استجماتيزم نفسى

, الأربعاء، 4 أغسطس 2010



يوم الجمعة  من الايام الخاصة  الرائعة المعانى
 اشعر فيه كأنى اشحن بطاريات النفس من جديد
لتبدء اسبوع اخر من البحث داخل منعطفات الحياه
دائما بعد صلاة الجمعة اتجوال قليلا
 وامارس بعض من رياضية المشى
 واثناء المشى لا يمنع من شرب كوب من العصير و شراء اللب
كنوع من الترفية عن النفس وكم هو ممتع ان تتمشى وانت متأمل
 وتشاهد الكثير من المشاهد بعد تأدية الصلاة
  قد تكون متوافقة مع ما يقال فى خطبة الجمعة او  غير متوافق
البعض من تلك المشاهد تقول فيه
 الحمد لله الذى عافانا مما ابتلى به الاخرون
  والبعض منها تتعجب
لهروب تأثير كلمات الخطيب على المنبر بهذه السهولة
ولكن فى النهاية تقول انها دنيا وهذا حال الانسان
عادت اقدامى مرة اخرى الى البيت
بعد ممارسة ما تعودت عليه وعدت وفى قمة نشاطى
وها انا ادخل البيت  
حتى وجدت ام العيال كعبره
 تقول فينك   مش تبطل  موضوع سرحانك ده بعد الصلاة
ابنك رجع من الصلاة مع  اصحابه 
 وقفل عليه باب  الاوضه ومكتئب
  ادخل شوفه
فقلت طب ممكن نستأذن الايد اللؤلؤ دى
فى  كوبين كركديه
فقالت يا راجل اتنحرر شوية
وشوف ابنك 
ايه الرجاله دى
 فقلت حاضر
يا ياسمين حياتنا من عيونى
فدخلت على  زج زج  وسئلته عن اسباب العزله
 فقال لى يا بابا بلاش تقرب منى علشان انا عندى
استجماتيزم نفسى
فتبسمت
يااااااااااااااااااااااه
ايه الكلام الكبير ده يا زج زج
فقال يا بابا كنت النهاردة اصلى الجمعة
 و الخطيب كان بيدعى فى نهاية الخطبة  وانا لم اقل امين
والرجل الجالس جانبى بعد الصلاة
 نظر ليا
 و قال جيل منحل وقليل الادب والتربية
فقلت ولما لم تقل امين؟
يا بابا الخطيب كان بيقول
اللهم  اعمى ابصارنا اذا نظرنا للحرام
اللهم اصم اذاننا  اذا سمعنا الاغانى
اللهم  اقطع ايدينا اذا اكلنا من الحرام
اللهم  شل ارجلنا اذا مشت فى معصيتك
اللهم اجعلنا خرس اذا تكلمنا فيما لا يرضيك

والناس يا بابا بتقول امين امين امين امين

هههههههههههههههههههههههههههههههههههه
 فضحكت حتى ضحكت حروف الضحك
وضممته الى احضانى وقلت له
تخيل يا ابنى شقة بها اربع نوافذ يدخل الضوء  منها
  هل ستشعر يوما انها مظلمة ؟
فقال سيكون نورها قوى  ومضىء جدا
بالفعل يا ولدى هذا ما يحدث
القلب مثل تلك الشقة جعل الله فيه اربعة نوافذ تدخل الضوء
فاءن ذهبنا الى المساجد فتحت نافذة
 وان اقامنا الصلاة فتحت نافذة
  وان توكلنا على الله فتحت نافذة
 وان طبقنا الدين فى المعاملات فتحت نافذة
حتى يمتلىء القلب بالضياء
وعندها يا ولدى يحدث الاتصال
 بين القلب والميم والخاء (المخ) فيتولد الادراك والوعى  والشعور
فترى الكيان كله نور  ولما نقرء القراءن تشوف


الناس يا ز ج زج اللى شوفتهم النهاردة وقالوا امين
  مشاغل الحياه ملئت قلوبهم واغلقت بعض من النوافذ
فحدث انفصال بين ضياء القلب و الميم والخاء ( المخ)
 فلم يحدث الادراك والوعى  ورد اللسان بشكل تلقائى بدون تفكير
 امين امين امين
ومبسوط  انك جعلت نوافذ قلبك مفتوحة واتصلت مع مخك
 وشعرت انك  لا يجب ان تقول امين
ولو قرأت القراءن هاتعرف انى فيه ناس قالت
******************
وَإِذْ قَالُواْ اللَّهُمَّ إِن كَانَ هَـذَا هُوَ الْحَقَّ مِنْ عِندِكَ
 فَأَمْطِرْ عَلَيْنَا حِجَارَةً مِّنَ السَّمَاءِ أَوِ ائْتِنَا بِعَذَابٍ أَلِيمٍ
**************************

فبدل ان يدعو الله ان يمطر عليهم من الخيرات
 دعو ان يمطر عليهم بالحجارة
والمفروض ندعى كلنا ان ربنا يهدينا
ويعف ابصارنا عن الحرام واجسادنا
وكلام  الرجل اللى كان جالس جنبك
 وسام على صدرك انك فاهم وواعى
بس قولى ايه حكاية الاستجماتيزم النفسى ده
فضحك زج زج وقال
الاستجماتيزم نوع من انواع امراض العيون
المريض لا يرى عن بعد ابعاد الشيىء الذى يراه
 يعنى ممكن لا يرى ارجل المنضدة  بشكل واضح ويراها متداخلة
ولما الرجل قال  ليا كده
قولت اكيد عندى استجماتيزم نفسى  ولا ارى  اشياء وابعاد يراها هو
الله على تعبيراتك يا واد يا ممتع انت
واثناء ذلك دخلت ام العيال فقالت خير ابنك قفل على نفسه ليه
فقلت ليها خير ان شاء الله
الواد عنده استجماتيزم نفسى
فقااالت يااااااااااااااااالهوى
قوووووووووم اتنحرر ويلا تكشف على الواد

فتبتسمت دقائق الكيان
كأنها تقول
الادراك والوعى
نور

15 Response to "استجماتيزم نفسى"

لــــ زهــــــراء ــــولا Says:

اول تعليق
اول تعليق
اول تعليق
ياسلااااااااااااااام
لـــولا طبعاَ :d

لــــ زهــــــراء ــــولا Says:

والله حكاية ممتااااااااااااااازة استمتعت بيها جداااا ابنك في الحكاية المؤلفة دي ما شاء الله عليه دمه خفيف طالع لابوه (: ... ياسلاام عجبني حكاية نوافذ القلب واتصالها بالمخ ونور هان الكيان بيه تسلم الايادي
انا بقى في ذكريات صلاة الجمعة دي الصراحة مش تمام عندي الذكريات فيها المسجد كان بيبقى زحمة قووووي وحر والخطبة الشيخ كان بيطول فيها جااااااامد وكنت طفلة صغيرة لا احتمل التطويل ده وكان المصليات يستهزؤا بيا ويحاولوا يوزعوني على اخر الصف بدل ما يشجعوني على الاصطفاف بجوارهم بس ايه ماما كانت نظرة ليه بالمرصاد
لانها عودتني من صغري انها تحترم كياني وكاني شخص ناضج بالسن متحمل كامل المسؤلية زي منتا كدة خليت ابنك يروح يصلي لواحدة وادته ثقتك

بجد حكايات بتعلم منها الكثير رغم بساطتها الا ان الفلسفة التي تحملها في طياتها بتحرك المخ

لـــولا

أنا - الريس Says:

أنا مش هقولك اني بفتح منفذ المخ قد كدا يا ابو دم زج زج .. ولكن
لازم الواحد يفتح مخه
الناس توارثت بعض الأدعية عن جهل في رأي
ولست انا العالم ولكن العبدلله يفضل
أن يدعوا لمن أشرك بالله شيئا ان يهديه بدل من الدعاء عليه .

حمي الله لك دم الغزال . يا أبو العيال الرجال

القدر و انا Says:

ابو على
ربنا يبارك فيك وفى أولادك
حقيقى الله أكبر تربيتك جميلة
عارف لما بقرأ لك محادثة مع أولادك حقيقى ببكون سعيدة جدا ... لكن حزينة فى نفس الوقت على اشرف ابنى اليتيم الذى يقترب من التاسعة و الذى لايتوفر له الأب والصديق والموجه والمعلم...
صحيح ابذل قصارى جهدى ولكن هيهات ان أعوضه عن افتقاد الأب ودور الرجل فى حياته.. خاصة عدم وجود احد قريب يقدم له هذا الدور.
ربنا يبارك لك فى اسرتك ويبارك لهم فيك

لــــ زهــــــراء ــــولا Says:

سيدى الفاضل ابو على

-*-*-*-*-*////-----
كلنا تقريبا يوم الجمعه بيكون يوم مختلف عن اى يوم تانى يعنى من وقت الدراسه واحنا نحب اليوم ده عشان اجازه وبيكون يوم مفتووووووووووح لعب وهزار وفسح وكده ...
اقولك بقى على حاجه من فتره نفسى احكيها وجت الفرصه وبما انك عارف اننا عملنا احتلال او استيطان للمدونه
بمناسبة الحديث عن صلاة الجمعه كنت معتاده الذهاب الى المسجد ومن فتره حوالى 3 سنوات كنت جالسه فى اثناء الخطبه وحاطه ايدى الاتنين على ركبتى واصابعى متشابكه فوجئت بسيده بتقولى انتى ...
بصيت لها قالت فكى صوابعك
قولت لها نعم
قالت انتى كده تسبحى للشيطان
قولت لها مش فاهمه
قالت ان تشبيك الاصابع كده كانك تسبحى للشيطان
ولانى شخصيه رزله قولت له وانتى بقى منتبهه للخطبه او لاصابعى اللى تسبح للشيطان
ومن وقتها مش باروح صلاة الجمعه ....

حبيب قلبى زج زج عنده استجماتيزم نفسى هههههههههههه...

انا بقى اللى جه لى عقد نفسيه مكعبره من دعوات هذا الشخص الذى للاسف يسيئ للدين الاسلامى ويسيئ الى الاسلام كله ...

الله على زج زج وهو بيشرح معنى الاستجامتيزم دكتور ورئيس قسم كمان هههههههههههه ربنا يحرسه

عارف فى بعض من الشيوخ واقول بعض احسن يدخل لنا شيخ وهنا ويقول انى كافره والله بعضهم يكره الاطفال فى الاسلام والدين الاسلامى واللى يدعى وهو تقريبا مش فاهم معنى الدعاء واللى يقول ادعيه مقتبسه وينقل بعض الكلمات مكان بعضها والمعنى يتغير والناس تقول امين و اشياء غريبه عجيبه ما انزل الله بها من سلطان
عندى حكايه تانيه بمناسبة الدعوات
فى رمضان اللى فات فى صلاة التراويح كل يوم الشيخ يدعى اللهم اهدى ازواجنا انا بقى مش اقول امين ومره باحكى لاخويا قال وانتى مش بتقولى امين ليه قولت له مش لما يجى ابقى ادعى له بالهدايه ههههههههههههههه

بما اننا من رواد المدونه ياريت نلاقى كركديه او عصير مانجو فى الحر ده نحتاج مشروبات ....

ربنا يحفظك ويهب لك الخير والسعاده

زهــــــــراء

كلمات من نور Says:

الادراك والوعى
نور
===================

ربي ينورها عليك دايما أنت و أهل بيتك الكرام ويعظم لكم نورا ...

مع الأسف بعض المشايخ مش عارفه ليه بيضيقوا واسع كده ...هو فيه حد يدعي على نفسه بالمنظر داه ...الله يعين ابنك عالاستجماتيزم النفسي داه بجد (:

engy Says:

قتلتُ إذا قتلته
كل الطفيليات في حديقة الإسلام
كل الذين يطلبون الرزق ..
من دُكَّانَةِ الإسلام
قتلت إذا قتلته
يا سادتي الكرام
كل الذين منذ ألف عام
يزنون بالكلام
نزار قبانى

SHAPE YOUR LIFE (ABOALI) Says:

الى لولا

امممممممممممممممم
طب وبعدين
خلصتى كام دعوة من المليار اللى عليكى
اقرى واعترفى

SHAPE YOUR LIFE (ABOALI) Says:

الى لولا
هى مش حكاية مؤلفة هى حكاية حقيقة
نجم عنها استجماتيزم وصل الى الدعاء
فكان لابد من الكتابة عن الادراك
لاءن الوعى نور ينكمش امامه الضباب
فمن اراد سيدتى الحياه فى لهو وشقاء
كانت عناوينه لا مكان للعقول والفلهوة هى البقاء
ومن اراد السعادة
كان الوعى جواز مرور لكل البسمات

وهبك الله اليقين وحب القرب من واهب الرحمات


تقديرى لانسان قدير

SHAPE YOUR LIFE (ABOALI) Says:

الى الريس
توارث الادعية يذكرنى بمن توارث عن ابيه عبادة الاصنام فى ايام الجاهلية
وعندما جاء الضياء قال هذا دين الاباء
الادراك والوعى ضرورة لنشر ثمار الدين الزاهرة التى تساعد الناس فى كيانات حياتهم


تقديرى لوعى اراه من خلف الكلمات

SHAPE YOUR LIFE (ABOALI) Says:

الى القدر وانا

كم المنى تعليقك واحسست ان الدمع لا يكفى

سيدتى
عندما يسترد الله امانته كما استردها فى والد ابنك
تنبت هناك ثمار اخرى من المحتمل اننا لا نراها واضحة الان
ولكنها حراس تحفظ ابنك بل وتساعدك فى نقاء نفسه
كل ما عليكى سيدتى هو ان تجتهدى مع ابنك ولا تبخلى عليه بشيىء
وتؤدى دورك المعلوم
ولا تشغلى بالك بما سيحدث بعد ذلك
فذلك الكون
ادارته من علم عليم حكيم يدرى ويعلم الحكمة من كل شيىء

ربنا يهبك القدرة والصبر والصحة والبركة والعفاف والغنى ويعينك على منعطفات الحياه

تقديرى الكامل

SHAPE YOUR LIFE (ABOALI) Says:

الى زهراء

ههههههههههههههههههههههه
يا عينى على المواقف الدرامية

وجود بعض البلهاء فى تقديرى ليس سبب لعدم الذهاب الى المسجد
لانهم بهذا المنظر سيتكثرون دون ردع
لذا اذهبى وكونى بسلوكك نور لغير وهداية
ومجرد سمتك الخارجى قدوة لغيرك

ولك ان تعرفى انه لا كلام بعد صعود الامام او الخطيب
مهما كان الحدث
الا اذا كنا نتعرض لكارثة لا قدر الله

ومعاكى حق دعوات البعض قد ننقلها بدون وعى وادراك
لذا كان هدف الكلام ان ننتبه قليلا

وبما انك لم تدعى بهداية الازواج
تعلن المدونة
انها مدونة صيامى
لا يقدم فيها مشروبات

ههههههههههههههههه

ولالالالالالالالالالالالالالاايه

تقديرى لاءحبانا المستوطنين وربنا ما يحرمنا منهم

SHAPE YOUR LIFE (ABOALI) Says:

الى كلمات من نور

اللهم امين
ربنا ينقى سرائرنا ويهبنا للخير

تقديرى يا انسان

SHAPE YOUR LIFE (ABOALI) Says:

الى انجى

يااااااهلا

نزار قبانى
بس ممكن نقول شيىء تانى

سنقيم الرايات دون قتل
وسنعلم كما علمنا احمدا(ص)
ان نصبر على البلاهاء تعليما
فعسى النور يوما
يكون للقلوب غزينا



تقديرى الكامل