says:

الى فشكول
ياهلا يا هلا
المدونه منورة فى اول زيارة
وان شاء الله تكون صاحب مكان
وفعلا كما قولت الحياه الوان

اشكرك

ABOALI Says:

الى عاشقة الرومانسية
بشدة والحاح
ارد على شكرك
واقول جزاكى الله كل الخير والبهجة والبسمة


تحياتى

ABOALI Says:

الى هبه السيد

اللى عند الله لا يضيع
بس المؤمن القوى خير من المؤمن الضعيف عند الله

لازم شوية جهد و اصرار

تحياتى الراقية

مهندس / على درويش Says:

الحق أحق أن يتبع
أشكر الفقير الذي ظل يطالب بحقه ولم ييأس من العدل ورحمه الله
أشكر الغني لأنه عرفنا بالقضاه المرتشون الذين باعوا ضمائرهم وأسودت قلوبهم
وأشكر القاضي الثالث الذي ما زال وسيزال يمثل روح العداله
....
...
..
أخسنتي في أختيار القصة والموضوع فهو جميلا حقا

nour shahen Says:

دايما بتطرح علينا قصص جميله جدا وفيها من العبر الكثير

ودا اجمل شيء اننا نلغبطك فى افكارنا الملعبكه وانت تطرح علينا من اجمل القصص اللي صادفتك هى مشاركه مش عادله شوية بس اكيد بنستفيد منها

تحياتى

arsenalwy Says:

حلو انك عرضت القصة واستنبطت منها كلامك

طريقة عرض افضلها

وكلامك صح طبعا فاللى عايز حاجه مبييأسش

اللؤلؤة Says:

السلام عليكم
أخى الكريم أول مرة أدخل على مدونتك فموضوعاتها تزودنا بالعبر والدروس
تحياتى
ويسعدنى التواصل معك

enjy Says:

هو الكلام صح طبعا بس احنا هنا عندنا ناس كتيرة ممكن تقول ان العجل ابن الفرسة ويجيبوالك شجرة العيلة كمان..افترا بقى

Lady E Says:

مهما طال الوقت فالابد ان يرجع الحق لأن وراءه من يبحث عنه

مش دايما يا ابوعلي

بس الموضوع بجد جميل

norahaty Says:

وهناك من يغوص فى البحر فيغرق
لان الامواج عليه شديدة
ومن حوله لا يساعدونه
اسفة(للاحباط)ولكن
الحياة العملية
بها الكثير من
الاحباطات
وخاصة فى
مصرنا
العزيزة
الان

ABOALI Says:

الى مهندس على درويش
وانا اشكرك على تعليقك الجميل

تحياتى

ABOALI Says:

الى نور شاهين

كلنا بنكمل بعض
لا يوجد لنا افضال على بعض
الحياه الوان ونحن نشكلها ونلون فيها

تحياتى مع شكرى

ABOALI Says:

الى ارسنالاوى

فعلا الحقوق بالمجهود ترد لاءصحابها

اشكرك

ABOALI Says:

الى اللؤلؤ
وانا سعدت بالزيارة واتمنى استمرارها

تحياتى

ABOALI Says:

الى انجى
اكيد واحنا لازم نكون اذكى منهم
ولالالالالالالالالالالا ايه

ABOALI Says:

الى ليدى
دايما بيرجع
بس بالاصرار والعزيمة
ولالالالالالالالالا ايه

ABOALI Says:

الى نورا حاتى

ليه كده بس
كيف اسمك فيه نور
وان شاء الله مصر تتملى انوار

تحياتى

شخـا بيــط مـحـجـوب Says:

مدونتك جميلة اوى اوى بجد
موضوع روعة
تحياتى ليكى
وتقبل مرورى
شخابيط mahgoub

Lady E Says:

مش عايزة أأقتل فيك التفاؤل بس هقولك حاجة حصلت قدام عنتيني والمعنى هيبقى قريب لو بتشوف اعلانات الرحمة اللي هي بتاعت من لا يرحم لا يرحم (بضم الياء)

في واحد اشتغل في مدرسة خاصة سنة كاملة
ومأخدش مرتبه
ولما طالب بمرتبه اطرد من شغله وكمان الشخص ده مكنش في بلده واستلف تمن التذاكر وروح ومأخدش حقه

وكمان في واحد اشترى حاجات كتير بمبالغ كبيرة ولما الناس طالبوه بدفع الفلوس اللي عليه انكر انه اخد حاجه اصلا وقال انه من ابناء البلد اللي هو فيها يتمتع بخيرها لكن اللي اشترى منهم مش من اهل البلد وعايش حياته على السحت وعادي جدا فلته موجوده وعربياته ومفيش عنده مشاكل اما عن الحق في الموقفين فمرجعش لأصحابه

لو الموقفين غامضين ممكن اوضحهم اكتر من كده

Lady E Says:

مش دايما الحق بيرجع لأصحابه ومش دايما الخير بينتصر للأسف !!!

سندس وأمل Says:

جميله اوى المدونه دى......

ماشاء الله .........

وراااااااااااااااااااااااااااااائع

البوست ده

سندس

ABOALI Says:

الى شخابيط
اشكرك الزيارة
اتمنى العودة دائما
تحياتى

ABOALI Says:

الى ليدى

اذا فقدنا الاصرار ودب فينا الياءس وقلة الحيلة
ماذا ننتظر ؟
لك الاجابة
ولا تقولى صعب
فنحن من نصنع الصعوبات

تحياتى

ABOALI Says:

الى سندس
والاجمل هو العمل بما نعرف
ياااااااارب